LUK 4

Yisu Atitangba

(Mat. 4.1-11; Mar. 1.12-13)

1Yisu Tanela Temeshi agi sünga Yordan nungi meyip. Aser Tanela agi anishia arem nung lirnü Mojingi atitanga liasü. 2Item anogo nungji pai kecha machi, aser kodang aji atem, pa ya-a liasü. 3Idangji mojingi pa dang ashi, “Na Tsüngrem Chir süra, iba lung yagi am kümang ta shiang.” 4Yisui pa dang langzü, “Ya zülua lir, nisungi am tesa agi taküm melitet.” 5Aser mojingi pa anir tua alima yimtitem ajak tenük masepshi nung pai Yisu dang sayu. 6Aser mojingi ashi, “Ni ne nem item yimti sentsüwangshi aser bangdak ajak agütsüdi; kechiaser ya kü nem agütsüogo, aser shiba nemsa ni agütsünüdir ya ni agütsütsü. 7Anungji nai ni külemang, aser item ajak ne meyong asütsü” 8Idangji Yisui pa dang langzü, “Ya zülua lir, nai Kibuba ne Tsüngrem külemang, aser pa kija dang nai tenzükang.” 9Aser ano mojingi pa Yirusalemi anir atu, aser tenla ki kilem kolak nung pa mendaktsü, aser pa dang ashi, “Na Tsüngrem Chir süra, ne sasa yangnungi pungzükang. 10Kechiaser ya zülua lir, ‘Pai pei tenyartem na yaritsü yoktsü, 11aser ne tsüng lung manung matsüktsü asoshi parnoki na parnok kabu nung ajungzüktsü.’ ” 12Idangji Yisui pa dang langzü, “Ya shia lir, nai Kibuba ne Tsüngrem tatitang.” 13Aser mojingi tatitang ajakji temer külen mapang tajung ka madok tashi pa nungi kenpiga asoshi pila-a ao.

Galil Nung Yisui Pa Mapa Tenzükba

(Mat. 4.12-17; Mar. 1.14-15)

14Aser Tanela ain nung Yisu Galili meyipa shilang, aser pa indang osangji linük temeket ajakleni ao. 15Yisui parnok sinagogtem nung sayu aser ajaki pa asang.

Nazaret Nung Yisu Magizükba

(Mat. 13.53-58; Mar. 6.16)

16Aser pa kodang nübu ajung, pa yintetdak yim Nazareti aru, aser pa yimsü amato pai amungnü sinagogi ai aser pai Lai azüngtsü noktak. 17Pa nem Isaia ainkar kaket agütsü aser kaketji lapokdang kechi nung yamai zülua liasü angu,

18“Kibuba Tanela kü dak lir,

kechiaser sensaker dang osangtajung sayutsüngitsü pai ni mezüja shimtet.

Puoka alirtem dang techiokba sangoktsütsü,

nükpokertem tenük lapoktsütsü,

Ajemrepba nisung nüji küma yoktsü.

19Kibubai agizüktsüba küm sangoktsütsü asoshi pai ni yok.

20Pai kaketji nempanger tenzüker nem meyipa agütsür amen aser sinagog nung alir ajaki pa dak tenük ranglok. 21Idangji pai parnok dang ashitsü tenzük, “Tanü iba Lai nenok narong nung atalokogo.” 22Aser ajaki pa indang tajung jembia aser pa tebang nungi adokba taochi otem nungji parnoki süngmang; aser parnoki ashi, “Ibai Yosef chirto masü no?” 23Aser pai parnok dang ashi, “Atangji nenoki iba shin o kü dang ashitsü, Tanebtsür, ne sasa anebjang, kechisa nai Kapernaum nung inyakba indang onoki angashi, aji yangi pei lima nunga inyakang.” 24Aser pai ashi, “Ni nenok dang shitak shidi, ainkar shinga pei lima nung magizüker. 25Saka atangji ni nenok dang ashir, Elija anogo nung Israel nung kodang küm asem ser ita trok anüng shibanga liasü, aser kodang alima ajak nung ayawara tulu adok amitsür jenti liasü. 26Aser Elija parnok rongnung shinga dangia meyok, saka Sidon linük nung Zarefta amitsür ka dangi ang yok. 27Aser ainkar Elisha mapang nung zütsüra aketer nisung aika Israel nung liasü, saka Siria nunger Naman dak alaka parnok shinga memeshitok.” 28Kodang sinagog nung alirtemi ibai angashi, parnok ajak terasaba agi asüng. 29Aser parnoki aramesoa pa yimti nungi aridok, aser koba tokong nung parnok yimti yanglua liasü. Nüngkümbangi pa tekolak langkoshishi sür merepzüka yoktsü anir ao. 30Saka parnok tetsüngdai pa jenteta ao.

Temenen Tanelai Apuba Nisung Ka

(Mar. 1.21-28)

31Aser pai Galil nung yimti ka Kapernaumi alu, aser amungnü pai parnok dang sayua liasü. 32Parnoki pai sayuba nung süngmang, kechiaser pa tesayuba bangdakji tashi keta liasü. 33Aser sinagog nungji temenen tanelai apuba nisung ka liasü, aser pai ola tulu agi ayimten, 34“Hai, na onok den inyaktsü kechi aka, Nazaret nunger Yisu? Na onok samatsütsü aru asü? Na shiba-ar ni meteta lir, Na Tsüngrem meyong Temeshisang.” 35Yisui pa dak metenokja ashi, “Mokorai liang, aser pa nungi adokang!” Aser kodang tanela jagi pa tiyong nung laodaktsü, pai pa dak tamajung kecha meinyaki pa dak nungi temai adok. 36Parnok ajak süngmanga kati ka dang ashi, “Ya kechi o? Kechi ain aser tashi agi pai temenen tanelatem dang ozüng agütsür, aser parnok oadoker?” 37Aser pa indang jembiba temeket linük ajakleni sangdonga ao.

Yisui Nisung Aika Anebtsüba

(Mat. 8.14-17; Mar. 1.29-34)

38Pai sinagog toktsü aser Simoner kidangi ait. Simon tebutsü tetsü ramen agi shiranga liasü, aser la indang parnoki Yisu dang ashi. 39Idangji la anasa oa noktaker pai ramenji arütsü, aser iba jagi la toktsü, aser idangyongjisa lai shishia parnok nem awazüa agütsü.

40Anü luya alidang, tashitak tapu tapu agi shiranger shiaji parnoki Yisu dangi anir aru. Aser parnok shia dakji pai pei teka agi kongshia parnok anebtsü. 41Aser temenen tanelatem nisung jenti dak nungi adoka ayimtena ashi, “Na Tsüngrem Chir.” Saka pai parnokji metenoktsü aser jembitsü parnok dang memela; kechiaser parnoki paji Khrista ta metet. 42Aser anepdang akümdang, pai azüngmeyakdak tesem kati pila-a ao. Aser telokti-i pa bushia aru aser parnok metoktsütsü parnoki nungtem. 43Saka pai parnok dang ashi, “Yimtitem tanga nunga ni Tsüngrem osangtajung sayutsüngitsüla, kechiaser ya asoshi ni yok.” 44Aser pa Galil sinagogtem nung sayutsüngia liasü.

Currently Selected:

LUK 4: AONAGABSI

Highlight

Copy