ISAIA 9
9
Tarutsü Aliba Chuba
1 #
Mat. 4.15
Saka temulung shisa amsa-a alirtem asoshi joko tejashi malitsü.
Akhidang pai Zebulun aser Naftali limai maksütsü bena arudaktsü,
saka tesülenbo, Yordan anüolen kintem aliba linük,
Galil Tzüyim temeket, pai sentsüwangshidaktsütsü.
2 #
Mat. 4.16; Luk. 1.79 Ammang nung jajaba nüburtemi tesangwa tulu ka nguogo;
shir tammang lima alir, parnok dak tesangwa yaloktsüogo.
3Nai kin rendaktsüogo;
nai parnok tepela renlokdaktsüogo;
parnok ne madang alurudang pelatepba ama pelateper,
temakzükba oset lemsatepdang nisungi pelatepba ama pelateper.
4Kechiyong süngra koba parnok khuret liasü aser parnok tapubang
nung aliba süng, parnok kibur tazükba ajok,
Median anogo nung ama nai raksatsüogo.
5Kechiyong rongrongshishiba telok nung nok o nü
abenba nisung sobutsü ajak,
aser azü mezüba süoshi tarongtsü asoshi aser mi asoshi tatsüktsü alitsü.
6Kechiyong asenok nem tanur ka soja lir,
asenok nem jabaso ka agüja lir;
aser yimsüsüba pa tapubang nung alitsü; aser
pa tenüng Tesüngmangtsü, Teshisadanger,
Tsüngrem Tashi Tulusang,
Teti Tatem Maka Tebu,
Yimjung Chuba Chir ta ajatsü.
7 #
Luk. 1.32,33 Pa yimsüsüba aser yimjung züintsü indang,
Dawid Chuba menden nung,
aser pa yimli madak, aji yanglutsü
aser ochiba aser temeshiba agi aji ajungkettsü asoshi
Temeranger Telok Kibubai tejangraba agi aji inyaktsü.
Anüolentip Yimli Merenshitsü Indang
8 Kibubai Yakob anema o yok,
aser aji Israel dak meküploktsü.
9Nisung ajaki, Efraim aser Samaria nung alirtemi aji metettsü,
saka parnoki mezümeküma aser temulungjang ulua ashir,
10“Lungrutem tsükogo,
saka onoki lung tangentet agi yanglutsü;
mungu süng raksaogo.
Saka onoki cedar süng agi melentsü.”
11Anungji Kibubai pa anema Rezin temerirtem adokdaktsütsü,
aser pa tsükchirtem ajongloktsütsü;
12tejaklen Siria nunger aser tesülen Filistia nunger;
aser parnoki tebang kar Israel meyoktsü,
ya ajak asoshi pa ain aitba meyipa mao,
saka pa teka ano mekanga lir.
13Aji saka shibai nübur dak azük,
pa dangi parnoki memeyip mesüra Temeranger
Telok Kibuba mebushi.
14Anungji Kibubai Israel tekolak aser teben,
asang süngsang aser tsütok kenüyongi leptoktsütsü.
15Tambur aser akhümtsübuba nisungji tekolak lir,
tiyazü sayuba ainkarji teben lir.
16Kechiyong shirnoki anishi parnok mashileni odaktsür,
aser shirnok parnoki anishiogo parnok meyokadokogo.
17Anungji Kibubai parnok asangurtem dang mepelatsü,
mesüra pai parnok tebu malir aser amitsürtem dak aria mebilemtsü;
kechiyong nisung shia menena kümogo aser tamajung inyaker lir,
aser tebang shiai tamashi o jembir;
ya ajak asoshi pa ain adokba meyipa maor,
saka pa teka ano mekanga lir.
18Kechiyong tamajung mapa mi ama jangrur,
aji agi ai aser ayi dong meruksadoker,
hau, aji agi arem min tanak nung mi kaodaktsür,
aser itemji mokozü mepet temelem temaleni nunga atudaktsür.
19Temeranger Telok Kibuba ain aitba ajanga alima rongtokgogo;
nisungtema mi asoshi tatsüktsü süng amai lir.
Nisung shiai pei adianu anünga meyutsütsü;
20Parnoki tajichi teka manung ajeba arutsü, saka yaseta alitsü,
aser pai tabelen teka manung achitsü,
saka parnok tipmatemtsü;
parnok nisung shiai pei teben shi achitsü.
21Manase-i Efraim achitsü;
aser Efraimi Manase;
aser parnok külemi Yihuda anema alitsü.
Ya ajak asoshi pa ain aitba meyipa maor,
saka pa teka ano mekanga lir.
Currently Selected:
ISAIA 9: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
