YOHAN 18

Yisu Ashioktsüba Aser Apuba

(Mat. 26.47-56; Mar. 14.43-50; Luk. 22.47-53)

1Item o ya shir külen Yisui pei nütsüngtem den Kidron ayong küleni ao. Yangji atsüki ka liasü, aser ajagi pa aser nütsüngtem ai. 2Tang Yihuda shibai pa bendanga agütsü pai taodakji metet; kechiaser Yisui aiben pei nütsüngtem den idakji ajurutep. 3Idangji Yihudai temerangertem telok ka aser puti-ungertem o Farisitem nungi sosangtem kar anizüker totzü milen aser nok o nü bener ajagi aru.

4Yisui pa dak ataloktsüba ajakji metetadok aser parnok dang ashi, “Nenoki shiba bushir?” 5Parnoki pa dang langzü, “Nazaret nunger Yisu.” Yisui parnok dang ashi, “Ni pa.” Aser Yihuda shibai pa bendanga agütsü, pa-a parnok den noktaka liasü. 6Anungji kodang pai parnok dang, “Ni pa” ta ashi, parnok tesüleni atsünga oa ali nung alang. 7Anungji pai tanaben parnok dang asüngdang. “Nenoki shiba bushir?” Idangji parnoki langzü, “Nazaret nunger Yisu.” 8Yisui langzü, “Ni pa ta ni nenok dang shiogoto, anungji nenoki ni bushir süra, item nisungtembo odakjang.” 9Ibai, “Nai kü nem agütsüba rongnung ka danga ni mesamatsü” ta pai ashiba o ataloktsü asoshi liasü. 10Idangji Simon Peter den nok ka lia, aji atsüteter temaba putir kilir dak alep aser pa ajichi tenarong leptoktsü. Tang kilirba tenüngji Malka liasü. 11#Mat. 26.39; Mar. 14.36; Luk. 22.42 Anungji Yisui Peter dang ashi, “Nokji nokleptsü nung semang. Marok koba Tebui kü nem agütsü, aji ni majemtsü no?”

Yisu Temaba Putir Tsüngdang

(Mat. 26.57-58; Mar. 14.66-68; Luk. 22.61-71)

12Idangji temeranger telok aser parnok tir aser Yihuda nunger sosangtemi Yisu apu, aser pa dak merangsen yok, 13aser tamasa parnoki pa Ana dangi anir ao; kechiaser pa Kaifa tebutsü tebu liasü, aser Kaifaji Temaba Putir teinyakdak liasü. 14#Yoh. 11.49 Iba Kaifa yagi nüburtem asoshi nisung ka asü tajungba ta Yihuda nunger nem tasa agüja liasü.

Peteri Yisu Menangzükba

(Mat. 26.69-70; Mar. 14.66-68; Luk. 22.55-57)

15Simon Peter aser tangar nütsüng ka Yisu sülen anitak. Iba tangar nütsüngji Temaba Putiri kanga junga meteta liasü anungji pai Yisu den Temaba Putir kilempoki ai. 16Saka Peterbo temalen kikümdang noktaka liasü. Anungji Temaba Putir den metettepa aliba tangar nütsüngji tugur kiküm anükla den jembitep aser Peter aniok. 17Anungji kiküm anükla aiürla jagi Peter dang ashi, “Na-a iba nisung nütsüngtem rongnung ka masü ama?” Peteri langzü, “Nibo nunga.” 18Idangji tasükba agi kilirtem aser sosangtemi mijang agi mi apur yangji parnok mi wanga noktaka liasü. Idakji Peter parnok den noktaker mi wanga liasü.

Temaba Putiri Yisu dang Asüngdangba

(Mat. 26.59-66; Mar. 14.55-64; Luk. 22.66-71)

19Idangji Temaba Putiri Yisu dang pa nütsüngtem aser pa tesayuba indang asüngdang. 20Yisui pa dang langzü, “Ni otia alima dang jembiogo; Yihuda nunger külemi sentep dak tenla ki aser sinagog nung ni teti sayua liasü, saka kibok nung miimshia kecha mejembi. 21Nai kechiba kü dang asüngdanger, Ajiang, ni kechi ashi parnoki metet.” 22Kodang pai aji ashi, anasa noktaka aliba sosangtem rongnung kati Yisu dak pei teka agi maokja ashi, “Nai Temaba Putir dang yamaji langzür no?” 23Yisui pa dang langzü, “Ni tamajung jembia lira, tamajung kuliji agüjang, saka tajung jembia lira, nai kechiba kü dak maoktsür?” 24Anungji Anai pa alener Temaba Putir Kaifa dangi yok.

Peteri Tanaben Yisu Menangzükba

(Mat. 26.71-75; Mar. 14.69-72; Luk. 22.58-62)

25Tang Simon Peter noktaker mi wanga liasü. Anungji parnoki pa dang ashi, “Na-a pa nütsüngtem rongnung ka masü no?” Peteri menangzüki ashi, “Nibo nunga.” 26Peteri tenarong leptoktsüba nisungbar sosem ka, shiba Temaba Putir kilirtem rongnung ka liasü, pai Peter dang asüngdang, “Ni na pa den atsüki nungto mangu no?” 27Peteri anosa menangzüki ashi, aser idangyongji ani akong.

Yisu Pilat Tsüngdang

(Mat. 27.1-2; Mar. 15.1-5; Luk. 23.1-5)

28Parnoki Yisu Kaifa tsüngdang nungi anizüker governor alidaki anir ao. Aji anepungi liasü. Parnok menena mekümi kümtettsü benjong chitettsü asoshi parnoki chubar obendangdaki mai. 29Anungji Pilati parnok dangi tugur ashi, “Iba nisung anema kechi taitsüba nenoki bener arur?” 30Parnoki pa dang langzü, “Iba nisung tamajung inyaker ka masü asübo, onoki pa ne nem bendanga magütsüla.” 31Anungji Pilati parnok dang ashi, “Nenoki nenok sasa pa anir oa nenok ozüng nung aketba ama pa o bendangang.” Yihuda nungeri pa dang ashi, “Nisung ka tepsettsü onok dang mela-a mali.” 32#Yoh. 3.14; 12.32 Anungji Yisui pa kobala tasüba agi asütsü ta sayua jembi aji atalok. 33Anungji Pilati tanaben chuba kidangi meyipa yir Yisu pa dangi jaok aser pa dang asüngdang, “Na Yihuda nunger Chubaji asü?” 34Yisui langzü, “Nai ne sasa ashir asü mesüra kü indang tangari ne dang shia liasü?” 35Pilati langzü, “Ni Yihuda nunger ka asü? Ner kin aser puti-ungertemi na kü nem bendanga agütsür. Nai kechi inyak?” 36Yisui langzü, “Kü Chuba yimli iba lima meyong masü, kü yimli iba lima meyong asü nungbo Yihuda nunger ket nung ni bendanga magütsütsü asoshi kü kilirtemi rarala. Saka kü yimlibo iba lima nungi masü.” 37Pilati pa dang ashi, “Ajangla na Chuba asü?” Yisui langzü, “Ni Chuba ka ta nai ashir. Ni ochi indang kuli agütsütsü aso aser aji atema ni alimai aru. Ochi meyong shir lir parnok ajaki kü o angar.” 38Pilati pa dang asüngdang, “Ochiji kechi?”

Yisu Asütsü O Bendangba

(Mat. 27.15-31; Mar. 15.6-20; Luk. 23.13-25)

Kodang pai aji ashi, pai tanaben Yihuda nunger dangi tugu aser parnok dang ashi, “Ni pa dak tai kecha mangur. 39Saka kümtettsü benjong mapang nung ni nenok dangi ka chioktsü nenok yimsü ka kar. Anungji ni nenok dangi Yihuda nunger chubaji chioktsü asü?” 40Idangji parnoki tanaben ayimtena ashi, “Iba nisung masü, saka Baraba,” Iba Baraba ya rakzükraktemer ka liasü.

Currently Selected:

YOHAN 18: AONAGABSI

Highlight

Copy