ISAIA 10
10
1Shirnoki ochi mashiba ozüngtem yanglur, shirnoki nüburtem rishikangshitsüsa temzüng yanglur, aiatai; 2nüngdakba pur ochiba nungi meyipdaktsür, kü nübur sensaker tim tashi rakzükadoker, amitsürtemji parnok temakzükba oset ama, aser tebu malir oset pei meyong ama makzükadoker. 3O bendangba anogo nung, talang nungi arutsü aliba yipru nungi nai kechi inyaktsü? Shiba dangi teyari asoshi ajentsü, aser ne rongsen nai kong yutsütsü? 4Tepuokertem kübok nenok mechioka alutsü, tetepseter telunglen nenok laotsü. Ya ajak asoshi pa ain adokba meyipa mao, saka pa teka ano mekanga lir.
Asiria Anema Obendangba
5 #
Isa. 14.24-27; Nah. 1.1; Zef. 2.13-15 Aia, Asiria kü ain adokba ajok, aser kü mit adokba rangdong! 6Tsüngrem metsübuba kin, kü terasaba aliba nübur anema ni pa yok, aser parnok dang nungi rakzükraktemtsü, aser osettsüset makzüktsü, aser yimdong nung lishi ama ajemoka yoktsü pa dang ni melatsü. 7Saka pai yamaji mebilemer aser pai yamaji pa mulungjang nung meshisar; aser kin ishika mesüi leptoktsütsüang bilemer. 8Kechiyong pai ashi, “Kü walunirtem parnok ajak chubatem masü no? 9Karkhemis ama Kalno mali no? Arpad ama Hamat mali no? Damaska ama Samaria mali no? 10Yirusalem aser Samaria dang nungi taoba süngyanglu yangluba noksa, oda kü ket agi süngyanglutem yimli bushitet nungji, 11ni Samaria aser süngyanglutem dang inyakba ama, yamaji ni Yirusalem aser pa süngyanglutem dang meinyaktsü ama?”
12Saka kodang Kibubai Zion tenem aser Yirusalem nung pa mapa renemdir pai Asiria chuba ngasangatema temulung uluba, aser pa amajok sentsüwangshi merenshitsü. 13Kechiyong pai ashi, “Kü teka tashi agi ni ya inyak, aser kü shisatsü agi, kechiyong ni tangatetba lir; ni kü kintem arrtsü agienogo, aser ni parnok terizüngdak rakzükraktemogo, kintem ni ali tonga anizükogo. 14Kintem rongsen ozü tesep ama ni rakzükogo; aser lungtoka aliba entsü bena aruba amato ni alima ajak bendenogo; aser tashikang arakzüba, mesüra tebang lapokba mesüra asatepba kata maliasü.”
15Nisungi süng alenba poi pei sasa pa madak asükümdi ma? Mesüra süngrangtsü shiba nisungi aranger pa madak pei sasa uludima? Merang jok shibai mekanger pa arakzükdaktsüba ama, mesüra rangdongi shiba süng masü pa arakzüdaktsütsüba amai aji asütsü.
16Anungji Kibuba Temeranger Telok Kibubai jangratema aliba nokinketer dangi tashitak yoktsü, aser pa sentsüwangshi melen mi jangruba amai tejangruba tsükloktsü. 17Israel tesangwa mi akümtsü, aser pa Temeshisangji milak akümtsü; aser aji agi pai ai aser ayidong kenü yongi arongtsü aser meyoktsü. 18Aser pai arem sentsüwangshi, aser tejang tangtsüba moapu, tanela aser temang anaprong samatsütsü, aser aji shiranger nisung lurepa aoba amai alitsü; 19aser par arem süngdongtem anünga alibaji tanur katia zülua yutettsüsa ishika dang alitsü.
Tanüngba Israel Temulung Meyipba
20Iba anogo nung anünga aliba Israel, aser jentetba Yakob kidongi joko parnok den raraba tsükchir dak metaloka malitsü, saka Kibuba, Israel Temeshisang dak atangji agi metaloktsü. 21Tashi tulu Tsüngrem dangi, tanüngba kabo, oda Yakob tanüngba meyipa arutsü. 22Kechiyong ne nübur tzüyim lisem ama liaka, parnok rongnung tanüngba dang meyipa arutsü; temeshiba agi moshia tesamatsütsüba lemtetja lir. 23Kechiyong Kibuba, Temeranger Kibubai, tatem tashi ajak samatsütsü, lemteta alibaji, alima ajak madak inyaktsü.
24Anungji Kibuba, Temeranger Kibubai yamai ashi, “Oh kü nübur Zion nung alirtem, Ijip nungeri inyakba ama, Asiriai ne dak merang mekangaka, Asiria nunger tetsübu! 25Kechiyong tatsüka nung kü mit adokba anentsü, aser kü ain adokba sünemtsü. 26Idangji Temeranger Kibubai Asiria anema, Median nunger Oreb lung anasa tepsetba amato tareptsü asoshi ajongloktsütsü; aser Ijip madak pai mekangba amato, pa jok tzüyim madak mekangtsü. 27Aser iba anogo nung pa khu ne tapubang nungi pungdoktsü, aser totzü mezütsüba süngraji samatsütsü. Rimmon nungi pa atuogo. 28Pa Aiati#10.28: Aiati: Iba yimti aser tekong 28-32 nung shia aliba yimtitem ya Yirusalem anasa liasü. Anüdoklentip nungi yimaker arudang item yimtitem ajanga arur. aruogo; pa Migron ajanga süiogo, Mikmas nung pai pa khu rizünga yua lir; 29parnok lenmang ajanga oa lir. Geba nung parnok anena lir. Rama atentener, Saul meyong Gibea jena oa lir. 30Ne ola tulu agi ayimtenang, Oh Gallim jala! Angang. Oh Laisha, Oh na temeimtsü Anathot! 31Madmena jena aor, Gebim nisung tejenokdak bushir. 32Tanüsa pa Nob nung anentsü, pai Yirusalem tenem, Zion jala tenem nung pa teka ajetrepba teka arakzütsü.”
33Saka ajiang, Kibuba Temeranger Telok Kibubai, kongsang tetsübutsüka lentoktsü; aser talanglang aliba lensüka laotsü, aser azüklen alir teküboki aludaktsütsü. 34Aser po agi pai arem min temelem aleptsü, aser Lebanon tashi tulu agi laotsü.
Currently Selected:
ISAIA 10: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
