MALAKI 3
3
Kibuba Tenyar
1 #
Mat. 11.10; Mar. 1.2; Luk. 1.76; 7.27 “Ajiang, ni kü tenyar yoker aser pai kü jakdang lenmang renemtsü aser Kibuba shiba nenoki bushir aoksa-a pei tenla kidangi arutsü aser tezüngzüktepba tenyar shiba dang nenoki pelar, ajiang, pa arur, ta Temeranger Kibubai ashir 2#Yoe. 2.11; Jad. 6.17Saka shibai pa aruba anogo tonga arema litettsü? Aser pa adokdang shibai noktaktettsü? Kechiyong pa temeshitetba mi ama, aser sü yanglur taremba mozü ama lir. 3Taribi merükteter aser meshiteter ama pa amentsü aser Levi chirtem meshitettsü. Pai parnok hon aser taribi mesüka merüktettsütsü, anungji Kibuba asoshi parnok temeshiba nung tenla bener aruba nisungtem akümtsü. 4Idangji alemli ama aser akhidang ama Yihuda aser Yirusalem tenlaji Kibuba dang tepelatsü alitsü. 5Idangji ni nenok dangi o bendangtsü asoshi anasa arutsü, aser temezüngertem aser nüktapangtartem anema aser shiri tiyazü nung azüngashir, aser shirnoki ayangertem pei taa nung kangshir, amitsür aser lajar; aser shirnoki aener arua alir dang külak-kübonga benshir, aser ni metsübur, parnok anema ni tekara kuli asütsü” ta Temeranger Kibubai ashir.
Ter Shilem
6Ni Kibuba memelenshir; anungji nenok, Oh Yakob chirtem, mesamadaktsüi lir. 7Nenok tsürabur anogo nungi nenoki kü tzüzüng-ozüng anema apuso, aser itemji mebenshi. Ni nenok dangi meyiptsü asoshi kü dangi meyipa arung, ta Temeranger Kibubai ashir. Saka nenoki ashir, Onoki koda meyiptsü? 8Nisungi Tsüngrem rakzükraktemdi ma? Aji saka nenoki ni rakzükraktemdagi. Saka nenoki ashir, onoki koda na rakzükraktem? Ter shilem aser tenla saruba nung! 9Atakatem ka agi nenok atakatemogo; kechiyong nenoki ni rakzükraktemdagi, iba kin ajongai. 10#Lev. 27.30; Zün. 18.21-24; Taz. 12.6; 14.22-29; Neh. 13.12 Kü kidang chiyungtsü akatsü asoshi ter shilem ajonga terizüngdak kidangi bener arung, aser iba amai ni tendangang, ta Temeranger Kibubai ashir, aser ni nenok asoshi anüng kichiba lapoktsüdisü melapoktsülir, aser nenok asoshi temoatsü moshia mayim tashi meküpzüka yokdisü meyoklir reprangang. 11Idangji ni nenok asoshi temeyoker arütsütsü, anungji nenok asoshi iba jagi ali nungi adokbatem mesamatsütsü, nenok alu nung tsükmenatzü dongi anojungi pei tejang jetzüka metsükdaktsütsü, ta Temeranger Kibubai ashir. 12Aser kin ajaki nenok dang temoatsü ta ajatsü, kechiyong nenok tepelatsü lima asütsü, ta Temeranger Kibubai ashir.
Kibuba Anogo Nung Ochishir Takokba
13“Ni anema nenoki o tulu jembi, ta Kibubai ashir. Saka nenoki ashir, Na anema onoki kechi jembi? 14Nenoki ashir, Tsüngrem tenzüktsü tenüngdaktsü maka; aser pai melaba benshitsü aser Temeranger Kibuba madang mangyimer ama jajatsü ya kechi tajangzük lir? 15Saka tang, asenoki mezümekümer temoatsüba ta züngshir; atangji tamajung inyakertem azükarur; aser shirnoki Tsüngrem tendanger, parnok jenteter. 16Shirnoki Kibuba akhüm tsübur, kati ka den jembiteper, Kibubai parnok dang anga aser parnok dang angashi, aser pa madang shirnoki Kibuba dang akhüm tsübur aser pa tenüng shisadanger parnok indang tebilemtettsü kaket ka zülua liasü. 17Anungji ni inyakba anogo nung kü pei rongsen ama parnok kü meyong asütsü, ta Temeranger Kibubai ashir, aser oda kümzüka yutsür, iba ama ni parnok kümzüka ayutsü. 18Idangji temeshiba aser tamajungba tsüngda nung, shibai Tsüngrem tenzüker aser shibai pa metenzüker, tetsüngda nung nenoki tanaben bendangtsü.”
Currently Selected:
MALAKI 3: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
