ISAIA 8
8
Isaia Jabaso Nüburtem Atema Temaitsü Ka
1Idangji Kibubai kü dang ashi, “Lungpak tulu ka agiang aser Maher-shalal-hashbaz,#8.1: Maher-Shalal-Hashbaz: Iba tetezü Aritepa Rakzüktsü mesüra Yakta Tepsettsü. ta iba manung züluang. 2Aser ni asoshi zülua ayutsü temulung lemtetba kulisürtem, Uria putir, aser Yeberekia jabaso Zekaria ja-ang.” 3Ajiser ni ainkarla dangi ai, aser la mashisa küma jabaso ka aso. Anungji Kibubai kü dang ashi, “Pa tenüng Maher-shalal-hash-baz ta ja-ang. 4Kechiyong tanur jagi, ‘Oba’, aser ‘Oja’ ta ajatsü memetetdang, Damaska rongsen aser Samaria nungi rakzükba osettem Asiria chuba dangi bener oadoktsü.”
Asiria Yimsüsüba Aruba
5Ano Kibubai kü den jembia ashi, 6“Iba puri süngjem süngjema yima aliba Shiloa tzü magizüki endok nungji aser Rezin aser Remalia jabaso tsüngken tsübuadok nungji, 7tang ajiang, Kibubai ayong tzütem, tashi tait aser jenti, oda Asiria chuba aser pa sentsüwangshi, parnok anema bener arudaktsütsü, aser pa ayong ajak manung aser tzüküm ajak manung pa atutsü, 8aser tejakleni Yihuda oka aitsü aser tzümetsüng ama pa moshia aser ajanga yima aotsü, pai tekong tashi tonga atutsü, aser pa tashikang salaba agi ne linük lenten sünga alitsü, Oh Immanuel.”
9Nenok nüburtem anükanüka raksa-ang aser tsübuang;
nenok alinük talang nung alirtem nenoki angang, nenok sasa nangri kangang aser tsübuang,
nenok sasa nangri kangang aser tsübuang.
10Külemi tasa asa-ang,
saka aji kecha mekümtettsü;
o jembiang saka aji mataloktsü;
kechiyong Tsüngrem asenok den lir.
11Kechiyong tashi tait teka agi Kibubai kü dang jembi, aser iba nübur lenmang nung ni mejajatsüla ta yamai ashi, 12#1 Pe. 3.14,15 “Iba nüburtemi lendong ta ashidang, nenoki lendong ta teja, mesüra parnoki kechi tsübur nenoki aji tetsübu mesüra iba indang taoksa. 13Temeranger Telok Kibuba, pa dang nenoki meshiteta ayutsüla; aser nenok tetsübutsü pa kümdakjang, aser nenok taoksatsü pa kümdakjang. 14#1 Pe. 2.8 Pa temeshidak ka alitsü; saka Israel kidong anaprong asoshi tajemshitsü lung aser temetsüdaktsü lung alitsü, aser Yirusalem nung alir asoshi lungnen aser sang alitsü. 15Aser iba manung aikati metsüdaktsü, aser laotsü, raksatsü, aser sang nung ashitsü aser aputsü.”
Asür Tanela Dang Asüngdangba Lendong
16“Kü kuli o alentepang, aser kü tesayuba kü nütsüngtem temulungjang nung ajena yujang. 17Ajisür Yakob kidong nungi tejak miima aliba Kibuba asoshi ni ata-a alitsü, aser ni pa bushitsü.” 18#Ibr. 2.13 Ajiang, Zion tenem nung aliba, Temeranger Telok KIBUBA nungi Israel nung temaitsü aser tesüngmangtsü asoshi Kibubai kü nem agütsüba, ni aser tanurtem lir.
19Kodang parnoki nenok dang, süli aor aser arasentsür, asapranga aser atakatemba nisung bushiang ta shidir, kin kati par Tsüngrem dang masüngdangli ma? Taküm alir atema parnoki tasür dang mejembili ma? 20Tesayuba aser kuli dangi oang! Atangji, parnoki iba o amaji mejembira par asoshi anepdang maka. 21Parnoki linük ajanga kanga toushia aser yaseta nemzütsü, aser parnok tayaba agi parnok sasa ain adoktsü, aser par chuba aser par Tsüngrem atakatemtsü, aser parnok tejak anünglen ashitsü, 22aser tanaben alilen reprangtsü, saka tejashitsü aser tammang, temulung shisa amsaba ammang, aser tammangi parnok arioktsütsü.
Currently Selected:
ISAIA 8: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
