Popular Bible Verses from Juan 14

Share

Aywanan ko kamo it katawhayan sa inyong tagipusuon. Rayang katawhayan mismo hay iya man kakon ag ginatao ko ra kinyo. Ro katawhayan nga itao ko kinyo hay eain gid sa katawhayan nga ginatanyag it kalibutan. Ngani ayaw kamo it palitik ag ayaw kamo magpaeuya it inyong buot.

Nagsabat si Jesus, “Ako mismo ro daean paadto sa Dyos Ama. Ako man ro gapahayag kon ano ro matuod parti sa Dyos ag ako ro gatao it kabuhi nga owa it katapusan. Owa it makapaeapit sa akon nga Ama kon indi mag-agi kakon.

Naghambae si Jesus, “Ayaw kamo it palitik kundi lig-una pa gid ro inyong pagsalig sa Dyos ag pati man kakon.

Pero kon owa eon ako, padaehan kamo ku akong Ama it Manogbulig, ag ruyon hay ro Espirito Santo ag imaw ro magabueos kakon. Imaw ro magaturo kinyo it tanan nga butang ag magapadumdum ku tanan nga ginhambae ko kinyo.

Ro nagatanom ku akong mga sugo sa anang paino-ino, ag nagatuman karon hay ruyon ro nagahigugma kakon. Ag ro nagahigugma kakon hay higugmaon ku akon nga Ama. Higugmaon ko man imaw ag akon nga ipahayag kana kon sin-o gid ako.”

Ag pangabayon ko ro akong Ama nga padaehan kamo it magabueos kakon nga Manogbulig agod ibhan nana kamo hasta sa owa it katapusan, ag obrahon ron it akong Ama. Imaw hay ro Espirito Santo nga manogpahayag it kamatuuran halin sa Dyos. Ro mga owa nagatuo kakon hay indi makabaton ku Espirito Santo ay owa ma't-a nanda imaw hakita ag hakilaea. Pero kamo't-a hay nakakilaea kana ay gin-inibhan eon nana kamo ag sa indi magbuhay hay magapabilin imaw sa inyong tagipusuon.

Ag bisan ano ro inyong pangayuon bilang mga sumueunod nakon hay himuon ko, agod dayawon ro Ama paagi kakon nga anang Unga. Umanon ko rang hambae nga bisan ano ro inyong pangayuon kakon bilang mga sumueunod nakon hay himuon ko gid.”

Naghambae pa gid si Jesus, “Kon ginahigugma ninyo ako, pagatumanon gid ninyo ro akong mga sugo.

Sa eangit nga ginaistaran ku akon nga Ama hay kaabo nga maistaran, ag mauna ako idto agod pahauman ko kamo it lugar. Kon bukon it matuod nga kaabo nga maistaran idto hay hambaeon ko baea kamo nga pahauman ko kamo it lugar idto?

Kon haom eon ro lugar para kinyo hay magabalik ako iya ag sueangon ko kamo ag daehon dayon sa akong ginhalinan agod mag-ililiba kita idto.

Ginsabat imaw ni Tomas, “Ginuo, owa ngani kami kasayod kon siin ka gaadto. Hay paalin namon masayran ro daean paadto idto?”