Juan 14

Si Jesus Eang ro Aeagyan it mga Tawo Paadto sa Dyos

1Naghambae si Jesus, “Ayaw kamo it palitik kundi lig-una pa gid ro inyong pagsalig sa Dyos ag pati man kakon. 2Sa eangit nga ginaistaran ku akon nga Ama hay kaabo nga maistaran, ag mauna ako idto agod pahauman ko kamo it lugar. Kon bukon it matuod nga kaabo nga maistaran idto hay hambaeon ko baea kamo nga pahauman ko kamo it lugar idto? 3Kon haom eon ro lugar para kinyo hay magabalik ako iya ag sueangon ko kamo ag daehon dayon sa akong ginhalinan agod mag-ililiba kita idto. 4Sayod eon kamo ku daean sa akong ginaadtunan.”

5Ginsabat imaw ni Tomas, “Ginuo, owa ngani kami kasayod kon siin ka gaadto. Hay paalin namon masayran ro daean paadto idto?”

6Nagsabat si Jesus, “Ako mismo ro daean paadto sa Dyos Ama. Ako man ro gapahayag kon ano ro matuod parti sa Dyos ag ako ro gatao it kabuhi nga owa it katapusan. Owa it makapaeapit sa akon nga Ama kon indi mag-agi kakon. 7Tungod kilaea eon ninyo ako hay makilaea man ninyo pati ro akon nga Ama, ag umpisa makaron hay hikilaea eon ninyo imaw, ay nakita eon ninyo imaw.”

8Naghambae si Felipe, “Ginuo, pakitaan kamon ro imong Ama, ag tama eo't-a ron dayon kamon.”

9Nagsabat si Jesus, “Felipe, mabuhay eon ro akong pag-iniba kinyo ag owa ka't-ing gihapon kakilaea kakon? Ro nakakita kakon hay nakakita man sa akong Ama. Ham-an it gahambae ka pa nga ipakita ko kinyo ro akong Ama? 10Owa ka pa baea gapati nga ako ag ro akong Ama hay may maeueot gid nga kaangtanan nga matsa sambilog eang kami? Ro mga ginasugid ko kinyo hay bukon it akon-akon eang. Kon nagahambae ako, ag nagahimo it mga makangawa-ngawa nga mga butang, ro akon 't-a nga Ama ro nagahimo karon paagi kakon. 11Patihi ninyo nga ako ag ro akong Ama hay sambilog eang. Pero kon indi kamo magpati karon dahil hambae ko manlang, patihi ron ninyo dahil sa mga makangawa-ngawa mismong mga butang nga akong ginaobra.

12“Matuod gid rang ginahambae kinyo nga ro nagatuo kakon hay magahimo it mga makangawa-ngawa pareho sa akong mga ginapanghimo, ag mas pa karon ro anang pagahimuon#14:12 Ro kahueugan siguro kara hay ro pagwali it mensahi parti kay Jesus sa bilog nga kalibutan agod sa gahom it Espirito Santo hay kaabo-abo ro magatuo kana. Ruyon hay mas mahaega pa kaysa sa mga milagro eang. tungod gabalik eon ako sa akong Ama. 13Ag bisan ano ro inyong pangayuon bilang mga sumueunod nakon#14:13 Ro gustong hambaeon kara hay bangod mga sumueunod sanda ni Jesus ngani may diritso sanda nga magpangayo it bisan ano nga suno sa pagbuot it Dyos. hay himuon ko, agod dayawon ro Ama paagi kakon nga anang Unga. 14Umanon ko rang hambae nga bisan ano ro inyong pangayuon kakon bilang mga sumueunod nakon hay himuon ko gid.”

Ginpromisa ni Jesus nga Paadtunon Nana ro Espirito Santo

15Naghambae pa gid si Jesus, “Kon ginahigugma ninyo ako, pagatumanon gid ninyo ro akong mga sugo. 16Ag pangabayon ko ro akong Ama nga padaehan kamo it magabueos kakon nga Manogbulig agod ibhan nana kamo hasta sa owa it katapusan, ag obrahon ron it akong Ama. 17Imaw hay ro Espirito Santo nga manogpahayag it kamatuuran halin sa Dyos. Ro mga owa nagatuo kakon hay indi makabaton ku Espirito Santo ay owa ma't-a nanda imaw hakita ag hakilaea. Pero kamo't-a hay nakakilaea kana ay gin-inibhan eon nana kamo ag sa indi magbuhay hay magapabilin imaw sa inyong tagipusuon.

18“Maskin magpanaw ako hay indi ko kamo pag-aywanan nga matsa mga ilo nga owa it madangpan, kundi mabalik ako kinyo.#14:18 Posible nga ro buot hambaeon ni Jesus dikara hay kon mag-abot eon ro Espirito Santo sa Kaadlawan it *Pentecostes hay pareho man nga si Jesus mismo ro nagbalik ag ro Espirito Santo eon ro andang madangpan. 19Sa indi magbuhay hay indi eon ako hikita ku mga tawo iya sa kalibutan nga owa nagatuo kakon pero makita ninyo ako. Ag bangod mabanhaw ako, kamo hay taw-an it minatuod nga kabuhi. 20Kon mag-abot eon ro adlaw ngaron hay hisayran ninyo nga ako ag ro akong Ama hay may maeueot gid nga kaangtanan nga matsa sambilog eang kami, ag ako ag kamo man hay may maeueot gid nga kaangtanan. 21Ro nagatanom ku akong mga sugo sa anang paino-ino, ag nagatuman karon hay ruyon ro nagahigugma kakon. Ag ro nagahigugma kakon hay higugmaon ku akon nga Ama. Higugmaon ko man imaw ag akon nga ipahayag kana kon sin-o gid ako.”

22Tapos hay nagpangutana si Judas (bukon ra it tag si Judas Iscariote), “Ginuo, ano ro natabo nga kamon eang nimo ipahayag kon sin-o ka gid? Dapat 't-a kunta hay sa tanan nga mga tawo!”

23Nagsabat si Jesus, “Umanon ko rang ginhambae. Kon ginahigugma ako it sangka tawo hay tumanon nana ro akong hambae.#14:23 Ipahayag eang ni Jesus kon sin-o gid imaw sa mga naila magbaton ag magtuman ku anang hambae. Higugmaon imaw ku akon nga Ama ag kami ku Ama hay magaadto kana ag magaistar sa anang tagipusuon. 24Pero ro owa nagahigugma kakon hay owa gatuman sa akon nga hambae. Ro akong ginahambae kinyo hay bukon it akon-akon eang kundi tag ginapahambae kakon ku Ama nga nagpadaea kakon iya.

25“Ginasugid ko ro mga butang ngara kinyo samtang iya pa ako kaibahan ninyo. 26Pero kon owa eon ako, padaehan kamo ku akong Ama it Manogbulig, ag ruyon hay ro Espirito Santo ag imaw ro magabueos kakon. Imaw ro magaturo kinyo it tanan nga butang ag magapadumdum ku tanan nga ginhambae ko kinyo. 27Aywanan ko kamo it katawhayan sa inyong tagipusuon. Rayang katawhayan mismo hay iya man kakon ag ginatao ko ra kinyo. Ro katawhayan nga itao ko kinyo hay eain gid sa katawhayan nga ginatanyag it kalibutan. Ngani ayaw kamo it palitik ag ayaw kamo magpaeuya it inyong buot.

28“Ginhambae ko eon kinyo nga mapanaw ako pero mabalik man ako kinyo. Kon ginahigugma gid ninyo ako hay malipay kunta kamo ay gabalik ako sa akong Ama tungod eabaw pa imaw kakon.#14:28 Si Jesus ag ro Dyos Ama hay pareho nga Dyos (basaha sa 1:1, 10:38 ag 14:20), ugaling ginpaiway ni Jesus ro anang kinamatarong bilang katupong it Dyos Ama agod magpakatawo (basaha sa Fil 2:6). Bilang tawo hay eabaw gid kana ro Dyos Ama pero kon parti ma't-a sa andang pagkaDyos hay pareho sanda nga Dyos. 29Ginsugid ko eon ra kinyo bago pa ra matabo agod kon matabo eon hay mas galig-on pa gid ro inyong pagtuo kakon. 30Indi eon ako makaistorya pa kinyo it maeawig tungod si Satanas nga manogdumaea it mga owa nagatuo sa Dyos hay gaabot eon. Owa ako it nahimo nga saea nga magamit nana agod magamhan ako. 31Pero ginabaton ko ro madali lang matabo kakon agod ipakita sa mga tawo nga ginahigugma ko ro akong Ama, ag ginatinuman ko permi kon ano ro anang ginsugo kakon. Musyon kamo, mapanaw eon kita.”

Currently Selected:

Juan 14: akl

Highlight

Copy