LUK 8

Yisu Sülen Anitakba Tetsürtem

1Ajiser külen pai yim tulu aser tilai oa Tsüngrem Yimli Osangtajung sayutsüngi. Aser teranaji pa den liasü. 2#Mat. 27.55; Mar. 15.40; Luk. 23.49Aser ano tetsür kar shirnok nungi temenen tanelatem aridoktsü aser mokokmin tashitaktem anebtsü; Mari, Shiba dang Magdalin ta aja, la dak nungi temenen tanela tenet odaktsü, 3aser Herod temaba kilir Kuza tebutsü Yoana aser Susana aser ano tangar aika pa den liasü. Parnoki parnok akaba agi Yisu aser pa nütsüngtem yaria liasü.

Metsü Proker Agi O-entepba

(Mat. 13.1-9; Mar. 4.1-9)

4Aser kodang telok tulu ka külemi sentep aser yimti aika nungi nisungtem pa dangi aru, pai parnok den o-entepba ka ajanga jembi. 5“Metsü proker ka pei metsü proki ao, aser pai metsü prokdang, metsü kar lenmang tezü nung tsük, aser aji tetsüng agi ajemshi aser anüng ozütem arua aji chima. 6Aser metsü kar lungya nung tsük, aser tzü tayi peria mali nung aji meia aindang aruzüka oadok. 7Aser metsü kar ai rongnung tsük aser ibaji ai den ina aji moksepadok. 8Aser metsü kar ali tajung nung tsük, aji ina atu aser noklang bena tejang atang.” Item o jembidang pai ayimtena ashi. “Nenok rongnung shiba tenarong aten, pai angang.”

O-entepba Nükjidong

(Mat. 13.10-17; Mar. 4.10-12)

9Aser kodang telok tulu ka külemi sentep aser yimti aika nungi nisungtem pa dangi aru, pai parnok den o-entepba ka ajanga jembi. 10#Isa. 6.9 Pai ashi. “Tsüngrem Yimli miim otem metettsü nenok nem agüja lir, saka tangartem asoshibo o-entepba ajanga agütsür, oda nguaka parnoki majitettsü aser angashiaka parnoki mangatettsü.

Metsü Proker O-entepba Rateta Ashir

(Mat. 13.18-23; Mar. 4.13-20)

11“Tang o-entepba tetezüji ya lir, Metsüji Tsüngrem o lir. 12Lenmang tezü nung tsükbaji o angashirtem lir, idangji parnok mangmangdaktsütsü aser mezümekümdaktsütsü asoshi mojingi arua parnok mulung nungi oji bener aor.

13“Aser lungya nung tsükbatemji, shirnoki oji angashir pela agizüker, saka tera mali nung piga dang amanger aser tatitang mapang nung tsüker. 14Aser ai rongnung tsükbatemji shirnoki oji angashir, saka parnok taküm lenmang nung aodang shisabuluba, rongsen aser iba shi taküm tepela agi moksepadoker, aser parnoki süngjang junga matanger. 15Aser ali tajung nung tsükbatemji shirnok temulungjang tajung aser ochi nung lir parnoki oji angashir aji akanga amet aser taremzük nung süngjang tajung atanger.

Molok Telung Nung Milen

(Mar. 4.21-25)

16Shingaia milen tsükloker molok agi nembanga mayur, mesüra yipten tugu nung mayur; saka kidangi arurtemi tesangwa angutsü asoshi milen atalokba dong nung ataloka ayur. 17#Mat. 10.26; Luk. 12.2 Kechiaser jungkai madoktsüsa kecha miima mali, mesüra memetettsüsa aser sangwadaki marutsüsa kecha miima mali. 18Anungji nenoki kechi angashir ya junga shisadangang, kechiaser shibasa aka pa nem ano tali agütsütsü aser shiba maka pa kechi kar ta bilemer ajia pa nungi bener aotsü.”#Mat. 25.29; Luk. 19.26

Yisu Tetsü aser Adianutem

(Mat. 12.46-50; Mar. 3.31-35)

19Idangji pa tetsü aser tenu nunger pa dangi aru, saka telok aliba agi parnoki pa majurutet. 20Aser pa dang ya ashi, “Netsü aser ne adianutem ne den ajurutepnüa kimalen noktaka lir.” 21Saka pai parnok dang ashi, “Shirnoki Tsüngrem o angashir inyakdir, parnokji kütsü aser kü adianutem lir.”

Tzüsem Süngjemdaktsüba

(Mat. 8.23-27; Mar. 4.35-41)

22Kenü anogo pa pei nütsüngtem den rong kati ai, aser pai parnok dang ashi, “Asenoki awatsüng ajanga külen jagi odi.” Anungji parnoki apusoa ao. 23Saka parnok taodang pa mejangadok. Aser awatsüng nungji yipru mopung adok, aser parnok rong tzü nung angema lendong nung liasü. 24Idangji parnoki pa dangi arua pa mesoa ashi, “Tesayur, tesayur, asenok tesamar.” Aser pa shishia mopung aser tzüsem tesashiji arütsü, aser aji anen aser tesüngjem tulu liasü. 25Idangji pai parnok dang ashi “Nenok tamang kong ali?” Aser parnoki tsübuadok aser süngmangseta kati ka dang ashi, “Ajangla mopung aser tzüsem natia tashi angatsüba iba nisung ya shiba?”

Gerasin Nung Temenen Tanelai Apuba Nisung Ka Anebtsüba

(Mat. 8.28-34; Mar. 5.1-20)

26Idangji Galil linük den indangtepa aliba Gerasin #8.26: Gerasin: Lai kar nungbo Gadara ta lir. linükji parnoki atong. 27Aser kodang pa tzükümi adok, temenen tanelatem aketba nisung ka yimti nungjagi arua pa den ajurutep; shiba mapang talangka sü mabeni aser kidang meli-i leprungkitem nung liasü. 28Pai kodang Yisu angu, pai ayimtena Yisu tsüngdang apudak aser ola tulu adoka ashi, “Yisu, Tematiba Tsüngrem Chir kü den inyaktsü na kechi aka? Ni tekangshi ta ni ajang ajanga ne dang mepishir.” 29Kechiaser temenen tanelaji nisungba dak nungjagi adoktsü pai ozüng agütsü. Kechiaser aiben dang yagi pa apu aser merangsen agi alena tanüker kübok yua liasü. Aji saka talenbaji raktanger temenen tanelai pa aremi aridok. 30Aser Yisui pa dang asüngdang, “Ne tenüng shiba?” Aser pai langzü, “Aika” kechiaser temenen tanela jenti pa daki ia liasü. 31Aser bonglang makaba ongkeni parnok teyok ta parnoki pa dang mepishi.

32Idakji ak lokti tulu ka tokong nungji chiyima liasü, anungji parnok daki idakjang ta parnoki pa dang mepishi. Anungji pai parnok odaktsü. 33Idangyongjisa nisungba dak nungi temenen tanelatemji adok aser aktem daki ai aser ak telokji lungbangi asema lua awatsüngi ai aser arakset. 34Aser kodang ak pokyimertemi kechi atalok aji angu, parnok ajen aser yimti aser linük nung aji ashi. 35Idangji kechi atalok aji reprangtsü parnok ao, aser parnoki Yisu dangi aru, aser shiba nungi temenen tanelatem oadok iba nisungji sü abener nüji küma Yisu tsüngdang mena angu aser parnoki tsübu. 36Aser aji angurtemi temenen tanelatemi apuba nisungji koda aneb aji ashi. 37Aser Gerasin temeket nung aliba purtem ajaki parnok nungi pilatsü pa dang mepishi, kechiaser parnok tetsübu agi asüng; anungji pa rong kati ai aser meyipa ao. 38Saka shiba dak nungi temenen tanelatem adok iba nisung Yisu den alitsü pa dang mepishi, saka Yisui pa yoka ashi, 39“Ner kidangi meyipa oang, aser na asoshi Tsüngremi mapa tulu koda inyak aji sangokjang.” Yamaji oa yimti nungji Yisui pa asoshi kodaka inyak aji sangoktsü.

Jaira Jala aser Tetsür Shibai Yisu Sü Nung Kongshi

(Mat. 9.18-26; Mar. 5.21-43)

40Kodang Yisu awatsüng külenji meyipa shilang, telokti-i pa pelaseta agizük, kechiaser parnok ajak pa ata-a liasü. 41Aser ajiang, nisung ka tenüng agi Yaira aru, shiba sinagog nung lenir ka liasü; pai Yisu tsüngdang apudaka par kidangi arung ta mepishi, 42kechiaser par jala ka dang, küm terana tain aser la tasütsüsa shiranga liasü.

43Aser pa aodang telokti-i pa nungbang, aser küm terana azü ayimba tetsür ka shibai mozü shitetertem nem taa agütsütsü asoshi la akaba ajak endok, saka shingaia la manebtsütet; 44iba tetsürji pa sülen aru aser pa sütsüng nung kongshi, aser idangyongji la azü ayimba anen. 45Idangji Yisui ashi, “Shibai kü dak kongshi?” Kodang ajaki menangzük, Peteri ashi, “Tesayur, telokti-i na meketbanga anunger.” 46Saka Yisui ashi, “Nisung kati kü dak kongshiogo, kechiaser kü dak nungi ain tuguogo ta ni metet.” 47Aser kodang tetsürlai oda aji miima meyutet ta metet, lai atentena aru, aser Yisu tsüngdang apudaka nisung ajak madang lai kechi asoshi pa dak kongshi aser idangyongjisa la koda anebadok aji ashi. 48Aser Yisui la dang ashi, “Tenü, ne tamang agi na anebogo; tesünep nung oang.” 49Ano pa jembia alidang, nisung ka sinagog nung lenir kidang nungi aru aser ashi, “Ner jala süogo, joko Tesayur timtetemdaktsü.” 50Saka Yisui ya angashia pa dang ashi. “Tetsübu, tamang dang amangang, aser la junga akümtsü.”

51Aser kodang pa kidang jagi aru, Peter, Yohan, Yakob aser aiürla tebu o tetsü-na, parnok dak alema nisung shinga pa den aitdaktsütsü memela. 52Aser aikati la asoshi mangyima jeba liasü; saka Yisui ashi, “Tejeb, kechiyong la tasü masü saka mejanger dang.” 53Aser parnoki laji tasüa ta meteta pa atala-a menütsü. 54Saka pai la teka nung amer ja-a ashi, “Tenü, shishiang.” 55Idangji la taküm meyipa aru aser la sakadok, aser la nem langka tachitsü agüjang ta pai ashi. 56Aser la tsüraburi süngmang saka iba inyakba indang shinga danga teshi ta parnok dang pai ashi.

Currently Selected:

LUK 8: AONAGABSI

Highlight

Copy