MATHI 6

Angati Tenla Agütsüba Indang Tesayuba

1 # Mat. 23.5 “Nenok temeshibaji nisungtem nem ngudaktsütsü asoshi yimjak nung teinyak; nenoki yamaji inyakra, kotak nung aliba nenok Tebu den nenok tajangzük maka. 2Anungji nai kodang angati ajungba mapa inyakdir, anemsüba purtemi sinagogtem nung aser yimti yimtongtem nung parnokji nisungtemi tushidaktsütsü asoshi inyakba amaji nenokibo pei jakdang jangzü tapuma. Ni nenok dang züngpong ashir, parnoki pei tajangzük nguogo. 3Saka kodang nai angati ajungba mapa inyakdir, ne teka tajichi agi kechi inyaker, aji ne teka tabelen nem temetetdaktsü. 4Oda nai angati ajungbaji miima inyaktsüsa; aser ne Bu shiba temiimdak lir, Pai aji angur aser pai ne nem odia tajangzük agütsütsü.

Sarasademba Indang Tesayuba

(Luk. 11.2-4)

5“Kodang nenoki sarasademdir nenoki anemsübapur amato tesüma, kechiaser nisungtemi angutsüsa parnoki sinagogtem aser yimtong lenjemtem nung noktaker sarasademtsü parnoki aginür, ni nenok dang züngpong ashir, parnoki pei tajangzük nguogo. 6Saka nai kodang sarasademdir, ne taktang telungbai iang, ne kishi shibangang, aser temiimdak aliba nebu dang sarasademang; aser nebu shibai temiimdak nung aliba angur pai ne nem tajangzük agütsütsü. 7Sarasadem nung Bendangertemi sarasademba ama amajok oshilu tamshi, kechiaser parnoki o aika jembi nung angashitsü ta bilemer. 8Parnok amaji nenok telima, kechiaser nenoki pa dang memeshidang, nenok tenüngdaktsü kechisa aka aji nenok Tebui metet. 9Anungji nenoki yamai sarasademtsüla:

‘Kotak nung aliba Oba,

Ne nüng temeshi sang,

10Ne yimli arung,

Kotak nung koda lir,

Alima nung aji oda ne mulung sang.

11Anogo shia chiyungtsü tanü onok nem kua;

12Aser ozüi kechi koda pi dang tai toka lir,

aji oda ozü tai tokangma;

13Aser tatitangi onok tanima,

joko tamajungba nungi sota liangma.

Kechiaser Yimli, ain aser sentsüwangshi teti ne meyong sang. Amen.’#6.13: Kechiaser yimli ... Amen: Iba ya tekülem nung azüngtsü atema bendenlokba.

14“Kechiaser nisungtemi aibelenbatem nenoki parnok dang tokra, nenok kotaker Tebuia nenok dang atoktsü.#Mar. 11.25 15Saka nenoki nisungtem dang parnoki aibelenbatem metokra, nenok danga matoktsü.

Lumiba Indang Tesayuba

16“Aser kodang nenoki lumidir, anemsübatem ama tejak temeküm, kechiaser parnok lumiba nisungtem nem ngudaktsütsü asoshi, parnoki tejak meküma sayur. Ni nenok dang züngpong ashir, parnoki pei tajangzük nguogo. 17Saka kodang nai lumidir, ne kolak nung totzü mezüang aser ne tejak meiang. 18Anungji na lumibaji nisungtem matsüngdang meshisangtsü, saka nebu temiimdak aliba madang dang angutsüsa; aser nebu shibai temiimdak nungi angur pai ne nem tajangzük agütsütsü.

Kotak Nung Rongsen

(Luk. 12.33-34)

19 # Yak. 5.2,3 “Nenoki pei asoshi ali nung rongsen terizüng, kechi nung tarütsü aser song agi chimar, aser auüri rakpoker aser auyar. 20Nenoki pei asoshi kotak nung rongsen rizüngang, kechi nung tarütsü aser song agi machir aser auüri merakpoker aser mauyar; 21kechiaser kong ne rongsen lir, yangji ne mulung alitsü.

Temang Tesangwa

(Luk. 11.34-36)

22“Tenükji temang milen lir. Ne tenük junga lira, ne mang ajonga tesangwa agi asüngtsü; 23Saka ne tenük mejungi lira, ne mang ajonga tammang agi sünga alitsü. Anungji ne dak aliba tesangwaji tammang süra, tammangji koda tulu.

Tsüngrem Aser Rongsen

(Luk. 16.13)

24“Shingaia kibur ana metenzüktet; kechiaser pai ka sempatsü aser ka meimtsü, mesüra pai ka dak temulung agütsütsü, aser ka mezüngmeshitsü. Nenoki Tsüngrem aser rongsen metenzüktet.

Taküm Tebilemtsütem

(Luk. 12.22-34)

25“Anungji ni nenok dang ashir, nenok taküm asoshi kechi achitsü mesüra kechi ajemtsü, mesüra ano nenok temang asoshi kechi abentsü ta shisa tebulu. Chiyungtsü dang taküm taoba aser süoshi dang temang taoba masü ama? 26Anüng ozütem ajiang, parnoki matener, marur, mesüra jendang mebendener, aji saka nenok kotaker Tebui parnok mesür. Parnok dang nungi nenok tali taoba masü no? 27Nenok rongnung shibai teyongyaba agi pei arishi ghonda ka atsülangtsü akok? 28Nenoki kechiba süoshi asoshi shisa bulur? Arem nung labu narotem koda ainer shisadangang. Parnoki mapa meinyaker; aser ang mainer; 29#1 Ch. 10.4-7; 2 Pu. 9.3-6 Saka ni nenok dang shidi, Solomona pei sentsüwangshi ajak nung item rongnung ka mesüka mesobu. 30Saka Oh tera amangertem, arem ai kechi tanü lir asüng mimong nung enoktsütsüba lir, iba nemji Tsüngremi yamaji sobudaktsü süra, pai idakji chia nenok nem mesobudaktsütsü ama?

31“Anungji ‘Onoki kechi achitsü?’ Mesüra ‘Onoki kechi ajemtsü?’ Mesüra ‘Onoki kechi abentsü?’ ta shisa tebulu. 32Kechiaser Bendangertemi item indang shisa bulur. Saka nenok kotaker Tebui item ajakji nenok nüngdak ta metet. 33Saka tamasa nenoki Tsüngrem yimli aser pa temeshiba bushiang, aser item ajak nenok nem bendenloktsütsü. 34Anungji asüng asoshi shisa tebulu, kechiaser asüngi pei asoshi shisatsü. Anogo shia pei yari toushi teperi kar.

Currently Selected:

MATHI 6: AONAGABSI

Highlight

Copy