ISAIA 11
11
Yimjiyimjung Yimli
1Yesse tongben nungi lapi ka adoktsü,
aser pa tera nungi kongsang kati tejang atangtsü.
2Aser pa madak Kibuba tanela,
shisatsü aser tangatetba akaba tanela,
teshisadangba aser tashi akaba tanela,
aser temetetba tanela, aser Kibuba tsübuba alitsü.
3 Kibuba tsübuba nung pa pelaba alitsü;
pa tenük agi anguba agi pai o mebendangtsü,
aser pa tenarong agi angashiba agi pai melemtettsü;
4 #
2 Te. 2.8
Saka ochi agi pai sensaker o bendangtsü,
aser linük nung ajemalur asoshi timi lemtettsü;
aser pa tebang ajok agi pai alima dak azüktsü,
aser pa tebang mechi tangula agi pai tamajunger tepsettsü.
5 #
Efe. 6.14
Pa teperem nangri temeshiba alitsü,
aser pa peremlen temulung alemba asütsü.
6 #
Isa. 65.25
Idangji tzünüi san chanu den alitsü,
aser merok keyi-i nabong chanu den mepitaka alitsü;
nashi chanu aser molusongzü chanu aser tejebketba külemi chiyimtsü,
aser tanur chanu kati parnok anishitsü.
7Nashi aser shirem külemi chiyimtsü,
aser parnok techanutem külemi mejangtsü,
aser molusongzüi nashi pungchi ama monü achitsü.
8Aser mama ayongba tanuri per lungki nung asayatsü,
aser mamadokba tanuri pei teka agi per tesep nung amushitsü.
9 #
Isa. 65.25; Hab. 2.1 Kü temeshi tenem ajak nung parnoki kecha mashitsü mesüra mesamadaktsütsü;
kechiyong tzü agi tzüyim nembanga ali ama,
Kibuba metetba shisatsü agi alijak asüngtsü.
Tepuokdak Nungi Shilangtsü Shinba
10 #
Rom. 15.12
Iba anogo nungji ya ataloktsü, oda Yesse tera koba nisungtem asoshi temaitsü lir, kintemi pa dangi bushia aotsü, aser pa anisüngzükdakji sentsüwangshi alitsü.
11Iba anogo nung, Asiria, Ijip, Pathros, Kus, Elam, Shinar, Hamat aser tzüyim tzüküm linük nungi; Kibubai pei teka agi tanaben tanüngba pei nübur koba anünga lidir aji bena arutsü.
12Kintem nem pei temaitsü agütsütsü,
aser jentoka aliba Israel senteptsü,
aser alima kinük pezüsülen nungi Yihuda prokshia aliba külemi senteptsü.
13Idangji Efraim anema tenük meremba joko anentsü,
aser shirnok Yihuda anemer küma lir,
parnok leptoktsütsü;
Efraimi Yihuda dak tenük memeremtsü,
aser Yihudai Efraim anemer masütsü.
14Saka parnoki anüolen Filistia nunger tapubang manung yima alutsü,
parnoki külemi anüdoklen aliba chirtem rakzükraktemtsü,
Edom aser Moab parnok tashi kübok lidaktsütsü,
aser Ammon chirtemi parnok dang tashi angatsü.
15 #
Jad. 16.12
Idangji Kibubai Ijip tzüyim temeli kongdaktsütsü;
aser pai mopung tatsük agi ayong madak pa teka arakzütsü,
aser aji ayong tila tenet küma zükshitsü,
aser nisungtem tsüngsem takong agi jaja-a odaktsütsü.
16Aser tanüngba pei nübur koba anüngdir,
parnok asoshi, Israel atema par Ijip linük nungi adokba anogo nung aliba ama,
Asiria nungi lentongbang ka alitsü.
Currently Selected:
ISAIA 11: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
