MATHI 28

Yisu Shia Aruba

(Mar. 16.1-10; Luk. 24.1-12; Yoh. 20.1-10)

1Amungnü süir külen, deobar anepungi Mari Magdalin aser tangar Mari leperji ajidangi aru. 2Aser ajiang, menoknok tulu anok, kechiaser Kibuba tenyar ka kotak nungi alu, aser arua lungji meküptok aser iba manungji amen. 3Pa tereprangtsü tsüngpret ama aser pa sü rüjep ama temesüng liasü. 4Pa tsüngken tsübuba agi tanükertemji atenten aser tasü ama aküm. 5Aser kotak tenyar jagi tetsürtem dang ashi, “Nenoki tetsübu, kechiyong Yisu shiba kangki nung angenlok, nenoki pa bushir ta ni metet. 6Pa yangi mali, kechiyong pai ashiba ama, pa shia aruogo; arung pa mejangdak ajiang. 7Nenoki yakta oang aser pa nütsüngtem dang shiang, pa tasü nungi shia aruogo aser pa nenok dang tama Galil-i aotsü, aser idakji nenoki pa angutsü. Ajiang, ni nenok dang shiogo.” 8Tetsübu aser tepela tulu nung parnoki leper nungi ilunga oadok, aser pa nütsüngtem dang sangoktsütsü asoshi asema ao. 9Aser ajongbena Yisui parnok ajurua ashi, “Junga liang.” Parnoki arua pa tetsüng nung sota külem. 10Idangji Yisui parnok dang ashi, “Tetsübu, oang, aser kü adianutem dang Galil-i oang ta shiang aser idakji parnoki ni angutsü.”

Tanüker Osang

11Tetsürtemji oya alidang, ajiang, tanüker kari yimti jagi ao aser kechisa atalok aji puti-ungertem dang sangoktsü. 12Parnoki tamburtem aniten aser jembiteper külen, parnoki temerangertem nem sen aika agüja ashi, 13“Onok mejanga alidang pa nütsüngtem aru aser pa mang bener oadok ta nenoki shiang. 14Aser ibai governori angashira, onoki pa mesüzüktsü aser nenok lendong nungi kümzüktsü.” 15Anungji parnoki senji agizük aser parnok dang ashiba ama inyak. Iba osang ya Yihuda nunger rongnung ayimsünga prokshia ao aser tanü tashi parnoki aji oda jembia arur.

Nütsüngtem Tenyaba

(Mar. 16.14-18; Luk. 24.36-49; Yoh. 20.19-23; TMa. 1.6-8)

16Saka nütsüng terkaji Galil nung aliba, Yisui parnok dang ashiba tenemi ao. 17Aser parnoki kodang pa angu, parnoki pa külem, saka karibo atsüa-ayonga liasü. 18Yisui arua parnok den jembia ashi, “Kotak nung aser alima nung tashi-ain ajak kü nem agütsüogo. 19Anungji nenoki oang aser kin ajak nütsüng kümdakjang, Tebu, Techir aser Tanela Temeshi tenüng nung parnok baptijang. 20Aser ni nenok dang kechisa mela, item ajak benshitsü parnok dang sayuang; aser ajiang alima tatem tashi ni nenok den teti alitsü.”

Currently Selected:

MATHI 28: AONAGABSI

Highlight

Copy