YOHAN 19

1Idangji Pilati Yisu aniena lisü agi repdaktsü, 2aser temerangertemi ai agi chuba korang ka mesena yanglur pa tekolak nung semoktsü aser nakrema meremba sobutsü ka pa nem abenloktsü. 3Parnoki pa dangi arua ashi, “Yihuda nunger chuba sangang!” Aser parnoki pa jak nung maoktsü. 4Pilati tanaben tugua parnok dang ashi, “Ni pa dak kecha tai mangur ta nenok nem metetdaktsütsü asoshi nenok dangi pa anir adoktsür.” 5Anungji Yisui ai korangji semer aser nakrema meremba sobutsüji sobur adok. Idangji Pilati parnok dang ashi, “Nisungbaji ajiang!” 6Kodang puti-ungertem aser sosangtemi pa angu, parnoki ayimten, “Pa kangki nung angenlokang, pa kangki nung angenlokang!” Pilati parnok dang ashi, “Nenoki nenok sasa pa anir oang aser pa angenlokang; kechiaser ni pa dak kecha tai mangur.” 7Yihuda nungeri pa dang langzü, “Onok ozüng ka kar, aser iba ozüng jagi pa asütsüla, kechiaser pai pei sasa Tsüngrem Chir aküm.”

8Anungji kodang Pilati iba o angashi, pa tali tsübua liasü; 9Anungji pai chuba kidangi tanaben ai aser Yisu dang ashi, “Na kong nungi?” Saka Yisui pa nem kecha telangzüba magütsü. 10Anungji Pilati pa dang ashi, “Nai kü den mejembir no? Na chioktsü kü dak tashi lir aser kangki nung angenloktsü kü dak tashi lir ta nai memetet no?” 11Yisui pa dang langzü, “Temalen nungi ne nem ibaji magütsü asübo, ni anema ne tashi kecha makala.” 12Ajagi Pilati pa chioktsü bushi; saka Yihuda nungeri ayimtena ashi, “Nai iba nisung chiokra, na Kaisar tembar masü; shibaisa pei sasa chuba akümer, pai Kaisar anema jembir.”

13Kodang Pilati o angashi, pai Yisu anir adok, aser obendangba menden, koba dang Lungpak-la ta ajar aser Ibri oshi agi Gabbatha, idakji pai amen. 14Aji Kümtettsü Benjong atongtsü asoshi terenemnü liasü, aser aji terana baji meta liasü. Pai Yihuda nunger dang ashi, “Nenok chuba ajiang.” 15Idangji parnoki ayimten, “Pa südakjang, pa südakjang, pa kangki nung agenlokang.” Pilati parnok dang ashi, “Ni nenok chuba kangki nung angenloktsü no?” Puti-ungertemi langzü, “Kaisar dak alema onok chuba shinga melika.” 16Anungji kangki nung angenloktsü asoshi Pilati Yisu bendanga agütsü.

Yisu Kangki Nung Angenlokba

(Mat. 27.32-44; Mar. 15.21-32; Luk. 23.26-43)

Anungji parnoki Yisu anir ao, 17aser Yisu pei kangki apur Tekolakret, Ibri oshi agi Golgotha, ta ajaba tesem kati anir ao. 18Idakji parnoki pa kangki nung angenlok aser pa den tangar ana tip anatsülen kaka aser Yisu tiyong nung ta liasü. 19Ano Pilati temetettsü ka zülu aser kangki manungji maloktsü. Tezülubaji yamai liasü: NAZARET NUNGER YISU, YIHUDA NUNGER CHUBA. 20Iba züluji Yihuda nunger aikati azüng, kechiaser Yisu angenlokdak tesemji yimti anasa liasü; aser tezülubaji Ibri, Grik aser Latin oshitem nung zülua liasü. 21Anungji Yihuda nunger puti-ungertemi Pilat dang ashi, “Yihuda nunger Chuba tabo tezülu, saka ‘Ni Yihuda nunger chuba’ ta pai ashi ta züluang.” 22Pilati langzü, “Ni kechi züluogo, aji züluogo.” 23Kodang temerangertemi Yisu kangki nung angenlok, parnoki pa süoshi agizük aser pezüsü küma lemsa aser parnok shia shilem kaka agi. Parnoki semoksü agizük saka ya tarmung makai temalen nungi tsünglanglen tashi atakba semoksü ka liasü. 24#TKe. 22.18 Anungji parnoki jembitepa ashi, “Asenoki yabo meshisali, saka shiba, meyong asütsüar ya asoshi antoktangdi.” Anungji Laishiba o ya ataloktsü asoshi aji oda adoka ata:

“Parnoki kü süoshi parnok rongnung lemsa,

aser kü semoksü asoshi parnoki antoktang.”

Aji oda temerangertemi inyak 25Saka Yisu kangki anasa tetsü aser tetsü tenu Klopa tebutsü Mari aser Mari Magdala noktaka liasü. 26Anungji kodang Yisui tetsü aser pai meimba nütsüng anasa noktaka angu, pai pei tetsü dang ashi, “Tetsür, ner chir ajiang!” 27Indangji ano pai nütsüng dangji ashi, “Netsü ajiang!” Aser iba mapang nung jagi nütsüng jagi la par kidangi anir ao.

Yisu Asüba Indang

(Mat. 27.45-56; Mar. 15.33-41; Luk. 23.44-49)

28 # TKe. 69.21; 22.15 Ajisür külen mapa ajak renema aruogo ta Yisui meteta, Laishiba ataloktsü asoshi pai ashi, “Ni tzürar.” 29Idakji tasentzü agi sünga po ka amentaka liasü. Anungji parnoki tasentzü agi asüngba renrajeb ka esop perdong ka nung ataloker pa tebang nung chiloktsü. 30Kodang Yisui tasentzüji agizük pai ashi, “Ya renemogo.” Idangji pa tekolak angema lua pa tanela odaktsü.

Yisu Tesa Nung Atsüngba

31Aji Benjong asoshi terenemnü asünung, Amungnü tasü mangtemji kangki nung malitsü asoshi kechiaser iba Amungnüji anogo tulu liasü; parnok tetsüngtem kusüker külen temangji bener oadoktsü asoshi Yihuda nungeri Pilat dang asüngdang. 32Anungji temerangertem arua mezüngbuba nisung aser tangarba shiba pa den kangki nung angenlok parnok tetsüng kusüktsü. 33Saka kodang parnoki Yisu dangi aru pa süadoker angu, parnoki pa tetsüng mekusüktsü. 34Aji saka temerangertem rongnung kati nü agi pa tesa nung rüoktsü aser idangyongji azü aser tzü adok. 35Nenokia amangtsü asoshi shibai iba tatalokba angu pai kuli agütsür. Kechiaser pa kulji ochi lir. 36#Ani. 12.46; Zün. 9.12; TKe. 34.20 Kechiaser pa teret kata meraksatsü ta Laishibai ashiba ataloktsü asoshi itemi adok 37#Zek. 12.10; Jad. 1.7 Aser ano Laishibai tesem ka nung ashir, “Shiba dak parnoki nü agi atsüng, parnoki pa dang reprangtsü.”

Yisu Aremba Indang

(Mat. 27.57-61; Mar. 15.42-47; Luk. 23.50-56)

38Iba sülen Arimathia nunger Yosef, Yisu nütsüng ka, saka Yihuda nunger tsübu nung miima dang nütsüng ka, pai Yisu mang bener odi ta Pilat dang asüngdang aser Pilati pa dang mela. Anungji pa arur Yisu mang bener ao. 39#Yoh. 3.1,2 Nikodima shibai mezüng Yisu dangi aonung aru, paia teronem menemba süngtzü aser totzü meyokteper seret tenem shi bener aru. 40Anungji parnoki Yisu mangji agia, Yihuda nunger mang aremba yimsü ama teronem menemba oset denji sü tanük agi alung. 41Tang pa kong kangki nung angenlok yangji atsüki ka liasü aser atsüki nungji ano nisung kodanga meyudangba leper tasen ka liasü. 42Anungji Yihuda nunger benjong asoshi terenemnü asünung aser leperji anasa alinung parnoki Yisu mangji yangji yutsü.

Currently Selected:

YOHAN 19: AONAGABSI

Highlight

Copy