YOHAN 17

Yisu Sarasademba

1Yisui ya jembimar külen, pai kotaklen reprang aser ashi, “Oba mapang tongogo; Techiri na sentsü wangshidaktsütsü asoshi nai ne Chir sentsü wangshidakjang. 2Kechiaser nai pa nem shirnoksa agütsü parnok ajak nem pai teti taküm agütsütsü asoshi nai pa nem meimchir ajak madak ainji agütsüogo. 3Naji chichiba teti taküm, aser nai tenyaba Yisu Khrista metetbaji parnok asoshi teti taküm lir. 4Nai kü nem kechi mapatem inyaktsü agütsü aji renemba agi ni na alima nung sentsü wangshidaktsüogo. 5Aser tang Oba, ali meyangludang ne den alidang ni kechi sentsüwangshi nung liasü, iba sentsüwangshi jagi ne den ni tang sentsü wangshidakjangma.

6“Alima nungi nisung shirsa nai kü nem agütsü parnok dang ni ne tenüng jungkai adokdaktsü, parnok ne meyong liasü aser nai parnok kü nem agütsü aser parnoki ne o angaogo. 7Kechisa nai kü nem agütsü aji ajak na nungi lir ta tang parnoki metet. 8Kechiaser nai kü nem kechi o agütsü aji ni parnok nem agütsüogo; aser parnoki itemji agizük aser ni na nungi aru ta parnoki chichia metet; aser nai ni yok ta parnoki amang.

9“Ni parnok asoshi mepishir. Ni alima asoshi memepishir, saka nai shir kü nem agütsüogo parnok asoshi mepishir. Kechiaser parnok ne meyong lir. 10Kü meyong kechi aji ajak ne meyong, aser ne meyong kechi aji kü meyong, aser ni parnok dak sentsüwangshir. 11Ni joko alima nung malitsü saka parnokbo alitsü, aser ni ne dangi arutsü. Temeshi Oba, asenok kechi koda ka dang lir, aji oda parnoka ka dang alitsüsa nai shir kü nem agütsü, parnok ne tenüng#17.11: Tenüng: Akhi Lai kar nung ‘ne tenüng tashi jagi kü nem agütsüba nüburtemji kümzükang’ ta angutsü. nung sotang. 12#TKe. 41.9; Yoh. 13.18 Ni parnok den alidang, Nai kü nem shirsa agütsü, ne tenüng ain agi parnok sota ayu; aser Laishiba ataloktsüsa tesamatsüba chir dak alema parnok rongnung ka danga mesamai ni anük. 13Saka tang ni ne dangi arur aser parnok pei sasa dak kü tepela teperi akümtsü asoshi alima nung ni o itemi jembir. 14Ni parnok nem ne o agütsüogo, aser alimai parnok sempa, kechiaser ni kechi koda alima meyong masü, yamaji parnoka alima meyong masü. 15Nai parnok alima nungi anir oang ta ni memepishir, saka nai parnok tamajungba nungi sotang ta ni mepishir. 16Ni kechi koda alima meyong masü, yamaji parnoka alima meyong masü. 17Ochi nung parnok meshitetjang. Ne o ochi lir. 18Nai ni kechi koda alimai yok, yamaji nia parnok alimai yoker. 19Aser ochi nungji parnok meshitetdaktsütsü asoshi parnok atema ni kü sasa meshiteter.

20“Item asoshi dang ni sarasademer masü, saka parnok o ajanga kü dak shiri amanger parnok asoshia ni sarasademer. 21Nai ni yok ta alimai amangtsü asoshi ni ne dak aser na kü dak aliba ama parnok ka dang küma asenok dak lidakjang. 22Asenok ka dang aliba ama parnok ka dang alitsüsa nai sentsüwangshi kechi kü nem agütsü aji ni parnok nem agütsüogo. 23Ni parnok dak, aser na kü dak, anungji parnok jungjunga ka dang akümtsü asoshi aser nai ni yok aser nai ni meim ama parnoka meimer ta alimai metettsü asoshi.

24“Oba, nai parnok kü nem agütsüogo aser ni kong lidir parnoka kü den idakji lidaktsünür; anungji kü sentsüwangshi kechi nai kü nem agütsüogo aji parnoki angutsü, kechiaser alima meyangludang nungi nai ni meim. 25Temeshiba Oba, alimai na memetet, saka ni na metet aser nai ni yok ta item yagi metet. 26Ni parnok nem ne tenüng metetdaktsü aser ano metetdaktsütsü; anungji kechi temeim agi nai ni meim, aji parnok dak alitsü aser ni parnok dak alitsü.”

Currently Selected:

YOHAN 17: AONAGABSI

Highlight

Copy