ISAIA 1
1
SHILEM MEZÜNGBUBA
(Tapu 1–39)
1 #
2 Ch. 15.1-7,32-38; 16.1-20; 2 Pu. 26.1-23; 27.1-9; 28.1-27; 29.1-33 Yihuda chubatem Uzzia, Yotham, Ahaz aser Hezekia tendak Amoz jabaso Isaia mangdang, koba pai Yihuda aser Yirusalem indang angu.
Yihuda Temenen
2“Angang, Oh anüngtem, tenarong agüjang, Oh alima; kechiyong Kibubai jembiogo; ni techirtem mesütet aser intetdaktsü, saka parnoki ni anema apuso. 3Nashi pungchi-i pei kibur metet, aser gadoi pei kibur ki metet; saka Israelibo memetet, kü nüburi mangateter.”
4Aia! Temenen kin, menen khu bener aliba nübur temenen mapa inyaker metsü, teraksa benshiba techirtem! Parnoki Kibuba sentoka toktsüogo, parnoki Israel nunger Temeshisang sensatsüogo, parnok temulung pila-a tesüleni atsüngzükogo.
5Nenok dak azüktsüsa ano kechiba nenoki tali tali anema apusotsü? Tekolak ajonga menür, aser temulungjang ajak lular. 6Tetsüng temupu telunglen nungi tekolak tashi anema mali; zübutem, mena atepba, aser azü ayimba komo dang; itemji menembang, mesüra talepa malep, aser totzü agi aneba mekümdaktsü.
7Nenok lima azüngmeyaka lir, nenok yimtitem mi agi ronga lir; nenok lima, nenok tsüngdang bendangertemi meyokadoker, aser bendangertemi atsüngdokba ama aji azüngmeyaka lir. 8Aser tsükmenatzü lu nung sempak ki ama, züngi tsüki nung semtu ama, lungbanga aliba yimti ama, Zion jala tokja lir. 9#Lip. 19.24; Rom. 9.2 Temeranger Kibubai asenok asoshi ishikadanga anünga metoktsü asübo, asenok Sodom ama kümer lila, asenok Gomora ama kümer lila.
Anemsübatem Anema
10 Kibuba O angang, nenok Sodom yimsüsürtem, Kibubai sayuba o nung tenarong agüjang, nenok Gomora nisungtem. 11#Amo. 5.21,22 “Tetepsetba tenla paikati ni atema kechi?” ta Kibubai ashir. “San tepung aser tejebketba shiruru temo agi tarongba tenla agütsütsü ni jenti kar; saka nashi pungchi, san chanu mesüra nabong tepung zü nung ni mepelar.”
12“Nenoki kü madangi arudang, kü kilempok nung ajemshitsü, ibai nenok nungi shibai akang? 13Joko amajok tenla teben, teronem menemtsü ni asoshi tesempatsü lir; ita tasen aser amungnü, mungdang jatepba nenok temenen mungdangji ni ajia melitet. 14Nenok ita tasen aser benjongbentsü kü nelai sempar; ni asoshi itemji timtemtsü lir, item jagi ni alaker. 15Anungji, kodang nenok teka songtokdir, ni kü tenük nenok nungi miimadoktsü; nenoki aiben sarasademaka, ni mangashitsü; nenok teka azü agi sünga lir. 16Nenok shitokang, nenok merüka liang; kü nükdang nungi nenok temenen inyakaba endokang; tamajung inyakba anenang; 17tajung inyaktsü angazükang; ochi benshiang, rishikangshir noktangang, tebu malir o bendangjang, amitsürtem temeten asoshi noktakang.”
18“Tang arung, aser asenoki külemi shisadangdi,” ta Kibubai ashir, nenok temenen jakjaa meremaka, itemji rürjeb ama mesüngtsü; azü ama meremaka, itemji kümpa temesüng ama akümtsü. 19Nenoki hai-haura kaa aser tashi angara nenoki linük nungi tajung achitsü; 20saka nenoki ma ta anema apusora, nok agi nenok meyoktsü; kechiyong Kibuba tebang agi aji jembiogo.
21Tamang katetba yimtito kodaser nüktapangtatsür aküm! La dak ochi aser temeshiba agi sünga liasü, saka tangbo nisung tepseter kümogo. 22Ne taribi yinsü küma lir, ne yi tzü den meyoktepa lir. 23Ne yimsüsürtemji anema apusortem kümogo aser auürtem medemer kümogo; nisung shiai süpokrem meimer, aser tajangzük sülen anidaker; parnoki tebu malir mekümzüker mesüra parnok dangi aruba amitsür asoshi ochi mapa meinyaker.
24Anungji Temeranger Kibuba, Israel Takoksang, Kibubai ashir, “Ni kü temerirtem madak tejashi sünemtsü aser ni kü tsükchirtem dak mang ayangtsü. 25Ni na anema kü teka meyiptsü; aser ne yinsü misem nung yimsa-a yoktsü, aser ne temeyoktepba ajak meshitettsü, aser ne yin ajak bener aotsü. 26Mezüng amato ni ne obendangertem aser tetenzükdang ama ne teshisadanger tamarenertem yanglushitsütsü; iba sülen ne dang temulung alemba, temeshi yimti ta ajatsü.”
27Ochi agi Zion alangzüktsü, aser la temulung meyipertem temeshiba agi kümzüktsü. 28Saka ozüng raksartem aser temenenpur asoshi külemi tesamatsü alitsü, aser shirnoki Kibuba senzüka yutsü parnokji samatsü. 29Kechiyong nenoki jangraba sülemdong asoshi nenoki aktsü, aser nenoki shimtetba atsüki asoshi nenoki pangka-a alitsü. 30Kechiyong to ajetba sülemdong ama, aser tzü makaba atsüki ama nenok alitsü. 31Tashi tait nisung tatsüktsü süng ama, aser pa mapa misem ama alitsü; aser anaprong külemi arongtsü, aser aji shingaia meremseptettsü
Currently Selected:
ISAIA 1: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
