ISAIA 7

Ahaz Chuba asoshi Osang Ka

(2 Ch. 16.5; 2 Pu. 28.5-15)

1 # 2 Ch. 16.5; 2 Pu. 28.5,6 Uzzia jabaso Yotham, aser par jabaso Ahaz Yihuda chuba tendak Siria chuba Rezin, aser Remalia jabaso Peka Israel chuba, Yirusalem anema raratsü atu, saka iba anema meraratet. 2Aser kodang Dawid kidong dang, Siria nunger Efraim nunger li nung anena lir, ta ashi, pa mulungjang aser nübur mulungjang arem nung süngdongtem mopungi anokshiba ama anokshidaktsü.

3Idangji Kibubai Isaia dang ashi, “Na aser ne chir Shear-Yashub#7.3: Shear-Yashub: Ibri oshi nung iba tenüng ya “ishika dang meyipa arutsü” ta lir (10.20-22 reprangang). süshir li lenti nung moti temaba nungi tzüla tatemlen jagi tang Ahaz den ajuruteptsü tuang; aser pa dang shiang, 4‘Kümdangang, aser süngjem süngjema liang. Rezin, Siria, aser Remalia jabaso tesashi ain adokyongbo, aser item mokozü alongba milungsang tembang ana aliyongbo tsübua teli, aser ne mulung makai teli.’ 5Kechiaser Siriai Efraim aser Remalia jabaso dener na anema tamajung tasa yanglua ashi, 6Yihuda anema asenoki tudi, aser aji jenshidaktsüdi, aser asenok asoshi aser iba tiyong nung Tabeel jabaso chuba kümdaktsüdi.” 7Yamai Kibuba Tsüngremi ashir, “Aji tamakok angutsü, aji oda masütsü. 8Kechiyong Siria tekolak Damaska, aser Damaska tekolak Rezin lir aser küm roker pungu tsüngda nung Efraim kin kata ta masütsüsa anüka raksadaktsütsü. 9Aser Efraim tekolakji Samaria, aser Samaria tekolakji Remalia jabaso lir. Nenoki mamangli süra nenok takoksa asütsü.”

Isaiai Ahaz dang Immanuel Temaitsü Agütsüba

10 Kibubai Ahaz dang tanaben jembia ashi, 11“Kibuba ne Tsüngrem dang temaitsü ka asüngdangang; Sheol nung mesüra temalen talang nung asüngdangang.” 12Saka Ahazi ashi, “Masüngdangtsü, mesüra Kibuba ni matitangtsü.” 13Aser pai ashi, “Tang nenoki angang, Oh Dawid kidong, nisung aniseta kümdaktsütsü ya mapa tila ka ta nenoki bilema, oda ano kü Tsüngrem aniseta kümdaktsütsü no? 14#Mat. 1.23 Anungji Kibubai pa sasa nenok nem temaitsü ka agütsütsü; ajiang tasüngtet aiür#7.14: Tasüngtet Aiür: Idaki Ibri oshi “tasüngtet aiür” ta aliba ya tetsür ka kibong akümtsü küm agi tonger alir tetsür ka dang ajar. Mat.1.23 nung agütsüba “tasüngtet” tetezü yabo Isaia mapang küm 500 süir külenang, Tejen Lai Grik oshi nung meyipba ka nung amshiba angutsü. ka mashisa akümtsü, aser jabaso ka asotsü, aser pa tenüng “Immanuel”#7.14: Immanuel: Ibri oshi nung iba tetezü “Tsüngrem asenok den lir.” ta ajatsü. 15“Kodang pai tamajung magizüktsü aser tajung shimtsü meteta kümdir, pa chiyungtsü mamatzü telong aser ninang mojitzü achitsü, 16kechiyong tanur jagi tamajung magizüktsü aser tajung shimtsü memetet dang, alinük koba nung chuba ana nai sempar aji senzüka toktsütsü. 17Asiria chuba, oda Efraim nungi Yihuda pilaba anogo nungi tang tashi marudangba anogotem ne madak, aser ne nübur madak, aser nebur kidong madak, Kibubai arudaktsütsü.”

18“Iba anogo nung ya ataloktsü, oda Kibubai Ijip ayong apokdak aliba mangatem, aser Asiria lima nung aliba ninang, jatentsü; 19aser itemji arutsü, aser item ajak lenten, tarok, lung tapok nung, ai ajak nung, aser süngsem ajak nung arua metemtsü.”

20“Iba anogo nungji Ayong atena or aliba kusünok tamshitsü bena aruba jagi oda Asiria chuba dena, tekolak aser tetsüng ku Kibubai südoktsütsü; ano aji agi bangsemoa, meyokadoktsü.”

21“Iba anogo nung ya oda alitsü, nisung kati nashi tsüla chanu ka, aser san anana metsütsü; 22aser mamatzü talubosa aliba yong pa pei chiyungtsü asoshi mamatzülong akatsü. Kechiyong linük nung anünga alir shiai mamatzü aser ninang mojitzü achitsü.”

23“Aser ya ataloktsü, kechi nungsa tsükmenatzü dong meyirijang nung taribi meyirijang alangba liasü aji yi aketba süngsem aser ayi dong dang alitsü. 24Aser nisungi lijakjang aser lijak bener ajagi arutsü, kechiyong linük ajakji ayi aketba süngsem aser ayi dong lir. 25Ayi aketba süngsem aser ayi dong tsübuba agi koterang agi angensa-a alidak ungsem ajak jagi nai marutsü, saka aji nashi rülen aser san jajatsü asoshi alitsü.”

Currently Selected:

ISAIA 7: AONAGABSI

Highlight

Copy