ISAIA 2
2
Tatem Maka Yimjung
(Mik. 4.1-5)
1Yihuda aser Yirusalem indang Amoz jabaso Isaiai anguba o:
2Tesülen anogo nung ya ataloktsü, oda Kibubar ki tenemji, tenemtem kolak nung, ungsem manung ajungketa yutsütsü, aser kin ajak ajagi asentsü. 3Aser nisung jenti arua ashitsü, “Nenok arung, Yakob Tsüngrem kidangi, Kibuba Tenemi#2.3: Kibuba Tenem: Iba ya Zion tenem, koba nung Yirusalem Tenlaki yanglua liasü. asenok tudi, aser pai pa lenmangtem asenok dang sayutsü, aser pa lenmang nung asenoki jajadi; kechiyong Zion nungi pa tesayubatem, aser Yirusalem nungi Kibuba o arur.” 4#Yoe. 3.10; Mik. 4.3 Aser pai kin rongnung o bendangtsü, aser nisung jenti o bendangtsütsü; aser parnoki pei nok agi meritsüng, aser nü agi kolem nok atsüngtsü; kini kin anema nok memekangtsü, mesüra parnoki joko raratsü mangazüktsü.
Kibuba Anogo
5Oh Yakob kidong, arung asenoki Kibuba tesangwa nung jajadi! 6Kechiyong pai pei nübur, Yakob kidong senzüka yutsüogo, kechiaser parnok anüdoklen tetakzür agi süngogo, aser Filistia nunger ama temezünger agi sünga lir, aser aener den parnoki teka amteper. 7Ano parnok lima taribi aser hon agi sünga lir, parnok terizüngdak tatembang maka; ano parnok kor agi sünga lir, parnok talungtsütem tatembang maka. 8Parnok lima ano süngyanglu agi sünga lir; parnok pei temeyong agi yangluba, parnok pei teka mapa parnoki külemer. 9Aser tajemzükba nisung mechioka aludakja lir, aser tulur nisung ludakja lir; aji asünung parnok dang taitetokma. 10Kibuba tetsübutsü tsüngdang nungi, aser pa akhüm tulu sentsüwangshi nungi, lungpoki iang, aser auyi nung na atsüka liang. 11Azüklen talang nung reprangba nisung teküboki aludaktsütsü, aser iba anogo nung Kibuba dang ajungkettsü aser mezümekümba nisung ila-a kümdaktsütsü.
12Kechiyong asükümer aser mezümekümer ajak anema, aser ajungketa alir ajak anema; Temeranger Kibuba anogo ka lir. 13Lebanon nung cedar süngdong talang ajak aser ajungketa aliba Bashan anema; 14tenem talang ajak anema, aser ungsem ajungketa aliba ajak anema; 15lungki talang shia anema, aser noktanga aliba atsü ajak anema; 16Tarshis rong ajak anema, aser mitsa tajung ajak anema, Temeranger Kibuba anogo ka lir, aser teküboki aludaktsütsü. 17Aser nisung talang nung tua aliba ajemalua kümdaktsütsü, aser mezümekümer nisung teküboki aludaktsütsü, aser iba anogo nung Kibuba dang ajungkettsü. 18Süngyanglutem meshimeshia süitemtsü; 19aser kodang Kibubai alima tashi agi anokshitsü aramesodir, pa akhüm tulu sentsüwangshi nungi nisungtemi lungpoki, aser ali tapoki aitsü.
20Iba anogo nung nisungtemi pei asoshi tekülemtsü yangluba taribi aser hon süngyanglutem, pai shiruru aser laatem asoshi endokadoktsü. 21Aser kodang pai alima tashi agi anokshitsütsü aramesodir, Kibuba tsübuba nungi, aser pa akhüm tulu sentsüwangshi nungi, lungki, aser lung tejakma bushia aitsü. 22Nisung shiba teni nung tangula ali, pa dak nungi meyipba oang, kechiyong pa kechi züngshitsü nüngdak ali?
Currently Selected:
ISAIA 2: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
