MATHI 27

Yisu Pilat Tsüngdang

(Mar. 15.1; Luk. 23.1-2; Yoh. 18.28-30)

1Tang anepdang akümdang putiungertem aser nübur tamburtem ajak Yisu südaktsütsü asoshi pa anema parnoki jembitep, 2aser parnoki pa alena anir oa, Pilat governor ket nung bendanga agütsü.

Yihuda Iskariot Asüba

(TMa. 1.18-19)

3Idangji Yihuda, shibai Yisu bendanga agütsü, pai Yisu aitsüba ngua, pei sasa temulung meyip, aser puti-ungertem aser tamburtem dangi taribi sen semerji meyipa bener arua ashi, 4“Tai maketba nisung bendanga agütsüba ajanga ni temenen benshiogo.” Saka parnoki ashi, “Onoki aji agi kechi asütsü? Aji ne tebilemtsü sang.” 5Idangji pai tenla kidang senji pataka toktsür ao, aser pai oa pei sasa soseta asü. 6Puti-ungertemi senji bena arua ashi, “Ya azü alang asünung, yabo temeshi tenla senbong nung ayutsü tim masü.” 7Yamaji parnoki jembitep, aser iba sen jagi Bendangertem mang aremtsü asoshi poteper li ali. 8Anungji iba li dangji tanü tashi “Azü li” ta ajar. 9#Zek. 11.12,13Anungji Yerimia ainkari jembizüka yutsüba o ya oda atalok, “Israel chirtem kari shiba indang jenjang atet, iba jenjang atetba nisung talang sen semerji parnoki bena aru, 10aser Kibubai kü dang ashiba ama parnoki aji poteper li asoshi agütsü.”

Pilati Yisu Dang Asüngdangba

(Mar. 15.2-5; Luk. 23.3-5; Yoh. 18.33-38)

11Tang Yisu governor tsüngdang noktakdaktsü aser governori pa dang asüngdang, “Na Yihuda nunger Chubaji asü?” Yisui langzü, “Nai yamaji ashir.” 12Puti-ungertem aser nübur tamburtemi pa aitsüdang, pai kecha melangzü. 13Idangji Pilati pa dang ashi, “Parnoki na anema kuli kwika agütsür aji nai mangashir no?” 14Saka pai o kata melangzü, aji asünung governorji kanga süngmang.

Yisu Asütsü O Bendangba

(Mar. 15.6-15; Luk. 23.13-25; Yoh. 18.39—19.16)

15Iba benjong nungji teloki mulungba ama tepuokdak alir ka parnok dangi chioktsüji governor yimsü liasü. 16Iba mapang nungji Baraba ta sür nüngtugu ka tepuokdak yua liasü. 17Anungji parnok külemi sentepa alidang, Pilati parnok dang ashi, “Nenok dangi shiba chioktsü nenoki mulunger? Baraba asü mesüra Khrista ta ajaba Yisu?” 18Kechiaser mokokaji agi parnoki Yisu bendanga agütsü ta pai metet. 19Tang Pilat obendangba menden nung mena alidang, pa tebutsüi pa dangi osang ka yoka ashi, “Iba tai maketba nisung asoshi nai kecha teinyak; kechiaser tanü ni pungmang nung pa atema kanga timtemogo.” 20Saka Yisu südakjang aser Baraba meshizükang ta puti ungertemi aser nübur tamburtemi telok mesüzük. 21Pilati parnok dang langzü, “Item ana rongnung nenok dangi ni shiba chiokdaktsünür?” Parnoki ashi, “Baraba.” 22Pilati parnok dang ashi, “Ajangla, Yisu shiba dang Khrista ta ajar, pa dang ni kechi inyaktsü?” 23Parnok ajaki langzü, “Pa kangki nung angenlokang!” Aser pai ashi, “Kechiba? Pai kechi tai inyak?” Saka parnoki kanga ayimtena ashi “Pa kangki nung angenlokang.” 24#Taz. 21.6-9 Anungji kodang Pilati pa o matalokba angu, aser telok rongrongshishi adokba ngua pai tzü bena aru aser telok madang teka metsüka ashi, “Iba temeshi nisung azü atema kü dak tai maket, aji nenok sasa sang.” 25Idangji telok ajaki langzü, “Pa zü onok madak aser onok chirtem madak kaoang.” 26Idangji pai Baraba parnok dangi chiok, saka pai Yisu dak merang ayi aketba lisü agi repdaktsü aser kangki nung angenloktsü bendanga agütsü.

Temerangertemi Yisu Menütsüba

(Mar. 15.16-20; Yoh. 19.2-3)

27Idangji temerangertemi Yisu Governor kidangi anir ai aser temeranger telok ajaki pa dangi sentep. 28Parnoki pa süoshi shizük aser nakrema meremba sü ka pa nem abendaktsü. 29Aser parnoki ai mesena yangluba chuba korang ka pa tekolak nung semoktsü aser pa teka tajichilen tzütok ka amoktsü; aser parnoki pa madang apudaker pa atala ashi, “Yihuda nunger Chuba, sangang!” 30Aser parnoki pa dak metsü metsüloktsü aser tzütokji agizüker pa tekolak nung azük. 31Aser parnoki pa sensatsür külen, pa nungi nakrema meremba süji agizük, aser pa nem pei süoshi abendaktsü, aser pa kangki nung metaloktsü anir ao.

Yisu Kangki Nung Angenlokba

(Mar. 15.21-32; Luk. 23.26-43; Yoh. 19.17-27)

32Parnok adokdang, Cyrene nunger nisung ka tenüng agi Simon parnoki ajurua, pa nem Yisu kangki kangshia apudaktsü. 33Kodang parnoki Golgotha, tetezü “Tekolak-ret” ta ajaba tesem kati aru, 34#TKe. 69.21 parnoki Yisu nem taku den meyokteper yi tajemtsü agütsü; aser pai aji menakdanger magizük. 35Aser parnoki Yisu kangki nung angenloker, an-tokdanga pa süoshi parnok rongnung lemsa agi. 36Idangji parnoki idakji mener pa nüka ali. 37Aser parnoki pa aitsüba kuliji, “IBAI YIHUDA NUNGER CHUBA YISU” ta zülur pa tekolak manung neploktsü. 38Iba mapang nung ashi-auür ana, ka tajichilen, ka tabelen ta angenloka yutsü. 39#TKe. 22.7; 109.25 Anasa süisübongertemi pei tekolak angemlokja pa sensatsü. 40#Mat. 26.61; Yoh. 2.19 Aser ashi, “Tenla ki raksar aji asemnü nung yanglutsüba na, ne sasa kümzükang. Na Tsüngrem Chir süra kangki nungi alung.” 41Yamaji putiungertem, tezülurtem aser nübur tamburtem ajaki pa atala ashi, 42“Pai tangarbo kümzük, peibo mekümzükteter! Pa Israel nunger Chuba! Tang pa kangki nungi aludakjang; idangji onoki pa dak amangtsü. 43#TKe. 22.8 Pai Tsüngrem dak temulung alem; Tsüngremi pa dang pelar süra, tang pai pa kümzükdakjang, kechiaser pai ashi, ‘Ni Tsüngrem Chir.’ ” 44Pa den kangki nung angenlokba ashiauürtemia yamajisa pa atala.

Yisu Asüba

(Mar. 15.33-41; Luk. 23.44-49; Yoh. 19.28-30)

45Tang terana baji nungi asem baji tashi alima ajonga mangadok. 46#TKe. 22.1Aser asem baji shi nung Yisui ola tulu agi ayimtena ashi, “Eloi, Eloi lama sabakthani?” Iba tetezü, “Kü Tsüngrem, kü Tsüngrem, kechiba nai ni toktsür?” 47Idakji noktaka alirtem kari aji angashidang ashi, “Pai Elija jadagi.” 48#TKe. 69.21 Idangyongji parnok rongnung kati asema oa renrajeb bener arua aji tasentzü agi süngdaktsür, rangdong ka nung ataloker pa nem tajemtsü agütsü. 49Tangar kari ashi, “Oda tokjang! Elija pa kümzüktsü arudisü marulir asenoki reprangdi.” 50Aser Yisui tanaben ola tulu agi ayimten, aser pei tanela odaktsü. 51#Ani. 26.31-33 Aser ajiang, tenla ki teyindangba sü temalen nungi ali tonga ana küma shima, aser menoknok anok, aser lungtem jakma. 52Idangji lepertem lapok, aser mejanga aoba temeshipur temang aika shia arudaktsü. 53Aser pa shia arur külen leper nungi adoka parnoki Temeshi Yimti-i ia aika nem ngudaktsü. 54Kodang noklang madak tanishiba aser pa den Yisu nüka alirtemi menoknok aser tatalokbatem angu, parnoki kanga tsübua ashi, “Atangji ibai Tsüngrem Chir liasü.” 55Aser Galil nungi Yisu yarir, pa sülen anitaker tetsür jenti-i oji nungi ajia liasü. 56Parnok rongnung Mari Magdalin, Yakob aser Yosef tetsü Mari, aser Zebedi chirtem tetsü dena liasü.

Yisu Aremba

(Mar. 15.42-47; Luk. 23.50-56; Yoh. 19.38-42)

57Kodang nikongtsütsü aküm, Arimathia nunger takar nisung ka shiba Yisu nütsüng ka kümer liasü; pa tenüngji Yosef liasü. 58Iba nisungji Pilat dangi ao, aser Yisu temang meshi. Idangji Pilati aji agüjang ta mela. 59Anungji Yosefi Yisu temang meshizük aser sü temerük aser tanük agi mei. 60Aser pai lung angenpoka aliba, pei leper tasen nung aji ayu, aser pai leper kishi nung lung tulu ka meküploka toktsür ao. 61Mari Magdalin aser tangar Mari leper kümbang nung mena liasü.

Leper Nung Tanüker

62Tananü, aji terenemba anogo sülenji liasü, puti-ungertem aser Farisitem Pilat dangi külemi sentep, 63aser ashi, “Tulur, iba ashikülakbai pa taküm alidang ashi, ‘Asemnü lir ni shia arutsü,’ ibai onoki bilemteter. 64Anungji asemnübuba tashi leperji anüktsü ozüng agüjangma. Aji ta mesüra nütsüngtem arutsü aser pa mangji auyar aotsü aser nüburtem dang pa tasü nungi shia aruogo ta ashitsü. Idangjibo mezüng tai dang nungi tesü taiji tamajungba asütsü.” 65Pilati parnok dang ashi, “Nenok tanükertem kar. Nenoki oang aser aji nenoki akok tashi nükdakjang.” 66Anungji parnoki ao aser parnok den tanükerji dena lung nungji temaitsü ajena, leperji nükdaktsü.

Currently Selected:

MATHI 27: AONAGABSI

Highlight

Copy