LUK 7

Noklang Madak Tanishir Kilir Anebtsüba

(Mat. 8.5-13)

1Nisungtemi angashia pai o ajak jembimar külen, pai Kapernaumi ai. 2Tang noklang madak kibur ka pai meimba kilir ka shiranga tasür dang liasü. 3Kodang pai Yisu indang angashi, Yihuda nunger tamburtem pa dangi odakja, pei kilir kümzüktsü arung ta mepishi. 4Aser kodang parnoki Yisu dangi aru, parnoki pa dang kanga mepishia ashi. “Nai pa asoshi ya inyaktsü tetemsü, 5kechiaser pai ozü kin meimer, aser pai ozü sinagog yanglutsüogo.” 6Aser Yisui parnok den ao. Ano pa kidang nungi talangka moi alidang, noklang madak kiburi tembartem yoka pa dang ashi. “Kibuba, na tim tetem, kechiaser na kü kilempoki aittsü kü dak malang; 7mesüra ni ne dangi arutsü malang ta ni bilemer. Saka oji dang shiang aser kü kilirji anebadoktsü 8Kechiaser kü kübok temerangertem yur, nia bangdak aliba nisung ka lir; aser ni ka dang ashir, ‘Oang’, aser pai aor; aser ano tangar ka dang ashir, ‘Arung’, aser pai arur; aser kü kilir dang ashir, ‘Ya inyakang’, aser pai aji inyaker.” 9Aser kodang Yisui ya angashi pai pa dangji süngmang, aser meyiper pa sülen anitakba telokti dang ashi, “Ni nenok dang shidi Israel pur rongnungasüng iba ama tamang tulu ni munguka.” 10Aser kodang teyokertem kidangi meyipa aru, kilirsangji aneber angu.

Nain Nung Amitsür Chir Ka Shia Arudaktsüba

11Ajiser külen Nain ta ajaba yimti kati pai yakta ao; aser pa nütsüngtem aser telokti tulu ka pa den ao. 12Aser kodang pa yimti süngkhüm anasa tonga aru, ajiang, amitsür ka chir tasü mang bener aruya liasü; aser amitsürji techir ibaji dang liasü aser yimti nungjagi telok tulu ka sentena la den liasü. 13Aser kodang Kibubai la angu, pai la dang aochia bilem aser la dang ashi, “Tejebma.” 14Pai anasa aru aser lep nungji kongshi, aser lep apurtemi marakzüi noktak. Aser pai ashi. “Asangur, ni ne dang shidi, shishiang.” 15Aser tasüba nisungji saaka amen aser jembimeso, aser Yisui paji tetsü nem agütsü. 16Aser ajak dak tetsübu adok aser parnoki Tsüngrem tenüng sanga ashi, “Ainkar tulu ka asenok rongnung adoka lir, aser Tsüngremi pei nübur semdangogo.” 17Aser pa indang iba osangji Yihuda lima ajak nung aser temeket lima ajakleni prokshia ao.

Yohan Baptitsüba Nungi Osangbenertem

(Mat. 11.2-19)

18Kodang Yohan nütsüngtemi pa dang item ajak indang ashi, 19Yohani pa dangi pei nütsüng ana ja-a tena Kibuba dangi yoka ashi. “Tarutsü alibaji na asü, mesüra onoki tangar ka asoshi atatsü?” 20Aser kodang nisungtemi pa dangi aru, parnoki ashi, “Yohan Baptitsübai ne dang iba o asüngdangi onok yok, Tarutsü alibaji na asü, mesüra onoki tangar ka asoshi atatsü?” 21Iba mapang nungji pai tashitak tapu jenti aser temenen tanela agi shirangertem aika ngudaktsü. 22Aser pai parnok dang langzü, “Oang aser nenoki kechi angu aser angashi aji Yohan dang shiang; nükpokertemi angur, tsüngtsükertemi jajar, zütsüra aketertem meshidoker, aser tenarong tajaki angashir, tasürtem shia arudaktsür, sensakertem dang osangtajung sayur. 23Aser shiri kü dak temetsüdaktsü kecha mangur pa tepelatsü.”

24Aser kodang Yohan tenyartemi pila-a ao, pai teloktem dang Yohan indang ashitsü tenzük; “Kechi ajitsü nenoki aremi ao? Mopungi tsütok azüshiba asü? 25Saka kechi ajitsü nenoki aremi ao? Sobutsü tanük sobuba nisung ka ajitsü asü? Ajiang sentsüprang sobutsü abenertem aser tasoshia alibatem chuba kidang lir. 26Saka nenoki kechi ajitsü ao? Ainkar ka asü? Hau, ni nenok dang shidi, ainkar danga taoba. 27Pa indang koma zülua lir: ‘Ajiang, kü tenyar, shibai ne jakdang ne lenmang renemtsü, pa ne jakdang ni yoker.’ 28Ni nenok dang shidi, tetsüri asoba rongnung Yohan dang nungi tuluba shinga melika; saka shiba Tsüngrem Yimli nung tilatiba lir pabo pa dang nungi tuluba lir.” 29#Mat. 21.32; Luk. 3.12 Aser kodang nisung ajaki aser alimelen sarurtemi ya angashi, parnoki Tsüngrem metentsü, aser Yohan baptitsüba agi baptia liasü; 30saka Farisitem aser ozüng metetertemibo parnok sasa Tsüngremi sayuba mangai pai baptitsüba magi.

31Anungji Yisui ashi, “Süra, kechi den iba putu nisungtem ni medemdangtsü, aser parnok kechi mesük? 32Tanurtem shishidak mena alirtemi jembiba, ‘Onoki nenok dang jemji apu, aser nenoki metsüngsang; onoki mang ayim, saka nenoki majeb’ ta ashirtem parnok lir. 33Kechiaser Yohan Baptitsüba chi chiyunga mesüra yi jema maru, aser nenoki ashir, ‘Pa dak temenen tanela lir!’ 34Nisung Chir chiyunga jema aru, aser nenoki ashir, ‘Ajiang, pabo chidiyungdir, aser yi jemer alimelen sarur aser temenenpur tembar!’ 35Saka shisatsüji pei süngjangtem agi metendaktsür.”

Temenentsür Ka Nem Tatok Agütsüba

36Anungji Yisui ashi, “Süra, kechi den iba putu nisungtem ni medemdangtsü, aser parnok kechi mesük? 37Aser ajiang, yimti nung aliba temenentsür kati kodang pa Farisi nungba kidang chiyungdak mena lir ta angashi, teronem totzü bongdang ka bener aru; 38aser pa sülen pa tetsüng züngdang lai jeba noktak, aser la nüktzü agi pa tetsüng metentsütsü tenzük aser la kolak ku agi pa tetsüng aidoktsü, aser pa tetsüng kanga mesepa lai totzü agi mezütsü. 39Anungji kodang pa jaokba Farisi nungba jagi aji angu, pai pei sasa dang ashi. “Iba nisung ainkar ka süra, pa dak kongshilaji shiba, aser la kechi ama tetsür ka pai metetla, kechiaser laji temenentsür ka lir.” 40Aser Yisui pa dang langzü, “Simon, ni ne dang langka shidi” Aser pai pa dang langzü, “Tesayur, shiangma.” 41“Taputsür nisung ka dang sentsütsür ana liasü; kati sen noklang pungu aser tangar kati sen tenem sentsü tsüa liasü. 42Kodang parnok taotsü kecha makai liasü, pai tenaprongla dang sentsüji atok. Anungji tena rongnung shibai pa dang tali meimtsü” 43Simoni langzü, “Shiba dang pai tali atok, iba jagi pa dang tali meimtsü ta ni bilemer.” Aser pai pa dang ashi, “Nai bilembaji shitak.” 44Aser pai tetsürla tsütsüji meyipa shir Simon dang ashi, “Iba tetsür nai angur südi? Ni ne kidangi atuaka, tetsüng shidoktsü asoshi nai kü nem tzü magütsü. Saka laibo la nüktzü agi kü tsüng metentsü, aser lai la ku agi aidoktsü. 45Nai kü dak tebang memesep, saka laibo ni arudang nungi kü tetsüng mesepba manener. 46Totzü agi nai kü kolak meloktsü, saka laibo kü tetsüng totzü agi mezütsü. 47Anungji ni ne dang shidi; la temenen aika liaka atoker, kechiaser lai kanga meim, saka shiba dang tera dang atoker, iba jagi tera dang meimer.” 48Aser pai la dang ashi, “Ne menentem atoker.” 49Aser pa den chiyungdak amenertemi bilemtsü tenzük, “Temenen atokba nisung ya shiba?” 50Aser pai tetsürla dangji ashi, “Ne tamang agi na kümzükogo, tesünep nung oang.”

Currently Selected:

LUK 7: AONAGABSI

Highlight

Copy