MALAKI 2
2
1“Tang, Oh nenok putirtem, iba temelaba nenok asoshi lir. 2Nenoki kü tenüng nung sentsüwangshi agütsütsü, nenoki mangali süra, aser nenoki temulung nung rizünga meyura, Temeranger Kibubai ashir, idangji ni nenok dangi atakatem yoktsü, aser nenok temoatsütem atakatemtsü. Hau, ni parnok atakatemtsüogo, kechiyong nenoki aji temulung nung rizünga mayu. 3Angang, nenok mechi ni nenok metsü arütsütsü aser nenok tejak nung scü, oda nenok tenlaba nung scü paloktsütsü, aser nenok aji agi anir aotsü.”
4 #
Zün. 3.11-13
“Kü tezüngzüktepba Levi den lir, iba temelaba ni nenok dangi yoka lir, ta nenoki metettsü asoshi, ta Temeranger Kibubai ashir. 5#Zün. 25.12 Kü tezüngzüktepba pa den liasü, taküm aser yimjiyimjung asoshi liasü; pai akhüm tsübutsü asoshi itemji ni pa nem agütsü, pai kü dang akhümtsübu; aser kü tenüng asoshi tsüngken tsübua noktak 6Anungji ozüng pa bang nung liasü, aser pa tebang mechi nung memeshiba maliasü; pai kü den tesünep nung indang indanga jaja, aser tai jenti nungi pai meyipa odaktsü. 7Kechiyong putir tebang mechi nung temetetba shisatsü yua alitsüla, aser pa bang nung parnoki ozüng bushitsüla; kechiyong pa Temeranger Kibuba osang abener lir. 8Saka nenok lenmang nungi meyipa oa lir; ozüng nung aika nenoki metsüdaktsüogo; nenoki Levi tezüngzüktepba raksatsüogo ta Temeranger Kibubai ashir. 9Aji asünung nia nenoki kü mapatem mebenshiba yari, aser ozüng akhüm metsübubayong nenok sensamasadaktsü aser tajemzükba kümdaktsü.”
Yihudai Tezüngzüktepba Raksaba
10“Asenok ajak tebu ka dang masü no? Tsüngrem kati asenok yanglu masü no? Kechiba asenok nisung shiai pei adianu anema külaka aser tsüraburtem tezüngzüktepba menendakja benshir? 11Yihudai külaka benshia lir, aser Israel nung aser Yirusalem nung tesempatsü benshia lir, kechiyong Yihudai Kibubai meimba temeshidak menentsü, aser bendanger tsüngrem jala agia lir. 12Yakob süki nungi iba inyakba nisung, shiba saker aser shibai langzür, aser shibai Temeranger Kibuba nem tenla tenlar, Kibubai leptoktsü.”
13“Aser iba tanabuba ya nenoki inyakang, nenoki Kibuba tenladak nüktzü agi, tajepba aser tanüngba agi süngdakjang, kechiaser joko pai tenladak kecha merepranger, mesüra nenok ket nungi pai pela-a kecha magizüker. 14Aji saka nenoki ashir, kechi asüba yong? Kechiaser na aser ne atura kibutsü tsüngda nung Kibuba kuli asütsü, la ne medemer, aser ne tezüngzüktepba kibutsü saka nai la anema külaka benshi. 15Tsüngremi la yamaji meyanglua ma? Shi aser tanelaji pa meyong süra kechiba ka dang? Kechiaser pai Tsüngrem tsübuba metsü aginür. Aji asünung nenok tanela kümdangang, aser shingaia pei atura kibutsü anema külaka tebenshidaktsü. 16Kechiyong pala-a yokba ni sempar ta, Israel Tsüngrem Kibubai ashir, pei süoshi tashiyim agi nembangertem, ta Temeranger Kibubai ashir, anungji nenoki külaka mebenshitsü nenok tanela taküm indang kümdangang.”
17Nenok otem agi nenoki Kibuba belemdaktsüogo. Aji saka nenoki ashir, kechi nung onoki pa belemdaktsü? Iba nungji nenoki ashir, “Tamajung inyaker nisung shia Kibuba tsüngdang tajung lir, aser pai parnok dang pelar mesüra, Ochiba Tsüngrem kong ali?” ta nenoki asüngdanger.
Currently Selected:
MALAKI 2: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
