LUK 9

Tenyar Terana Mapa

(Mat. 10.5-15; Mar. 6.7-13)

1Aser pai teranaji külemi jatep aser tashitaktem anebtsütsü aser temenen tanelatem ajak aridoktsü parnok nem tashi-ain agütsü. 2Aser Tsüngrem Yimli sayutsüngitsü aser shirangertem anebtsütsü pai parnok yok. 3Aser pai parnok dang ashi, “Nenok lenmang asoshi mechi mesüra yangku, mesüra amtsük mesüra sen, mesüra semoksü talila ka danga teben. 4Aser koba kidangisa nenok idir, iba yimtiji metoktsü tashi idakji liang, aser ang nungjagi pila-a oang. 5Aser kongsa parnoki nenok magizüklir, kodang iba yimti nungi nenok pila-a odir, parnok anema kuli asütsü asoshi nenok tetsüng nungi auyi temdokang.” 6Aser parnoki pila, aser parnoki anebja aser Osangtajung sayutsüngia yimtem semjema ao.

Herodi Atitakba

(Mat. 14.1-12; Mar. 6.14-29)

7Tang Herod Galil nung yimsüsüsangi ya inyakba mapa ajak indangji angashi aser pa kanga atitaka aküm, kechiaser Yohan tasü nungi shia aruogo ta kari jembia liasü. 8Aser kari Elija jungkai adoka lir ta ashi, ano tangar kari tejen ainketertem rongnungi ka shia arua lir ta ashi. 9Aser Herodi ashi, “Yohan kolak ni atang, saka ano ya shiba indang ni angashir?” Aser pai pa ngunüa bushi.

Meyi Pungu Chiyungdaktsüba

(Mat. 14.13-21; Mar. 6.30-44; Yoh. 6.1-14)

10Aser tenyartemji arua parnoki kechi inyak aji pa dang ashi. Aser pai parnok anir pila aser yimti ka tenüng agi Bethsaidai ao. 11Saka kodang telokti-i ya angazük, parnoki pa sülen anitak, aser pai parnok agizüka parnok dang Tsüngrem yimli indang jembi aser tanebtsü nüngdaka alirtem pai anebtsü. 12Nikongtsütsü akümdang teranaji pa dangi arua ashi, “Temeket yimtem aser linüki oa chiyungtsü alitsü aser ayiptsü asoshi telokti yokadokang, kechiaser parnok yangi azüngmeyakdak tesem ka nung lir.” 13Saka pai parnok dang ashi “Parnok nem langka tachitsü nenoki agüjangma.” Saka parnoki langzü, “Onoki oa item nisung ajak asoshi chiyungtsü malira, amtsük pungu aser ango ana dak alema onok kecha maka.” 14Kechiaser parnok tebur danga meyi pungu shi liasü. Aser pai pei nütsüngtem dang ashi, “Parnok tenem-nem shi telok telok mendakjangma.” 15Aser parnoki aji oda inyak aser parnok ajak mendaktsü. 16Aser amtsük pungu aser ango anaji amer anünglen shia ajir pai itemji moatsü aser sangsa, aser telok nem anganüa agütsütsü asoshi nütsüngtem nem agütsü. 17Aser parnoki achi aser tepok asüng, aser tanüngba molok terana sünga benden.

Yisu Indang Peteri Nangzükba

(Mat. 16.13-19; Mar. 8.27-29)

18Kodang pa kisüng sarasadema liasü pa nütsüngtem pa den liasü, aser pai parnok dang asüngdang, “Nisungtemi ni shiba ta ashir?” 19Aser parnoki langzü, “Yohan Baptitsüba ta,” aser kari ashir, “Elija”; aser ano tangar kari “Tejen ainkartem” ka shia arua lir ta ashir. 20#Yoh. 6.68,69Aser pai parnok dang ashi, “Saka nenokia ni shiba a ta ashir?” Idangji Peteri langzü, “Tsüngrem meyong Khrista.”

Yisui Pa Asütsü Aser Shia Arutsü Indang Shinba

(Mat. 16.20-28; Mar. 8.30—9.1)

21Saka ya shinga danga teshi ta pai parnok dang ajang ajanga ozüng agütsü aser ashi, 22“Nisung Chir kanga tuo-ashitsüla aser tamburtemi, tamarenba putirtemi aser tezülurtemi pa mezüngmeshitsü aser tepsettsü aser asemnübuba nung shia arutsü.” 23Aser pai parnok dang ashi, “Kari kü sülen arunüra, pai pei sasa tesükshima aser pei kangki anogoshi apur kü sülen anitakang. 24Kechiaser shibai pei taküm kümzüknüdir aji samatsü, aser shibai ni atema taküm samadir iba nisungji kümzüktsü. 25Kechiaser nisung kati alima ajonga ajangzüker pei taküm samara mesüra madokra pai kechi ajangzüktsü? 26Kechiaser shibai ni aser kü otem asoshi nüma metanglir, Nisung Chir-ia kodang pei sentsüwangshi nung, Tebu aser temeshi kotak tenyartem den sentsüwangshi nung arudir, idangji pa asoshi nüma matangtsü. 27Saka atangji ni nenok dang shidi, idaki noktaka alir rongnung kari Tsüngrem Yimli mangu tashi tasüba majurutsü.”

Yisu Sentsü Melenba

(Mat. 17.1-8; Mar. 9.2-8)

28Item o jembir anogo ti shi lir külen pai Peter, Yohan aser Yakob pa den anir sarasademtsü tenemi atu. 29Aser pa sarasadem dang, pa tejak tereprangtsü melenadok, aser pa süoshi sentsüpranga mesüng mesünga aküm. 30Aser ajiang, nisung ana, Mosa aser Elija pa den jembia liasü. 31Parnoki sentsüwangshi nung jungkai adoka, tatsüka lir pa Yirusalem nung asüba ajanga Tsüngremer nükjidong ataloktsütsü indang jembi. 32Tang Peter aser pa den alirtem kanga anünüa liasü, saka kodang parnoki saksalema aküm parnoki pa sentsüwangshi aser pa den noktakba nisung anaji angu. 33Mosa aser Elija pa toktsür pila aodang Peteri Yisu dang ashi, “Tesayur, asenok yangi alitsü junger. Asenoki semtu asem yangludi; na asoshi ka, Mosa asoshi ka, aser Elija asoshi ka.” Saka pai kechi jembir aji memetet. 34Saka pai ya jembia alidang mepet ka arua parnok akhümbang, aser parnok mepet tiyongi aidang parnok tsübuadok. 35Aser mepet nungjagi ola ka adoka ashi. “Ibai kü chir kü teshimtetba, pa dang angang.” 36Aser kodang o jembiba olaji anenadok, Yisu kisüng dang angu. Aser parnoki ola madoki liasü aser parnoki kechi angu iba anogo nungji shinga danga mashi.

Temenen Tanelai Apuba Tanur Ka Anebtsüba

(Mat. 17.14-18; Mar. 9.14-27)

37Aser tanünüji parnok kodang tenem nungi alu, telok tulu kati pa ajuru. 38Aser ajiang, telok nungjagi nisung kati ayimten, “Tesayur, kü chir ajidangtsü ni ne dang kanga mepishir, kechiaser ozü chir pa dang lir; 39aser ajiang, temenen tanela kati pa apur aser pai aoksa ayimtener, iba jagi paji poja adoka mekümdaktsü tashi ateptendaktsür aser pa ajensatsür aser pa dak nungi kodanga maor.” 40Aser ni ne nütsüngtem dang ibai aridokjang ta mepishi, saka parnoki makok. 41Aser Yisui langzü, “Oh tamang makaba aser mashi jajaba putu, ni nenok den kopiga alitsü aser nenok dang aremzüktsü?” 42Aser pa aruya alidang, temenen tanelai pa alangdakja pa ateptendaktsü. Saka Yisui temenen tanelaji arütsü, aser tanurji anebdaktsür tebu nem meyipa agütsü. 43Aser Tsüngremer tamaren tashi ngua parnok ajaki süngmang.

Yisui Pa Asütsü Indang Tanaben Shinba

(Mat. 17.22-23; Mar. 9.30-32)

44Saka pai inyakba ajak indangji parnok ajaki süngmanga alidang, pai pei nütsüngtem dang ashi, “Item O nenok narongi idakjang kechiaser Nisung Chir nisungtem ket nung bendanga agütsütsü.” 45Saka parnoki iba oji mangatet, parnoki aji mangatettsüsa parnok nungi aji miimbanga liasü, aser iba o indang parnoki pa dang asüngdangtsü tsübu.

Shiba Tulutiba?

(Mat. 18.1-5; Mar. 9.33-37)

46Aser shiba tulutiba ta parnok rongnung toktepa jembitep. 47Saka kodang parnok mulung nung bilembaji Yisui metet, pai tanur chanu ka anir arua pa anasa noktakdaktsü. 48#Mat. 10.40; Luk. 10.16; Yoh. 13.20 Aser pai parnok dang ashi, “Kü nüng atema shibai ibala tanur chanu agizükdir, pai ni agizüker, aser shibai ni agizüker pai ni tenyasangjia agizüker, kechiaser shiba nenok ajak rongnung tilatiba lir paji tulutiba lir.”

Shibai Na Manemer Paji Ne Tsütsü lir

(Mar. 9.38-40)

49Aser Yohani langzü, “Tesayur, nisung kati ne tenüng nung temenen tanelatem aridokba onoki angu, aser onoki pa nemtem, kechiaser paji asenok telok rongnung maten.” 50Saka Yisui pa dang ashi, “Pa tenemtem, kechiaser shiba nenok anemer masü pa nenok tsütsü lir.”

Samaria Yim Kati Yisu Magizükba

51Kodang Yisu anir atutsü anogotem anasa ait, pai Yirusalemi aotsü mulungteta pa jak ilenji meyip. 52Aser pai pa jakdang osang abenertem yok aser parnoki pa asoshi renemtsü Samaria nunger yim kati ai. 53Saka pai Yirusalemi aotsü pa tejak meyip nung parnoki pa magizük. 54Kodang pa nütsüngtem Yakob aser Yohani ya angu parnoki ashi, “Kibuba, parnok rongtoktsütsü asoshi onoki kotak nungi mi aludaktsütsü nai onok nem inyakdaktsünür asü? 55Saka pai meyiper parnok ang arütsü. 56Aser parnoki yim tanga kati ao.

Yisu Sülen Anitaktsüpurtem

(Mat. 8.19-22)

57Aser parnok lenmang nung oya alidang nisung kati pa dang ayimtena ashi, “Na kolenisa odir, ni ne sülen anitaktsü.” 58Aser Yisui pa dang langzü, “Shirongtem lungki kar, aser anüng ozütem tesep kar, saka Nisung Chir tekolak atalokdak maka.” 59Aser ano tangar ka dang pai ashi, “Kü sülen anitakang.” Saka pai ashi, “Kibuba, ni tama or kübu aremtsü mela-angma.” 60Saka pai pa dang ashi. “Tasürtemi parnok tasürtem aremtsü tokjang, saka nabo oa Tsüngrem Yimli Osangtajung jungkai adokba sayuang.” 61Aser tangar katia pa dang ashi, “Ni ne sülen anitaktsü, Kibuba, saka tamasa kü kinungertem dang tepila o ashitsü mela-ang.” 62Yisui pa dang ashi, “Shibaisa pei ket alu alaba nung soter tesülen shia repranger pa Tsüngrem Yimli asoshi metemsü.”

Currently Selected:

LUK 9: AONAGABSI

Highlight

Copy