LUK 6
6
Amungnü Tsükjong Mitba
(Mat. 12.1-8; Mar. 2.23-28)
1Amungnü pa alu ajanga oya liasü, aser pa nütsüngtemi tsükjong metsükzüka parnok teka nung aji menoka achitsü tenzük. 2Saka Farisitem rongnung kari ashi, “Amungnü kechi inyaktsü tim masü aji kechiba nenoki inyaker?” 3Yisui parnok dang langzü, “Dawid aser pa den alirtem kodang ya-a liasü, pai kechi inyak, 4koda pai Tsüngrem kidangi ai, aser Tsüngrem madang ayuba amtsük koba putirtem dak alaka shingaia achitsü makok, aji agiteta achi aser pa den alirtem nema agütsü aji nenoki mezüngdangka ma?” 5Aser pai parnok dang ashi, “Nisung Chirji amungnü Kibuba lir.”
Teka Ashirepba Nisung Ka
(Mat. 12.9-14; Mar. 3.1-6)
6Ano tanga Amungnü ka nung pai sinagogi ai aser sayutsü tenzük; aser teka ashirepba nisung ka idakji liasü. 7Tezülurtem aser Farisitemi pai amungnü anebtsüdisü manebtsülir ta pa tai aputsü mita ata. 8Saka pai parnok tebilemba metet, aser teka ashirepba nisung dangji ashi, “Aramesoang, aser tiyong nungji noktakang.” Aser pai arameso aser idakji noktak. 9Yisui parnok dang ashi, “Ni nenok dang asüngdangdi, Amungnü tajung inyaktsü tim asü, tamajung inyaktsü tim; taküm kümzüktsü asü samadaktsütsü?” 10Aser pai parnok ajak dak meketa reprang, aser pa dang ashi,#6.10: Lashiba kar nungbo “jashia ashi” ta angutsü. “Ne teka songtokang.” Aser pai yamaji inyak, aser pa teka anebadok. 11Saka parnok mit adoka, parnoki Yisu dak kechi inyaktsü kati ka den bangjemtep.
Terana Shimba
(Mat. 10.1-4; Mar. 3.13-19)
12Item anogo nungji pai tenemi sarasademtsü atu; aser ammang tepiyong pai Tsüngrem dang sarasadema liasü. 13Aser anüngdang akümdang pai pei nütsüngtem pa dangi aja, aser parnok rongnungi terana shimtet shir dang pai tenyartem ta tenüng agütsü: 14Simon shiba dang pai Peter ta aja, aser pa tenu Andria, Yakob aser Yohan, Filip aser Bartholoma, 15Mathi, aser Toma, aser Alfa chir Yakob, Simon shiba dang Zealot ta aja, 16aser Yakob chir Yihuda, Yihuda Iskariot, shiba tashioktsür ka aküm.
Yisui Telok Tulu Ka Tenzükba
(Mat. 4.23-25)
17Pai parnok den külemi alua lenten ka nung noktak. Nütsüngtem telok tulu ka, aser nisungtem aika Yihuda lima aser Yirusalem nungi aser Tair o Sidon tzüküm nungi pa o angatsü aser parnok tashitak anebdaktsütsü asoshi pa dangi aru; 18aser shirnok temenen tanelatemi kangshibatem liasü parnokji anebdaktsü. 19Aser telokti ajaki pa dak kongshitsü bushia liasü, kechiaser pa dak nungi ain adoka parnok ajak anebtsü.
Tepelatsü aser Tejashitsü
(Mat. 5.1-12)
20Pai pei nütsüngtem dak tenük ranglok aser repranga ashi,
“Nenok sensakertem tepelatsü,
kechiaser Tsüngrem Yimli nenok meyong.
21Nenok tang yaseta alirtem tepelatsü,
kechiaser nenok tip atemtsü.
Nenok tang ajebertem tepelatsü,
kechiaser nenok menüa alitsü.
22“Kodang Nisung Chir atema nisungi nenok sempadir, aser kodang parnoki parnok nungi nenok piladaktsüdir, aser nenok atala-a arütsüdir, aser nenok tenüng tamajung ama endokdir, nenok tepelatsü. 23#2 Pu. 36.16; TMa. 7.52 Iba anogo nungji pela-ang aser tepela agi pungtenang, kechiaser ajiang, kotak nung nenok sempet lir, kechiaser par tetsü-teboutemi ainkartem dang yamaji inyak.
24Saka nenok takartem aiatai,
kechiaser nenoki nenok tesünep nguogo.
25Nenok tang peria akabatem aiatai, kechiaser nenok yaseta alitsü.
Nenok tang menüa alirtem aiatai,
kechiaser nenoki mang ayimtsü aser ajebtsü.
26“Kodang nisung ajaki nenok sanga jembidir aiatai, kechiaser yamaji par tetsü-teboutemi tiyazü ainkartem dang benshi.
Tsükchirtem Meimtsü Indang
(Mat. 5.38-48; 7.12a)
27“Saka nenok kü o angartem nenok dang ni shidi, nenok tsükchirtem dang meimang; nenok sempartem dang tajung benshiang. 28Nenok atakatemertem dang moajang, nenok mezüngmeshirtem asoshi sarasademjang. 29Kari tenibong külen mara, ano tip külenjia meyipjang aser kari ne sü agizükra, pa nem ne süpoksüa agidakjang. 30Ne dang meshir shia nem agüjang aser shibai ne rongsen rakzüker aor pa nungi meyipa temeshima. 31#Mat. 7.12 Aser nisungtemi nenok dang kechi koda inyakdaktsünür, yamaji nenoki parnok dang inyakang.
32Nenok meimertem dang nenoki meimra nenoki kechi nüngsang angutsü? Kechiaser temenenpurtemia parnok meimertem dang meimer. 33Aser shiri nenok dang tajung inyaker, nenoki parnok dang dang tajung inyakra, nenoki kechi nüngsang angutsü? 34Aser shir nungi nenoki tanaben meyipa angutsü imlar, parnok nem aputsüra, nenoki kechi nüngsang angutsü? Tanaben kasaji meyipa angutsü asoshi temenenpurtemia temenenpurtem nem aputsür. 35Saka nenok tsükchirtem meimang, parnok dang tajung inyakang aser meyipa angutsü meimlai apujang; aser nenok tajangzük tulu alitsü. Aser nenok Tematiba Chirtem akümtsü kechiaser tenüngsang magütsür rogo aser tamajung nisung tsütsü pa temeim lir. 36Kechi koda nenok Tebu yimlibilem lir, yamaji nenoka yimlibilem liang.
Tangar O Bendangba
(Mat. 7.1-5)
37“Nenoki o tebendang, aser nenok o mebendangtsü; nenoki taitsü, aser nenok maitsütsü; tai tokang, aser nenok danga tai atoktsü. 38Agüjang, aser nenok nem agütsütsü, nenok nem tatakzük dang tali nemshia, moshia, ataker agütsütsü kechiaser kechi touzük agi nenoki ozüktsüdir, aji nenok nem meyipa ozüktsütsü.
39Aser pai ano parnok dang o entepba ka ashi, “Nükpokeri nükpoker len anitsü koker ma? Tenaprongla kangla nungji masongli ma? 40Tesayur dang nungi nütsüng temaba masü, saka nütsüng shia kodang peria kümdir, pei tesayur ama alitsü. 41Aser nai pei tenük nung anak tilaka ia aliba mungui, ne adianu tenük nung anak aliba ajir? 42Mesüra nai ne tenük nung aliba anak ne sasa mangu sür ne adianu dang ne tenük nung aliba anakji endoktsüdi ta shitettsü? Anemsübatem, ne tenük nungi anakji mezüng endokang aserbo nai ne adianu tenük nung aliba anakji jungjunga angutsü.
Süngdong Kaji Pei Süngjang Agi Meteter
(Mat. 12.33-35)
43“Kechiaser süngdong tajung nung süngjang tamajung matanger, mesüra ano süngdong tamajung nung süngjang tajung matanger. 44Kechiaser süngdong shiaji pei süngjang agi meteter. Kechiaser ayidong nungi nisungi mungu maonger, mesüra korishidong nungi parnoki tsükmenatzü jang maonger. 45#Mat. 12.34 Nisung tajungi pei mulungjang nung tajung rizünga aliba nungi tajung agiteter; aser nisung tamajungi pei mulungjang tamajung nung rizünga aliba nungi tamajung agiteter, kechiaser kechi agi temulungjang sünga alir aji pei tebangi jembir.
Teyangerdak Kimung Ana
(Mat. 7.24-27)
46“Aser kechiba nenoki kü dang Kibuba, Kibuba, ta ajar, saka ni ashiba meinyaker? 47Shibaisa kü dangi arur aser kü otem angar aser itemji inyaker aji ni nenok dang sayudi. 48Pa lung manung tazüngdak tarok toa ki yangluba nisung mesüker; aser kodang tzümetsüng adok, iba tzü jagi ki dak nungshitsü saka marakzüi ali, kechiaser ibaji jungjunga yanglua liasü 49Saka shibai angashir aser meinyaker, paji tazüngdak tajung ka merenemi mashi-i ali tesem ka nung ki yangluba nisung mesüker, aser iba ki dakji tzümetsüng agi nungshitsü, idangyongji khenyongi iba kiji laoadoker aser iba ki raksabaji tulu liasü.”
Currently Selected:
LUK 6: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
