ISAIA 5
5
Tejang Matangba Tsükmenatzü Lu Ken
1 #
Mat. 21.33; Mar. 12.1; Luk. 20.9 Kü temeimba asoshi, pa tsükmenatzü lu indang kü temeim ken ni tendi. Kü temeimba ali tajung ungsem nung tsükmenatzü lu ka liasü. 2Pai ibaji meketa ongken atu, aser iba nungi lungtem shimdokadok, aser tsükmenatzü tajungtiba iba nung atem, aser iba tiyong nung semtu ka yanglu, aser ano iba nung tsükmenatzü menüngdak yanglu; aser iba jagi tsükmenatzü tejang tangtsütsü ta pai imla, saka iba jagi arem tsükmenatzü tangtsü. 3Tang, Oh Yirusalem sensotem aser Yihuda nungertem ni mepishir, ni aser kü tsükmenatzü lu tsüngda nung, o bendangjang! 4Kü tsükmenatzü lu asoshi ni kechi inyak, iba dak tali ano kechi inyaktet? Ajangla kechiba ni tsükmenatzü tejang imla-a alidang iba jagi arem tsükmenatzü jang tangtsü.
5Anungji tang, kü tsükmenatzü lu dang ano kechi inyaktsü, aji ni nenok dang shidi; iba nungi ni atsüji agientsü aser aji chimadaktsütsü, ni iba jara raksatsü, aser aji tetsüng agi ajemshidaktsütsü, 6aser aji ni pendok kümdaktsütsü, aji kolem magütsütsü mesüra koterang meyoktsü, saka yangji ai aketba süngsem aser ayidong adokdaktsütsü; ano ni mepet dang tzünglu meyoktsü ozüng melatsü. 7Kechiyong temeranger Kibubar tsükmenatzü luji Israel kidong, aser Yihuda nungertemji pai pelaseta atemba lir; pai ochiba bushi, saka azü tokshiba ajiang; temeshiba bushi, saka ayimtenba ajiang.
Lokti Temenen Aitsüba
8Nenok shiri alinük tiyong nung nenok kija, joko talidak makatsüsa, ki ka nung ka metenloka, aser alu ka nung alu ka bendenloker, parnok aiatai. 9Kü narong nung Temeranger Kibubai shiogo, “Atangji ki aika azüngazünga, ki tulu aser tajung, nisung meli-i akümtsü. 10Kechiyong tsükmenatzü lu lumung ter nung yimchi ter bena arutsü, aser metsü tatak ka nung pua ka bena arutsü.”
11Shirnoki anepdang yakta mejemtzü bushia saker; shirnoki aonung yi agi melettet tashi menua ata-a alir, parnok asoshi aiatai. 12Parnok benjong nung, tawaba kongki, atemba kongki, luli kongki, jemji aser yi lir, saka Kibuba mapa mesüra pa teka agi inyakba mapatem indang parnoki mesükoker aser meshisadanger. 13Anungji parnok temetetba shisatsü malibayong, kü nübur tepuokdaki oa lir; aser parnok tamarenertem yaseta lir aser parnok telok tetzüra agi shikong shikonga lir. 14Anungji molumi-i pei tejangraba ulushia, tasazük makai pei bang lapok; aser parnok sentsüwangshi, aser parnok telok, rongrongshishirtem, aser parnok rongnung pelatepertem, iba jagi alur. 15Aser nüburtem mechioka ludaktsür, nisung shia ajemaludaktsür aser asükümer tenük anüng atar alir ajemaludaktsür: 16Saka Temeranger Kibuba bo ochiba nung ajungketa lir, aser Temeshiba Tsüngremi ochiba nung meshiteta lir. 17Idangji san chanui, pei chiyimdak ama chiyimtsü, aser teraksabatem manung teyira nabong chanui achitsü.
18Shirnoki temenen tiyazü lisü agi atsür, aser shirnoki temenen talungtsü lisüi ama atsür parnok aiatai. 19“Pa mapa kara-a asenoki ngutettsüsa, odakjang; Israel nunger Temeshisang mapaji asenoki metettsüsa, anasa aitdakjang aser arudakjang” ta shirnoki ashir, parnok asoshi aiatai!
20Shirnoki tamajung dang tajung, aser tajung dang tamajung ajar; shirnoki tammang dang tesangwa, aser sangwa dang tammang ama züngshir; shirnoki taku dang tanang aser tanang dang taku ama züngshir, parnok asoshi aiatai. 21Shirnoki pei nükdang shisa taka ta, aser pei nükdang tangatetba lir ta bilemer, parnok asoshi aiatai. 22Shirnok yi ajemtsü mongyin, aser mejemtzü meyokteptsü tashi tulu nisung lir, 23shiri süpokrem asoshi tamajunger metendaktsür, aser tai makaba nungi ochiba rakzükadoker, parnok aiatai.
Bendanger Yimaker Arutsü Shinba
24Anungji milaki motembang menakrepadok ama, ai takong milaki rongreptsü ama, parnok tera shizükadoktsü, aser parnok apungbaji auyi ama pungshia atutsü; kechiaser parnoki Temeranger Kibuba ozüng magizük, aser Israel Temeshisang o sensatsü.
25Anungji pei nübur anema Kibuba ain adok, aser parnok anema pai pei teka mekang, aser parnok dak azük, aser tenemi atenten, aser tasümangtemji yimdong nung jana ama liasü. Ya ajak asoshi pa ain adokba meyipa mao, aser pa teka ano mekanga lir. 26Anungji talang nung aliba kin ka nem pai temaitsü ka adokdaktsütsü, aser alima tatem nungi parnok asoshi ayimoktsütsü; aser ajiang, parnok kanga kara-a arutsü; 27parnok rongnung shinga aniseta makümtsü, mesüra memetsüdaktsü, shinga amua maotsü, mesüra memejangtsü, mesüra parnok teperem nung nangri mesalatsü, mesüra parnok tsüngsem lisü meraktangtsü; 28parnok lijakjang techira aser parnok lijak ajak atemloka lir, parnok kortem temepu lungkerak temerang ama, aser parnok kor talungtsü tsüng Tsüngrem mopung ama. 29Parnok arrürba molusongzü ama alitsü, parnoki molusongzü pungtu ama arrtsü; hau, parnoki arrtsü, aser tetepsettsü aliba dak pungloktsü, aser aji bener oadoktsü, aser tekümzüktsü shinga malitsü. 30Aser iba anogo nung, tzüyim arrürba ama parnok arrtsü; aser kari alima dak reprangra, ajiang, tammang aser timtem tejashi, aser iba mepettem agi tesangwaji akümbanger angutsü.
Currently Selected:
ISAIA 5: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
