ISAIA 3
3
Yirusalem Nung Mepetmesü Adokba
1Kechiyong ajiang, Kibuba Temeranger Kibubai Yirusalem nungi aser Yihuda nungi taka temang, amtsük akaba ajonga, aser tzü akaba ajonga bener oadoktsü; 2tashi tulu nisung aser temeranger, obendanger aser ainkar, tetakzür aser tamburtem; 3tenem madak arkotong aser yimsüsürtem, teshisadanger, tesangra tepuar aser mongyin arasener. 4Ni parnok madak tanurtem chuba kümdaktsütsü aser kinütemi parnok madak yimsü südaktsütsü, 5Nisungtem rongnung kati ka kangshiteptsü, kiyonger kati ka kangshiteptsü, tanuri tain mezüngmeshitsü, samesa nisungi yimsüsür mezüngshitsü.
6Kodang nisung kari adianu ka pa tebuer kidang soter, “Ni sobutsü lir, na onok madak yimsüsür sang, aser iba teraksa madak na asa sang,” ta shidir 7iba anogo nung pai ola adoka ashitsü, “Ni tanebtsür ka masütsü, kechiyong kü kidang amtsük mesüra süoshi maka, nenoki nisungtem madak ni yimsüsür mekümdaktsütsü.” 8Kechiyong Yirusalem raksa-a lir, aser Yihuda laoa lir; kechiaser parnok o jembiba aser parnok mapa agi, Kibuba sentsüwangshi tatenba anema lir.
9O bendang dang, parnoki tejak reprangba agi parnok anema kuli agütsür, Sodom mesüka parnoki pei temenen metetdaktsür, aji miima mayur. Parnok pei tanela asoshi aiatai! Kechiyong parnoki pei dak parnok tamajung inyakogo. 10Temeshipur asoshibo junga alitsü, kechiyong parnoki pei inyakba tejang achitsü. 11Tamajunger asoshi aiatai! Pa asoshi tamajung alitsü; kechiyong parnok teka mapa tajangzük meyipa parnok nem agütsütsü. 12Kü nübur asoshi, parnok rishikangshirtemji tanurtem alitsü, aser tetsürtemi parnok madak yimsü asütsü. Kü nüburtem, nenok tanishirtemi nenok mashileni anir, aser nenoki anitaktsüba lenmang aitepdaktsür.
Kibubai Pei Nübur O Bendangtsü
13 Kibubai obendangdak noktaker tejakleni arur, pai pei nübur o bendangtsü noktaker. 14Kibubai pei nübur tamburtem aser tanishirtem den o bendangdaki aitsü; “tsükmenatzü lu nenoki tazüng kümdaktsü, sensaker rakzükraktemba nenok kidang lir. 15Kü nübur tepsatsüba aser sensaker tejak menüngsatsüba ya nenoka kechi tetezü?” ta Kibuba, Temeranger Kibubai ashir.
Yirusalemtsürtem Dang Ashiba
16 Kibubai ashir, “Zion jalatem asüküma lir, aser parnok tekong atsülanga aser tenük jalua, parnok jajadang kentamata-a aser parnok tetsüng nung ting ting ta asadakja jaja nungji, 17Kibubai Zion jalatem tekujong nung anakra adokdaktsütsü, aser Kibubai parnok mangsa toktsütsü.”
18Iba anogo nungji Kibubai parnok azük-naro tenüklang küri, kupok, keptangzük, 19tongbang, kisen aser tekong meiba sü, 20korang, tetsüng yinzü, peremlen, teronem bongdang aser tepuatsü; 21angoti, aser teni küri, 22benjongbentsü sobutsü, sepoksü, amungloka abenba sü, yangku tila, 23tanüdangtsü, kümpa sü tanük, kolakjen, aser süku meyiba sü bener aotsü. 24Aser ya oda ataloktsü, teronem melena teshinem, peremlen melena lisü, ku tajung melena lemtsü, tamaren sobutsü melena anem sü abenba, tobur tajung melena maksü alitsü. 25Ne nisungtem nok agi, aser ne temerangertem tongbang nung laotsü. 26Aser la süngkhümi menungratsü aser mang ayimtsü, aser la azüngazünga alitsü aser ali nung amentsü.
Currently Selected:
ISAIA 3: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
