LUK 5

Mezüng Nütsüngtem Ajaba

(Mat. 4.18-22; Mar. 1.16-20)

1Telokti-i Tsüngrem o angatsü asoshi pa dak kongshia nungtepa arudang, pa Gennesaret awatsüng anasa noktaka liasü. 2Aser awatsüng anasa pai rong ana angu; aser angopurtem item nungi adoker parnok zütsük shidokya liasü. 3Aser rong ka koba Simon meyong liasü, ajagi pa ai aser tzüküm nungi tatsüka aitsü asüngdang; aser pai idakji amen aser rong nungi telok dang sayutsüngi. 4Kodang pai jembitem, pai Simon dang ashi, “Tzü taroki rongji aniang, aser ango aputsü nenok zütsük telungleni onang.” 5Aser Simoni langzü, “Kibuba, ammang tepiyong onoki zütsük ona liasü aser kecha mangu; saka nai ashiba ama ni zütsük ondi.” 6Aser kodang parnoki aji inyak, ango jenti dang ambang, aser parnok zütsük shisaya liasü. 7Parnoki tanga rong nungi senteper arua yaritsü teka agi ayip. Aser parnoki aru, aser rong anapronglaji ango agi asüng, aser rongji tzülungi aitsü tenzük. 8Kodang Simon Peteri ya angu, pai Yisu tsüngdang apudak, aser ashi, “Kü madang nungi oang, Kibuba, kechiaser ni temenen nisung lir.” 9Kechiaser ango jenti apuba agi pa aser pa den alirtem ajak süngmang. 10Ano Zebedee chirtem Yakob aser Yohan, shir Simon den tesemtepertem liasü, parnoka süngmangadok. Aser Yisui Simon dang ashi, “Tetsübuma; tang nungi nai nisung aputsü.” 11Aser kodang parnok rongtemji tzüküm tonga atsür adok, parnoki kechisarena ajak toktsü aser pa sülen anitak.

Yisui Zütsüra Aketer Ka Anebtsüba

(Mat. 8.1-4; Mar. 1.40-45)

12Pa yimti ka nung alidang, ajiang, zütsüra agi zükbanger nisung ka liasü. Kodang pai Yisu angu, pai pa tejak rembanga apudak, aser pa dang mepishia ashi, “Kibuba, nai mulungra nai ni merükdaktsütet.” 13Yisui pei teka songtok aser pa dak kongshia ashi, “Ni mulunga lir; na meshitetang.” Idangyongji zütsüraji pa dak nungi oadok. 14Aser shinga danga kecha teshi ta pai pa dang ashi, “Saka oang, aser ne sasa putir dang sayuang, aser parnok dang kuli asütsü asoshi Mosai melaba ama na meshitetba atema tenla-ang.” 15Saka pa indang osang tali tali dang ayimsünga ao, aser telok jenti pa o angatsü aser parnok tashitak anebdaktsütsü asoshi külemi sentep. 16Saka pai azüngmeyakdaki oa sarasadem.

Togimra agi Shirangba Nisung Ka Anebtsüba

(Mat. 9.1-8; Mar. 2.1-12)

17Kenü anogo pai sayua alidang, Galil aser Yihuda linük yim shia aser Yirusalem nungi Farisitem aser ozüng tesayurtem anasa mena liasü; aser Kibuba tanebtsüba ain pa madak liasü. 18Idangji togimra agi shirangba nisung ka nisungtem jagi yipten ka nung bener arua liasü, aser parnoki paji bener aittsü aser Yisu madang yutsütsü merang. 19Saka telok aliba agi pa bener aittsü makok nung parnoki kilemi atu aser lungru tapok ajanga, oda yipten denji, Yisu alidak tiyong nungji pa ajongzüka yok. 20Parnok tamangji ngua pai nisungba dangji ashi, “Nisung, ne menentem ne dang tokogo.” 21Aser tezülurtem aser Farisitemi asüngdangteptsü tenzük, “Tsüngrem atala-a jembiba ya shiba? Tsüngrem dak alema shibai temenen atoktsü akok?” 22Kodang Yisui parnok asüngdangtepbaji angashi, pai parnok dang langzü, “Nenoki kechiba nenok mulung nung asüngdangteper? 23‘Ne menentem tokogo’ ta ashitsü temelaba asü, mesüra ‘shishiang aser jaja-ang ta ashitsü temelaba?’” 24Saka Nisung Chir dak alima nung temenentem atoktsü ain, lir ta nenoki metettsü asoshi pai togimra agi shirangba dang ashi, “Shishiang, aser ne yipten bena arung, aser ner kidangi oang.” 25Idangyongji parnok madang pai shishi, aser kechi nung pa mejang aji bena aru, aser Tsüngrem tenüng sanga par kidangi ao. 26Aser parnok ajaki süngmang aser Tsüngrem tenüng asang; aser parnok kanga tsübua ashi, “Asenoki tanü tesüngmangtsü mapatem nguogo.”

Yisui Levi Ajaba

(Mat. 9.9-13; Mar. 2.13-14)

27Aser iba sülen pai kimai tugu aser Levi tenüng agi alimelen sarur ka alimelen sarudak mena angu, aser pai pa dang ashi, “Kü sülen arung.” 28Aser pai ajak toktsür arameso aser pa sülen anitak. 29Aser Levi-i par kidang pa asoshi benjong tulu ka yanglu; aser alimelen sarurtem aika aser tangartem parnok den chiyungdak mena liasü. 30Aser Farisitem aser tezülurtemi pa nütsüngtem anema nemnemtepa ashi, “Kechiba alimelen sarurtem aser temenenpurtem den nenoki chiyunga ajemer?” 31Yisui parnok dang langzü, “Anema alirtem asoshi mozü shiteter tenüngdaktsü mali, saka shirangertem asoshi tenüngdaktsü lir. 32Temeshipur masü, saka temenenpurtem temulung meyipdaktsütsü parnok ajatsü ni aru.”

Lumiba Indang Asüngdangba

(Mat. 9.14-17; Mar. 2.18-22)

33Aser parnoki pa dang ashi, “Yohan nütsüngtem aser Farisi nütsüngtemi aiben lumir aser sarasademer, saka ne nütsüngtemi chiyunga ajemer.” 34Yisui parnok dang ashi, “Kiyimsang parnok den alidang, ki ayimdak aliba tembartem nenoki lumidaktsütsü asü? 35Saka anogotem tonga arutsü, kodang kiyimsang parnok nungi anir aotsü, idangji parnoki lumitsü.” 36Pai parnok dang o-entepba ka ashi, “Shingaia süoshi tasen nungi shizüker, süoshi tejen nung mateploker; pai yamaji inyakra, süoshi tasenji shisatsü, aser tasenba nungi shizükbaji tejenba denji meputeptsü. 37Aser shingaia shiküp juli tejen nung yi tasen meshioker; pai yamaji inyakra, yi tasen jagi shiküp juliji raksatsü. 38Saka yi tasen shiküp juli tasen nung enoktsüla, 39Aser shingaia yi tejen jemer külen tasenji mejemnür, kechiaser pai ashir, ‘Tejenji tajungba.’ ”

Currently Selected:

LUK 5: AONAGABSI

Highlight

Copy