Juan 15

Ro Kapareho ni Jesus hay Puno it Ubas ag ro Anang mga Sumueunod hay ro mga Sanga

1Bago sanda nagpanaw, nagturo anay si Jesus paagi sa rayang halimbawa. Hambae nana, “Ako ro minatuod nga puno it ubas ag ro akon nga Ama ro manogdipara. 2Ana nga ginaputoe ro kada sanga nga owa gabunga. Pero ro mga sanga nga nagabunga hay ana nga ginapungoe agod magbunga pa gid it abo. 3Kamo hay pareho it mga sanga nga ginpungoe ag malimpyo eon kamo, ay ginpatawad eon kamo dahil nagpati kamo sa mensahi nga akong ginhambae kinyo. 4Padayon sa inyong maeueot nga kaangtanan kakon ag makaruyon man ro akong kaangtanan kinyo. Ro sanga hay indi makapamunga nga imaw eang kundi dapat hay padayon imaw nga nakaangot sa puno. Makaruyon man kamo. Indi kamo makapamunga kon indi kamo magpadayon sa inyong maeueot nga kaangtanan kakon.

5“Ako ro puno it ubas ag kamo ro mga sanga. Ro nagapadayon sa anang maeueot nga kaangtanan kakon, ag makaruyon man ro akong kaangtanan kana, ruyon ro gabunga it abo. Matuod ra dahil kon owa kamo nakaangot kakon hay indi gid kamo makapamunga. 6Ro owa nagapadayon sa anang maeueot nga kaangtanan kakon hay pareho it inutod nga mga sanga nga eangkay eon. Tipunon dayon sanda ag ginaitsa sa kaeayo agod masunog. 7Pero kon nagapadayon kamo sa inyong maeueot nga kaangtanan kakon ag padayon nga nakatanom sa inyong paino-ino ro akong hambae, pangayo kamo sa Ama it bisan ano nga inyong gusto, ag itao ron nana kinyo. 8Gapakilaea nga mga matuod nakon kamo nga mga sumueunod kon nagabinunga kamo it abo, ag duyon ro makatao it dungog sa akon nga Ama.

9-10“Ginahigugma ko kamo pareho ku paghigugma kakon ku akon nga Ama, ngani padayuna ninyo ro pagtuman sa akong mga sugo. Kon himuon ninyo ron, permi ninyo nga mabatyagan ro akon nga padayon nga paghigugma kinyo. Pareho man kakon, tungod ginatuman ko permi ro mga sugo ku akon nga Ama ngani permi ko nga habatyagan ro anang padayon nga paghigugma kakon. 11Ginasugid ko kinyo rondaya nga mga butang agod ro minatuod nga kalipay nga iya kakon hay mangin una man kinyo ag agod mangin tueos gid ro inyong kalipay ngaron.

12“Raya ro akon nga sugo kinyo: Maghigugmaanan kamo pareho ku akong paghigugma kinyo. 13Owa eon it paghigugma nga makatupong pa sa paghigugma it sangka tawo nga haom magsakripisyo ku anang kabuhi para sa anang mga amigo. 14Kamo hay akong mga amigo kon ginatuman ninyo ro akong mga sugo kinyo. 15Owa ko eon kamo ginatawga nga mga ulipon kundi mga amigo. Ro ulipon abi hay owa't-a nakasayod kon ano ro ginaisip ku anang amo, pero kamo't-a hay akong ginpasayod ku tanan nga ginhambae kakon ku akong Ama. 16Bukon it kamo ro nagpili kakon kundi ako't-a ro nagpili ag nagbutang kinyo sa oeobrahon it pagpanaw ag pagturo parti kakon, agod magtuo man ro ibang tawo kakon.#15:16 Sa Griniyego, raya hay “agod magpanaw kamo ag magbunga.” Ro bunga ku inyong pagkabudlay ngaron hay magapadayon bisan hasta hin-uno. Ag dahil karon hay taw-an kamo ku Ama it bisan ano nga inyong pangayuon sa akon nga ngaean. 17Ginahambae ko it uman ro akong sugo kinyo, maghigugmaanan kamo.”

Ro mga Sumueunod ni Jesus hay Ginakaugtan ku mga Owa Nagatuo Kana

18Naghambae pa gid si Jesus, “Ayaw kamo it kangawa kon kaugtan kamo ku mga owa nagatuo kakon. Dumduma ninyo nga ako ro una nandang ginkaugtan bago kamo. 19Kon pareho kamo kanda nga owa nagatuo kakon hay mailaan 't-a nanda kamo ay paeareho abi kamo. Pero bukon kamo it pareho kanda ay ginpili ko kamo agod bukon eon kamo it kaibahan ku mga owa nagatuo kakon. Mawron nga ginakaugtan nanda kamo. 20Dumduma ninyo ro akong ginhambae kato kinyo nga ro ulipon hay bukon it eabaw pa sa anang amo. Ngani kon ginhingabot nanda ako, hingabuton man nanda kamo. Pero kon tumanon nanda ro akong ginaturo hay tumanon man nanda ro inyong ginaturo. 21Pero himuon nanda ro tanan ngaron nga mga paghingabot kinyo dahil nagatuo kamo kakon, ag tungod saea ro andang pagkakilaea sa Dyos nga nagpadaea iya kakon. 22Kon owa ako nag-adto iya agod sugiran sanda parti kakon hay owa kunta sanda it saeabton sa andang saea nga owa sanda nagtuo kakon. Pero owa eon sanda makaron it bangdanan sa anda ngaron nga saea kakon. 23Ro naugot kakon hay naugot man sa Ama. 24Ag kon owa ako nag-obra sa anda mismo nga atubang it mga makangawa-ngawa nga owa it bisan sin-o nga makahimo mageuwas kakon hay owa sanda it saeabton sa andang saea nga owa sanda nagtuo kakon. Pero makaron nga hakita eon nanda ro akong mga gin-obra hay ginakaugtan gihapon nanda kami ku akon nga Ama. 25Pero natabo ra agod matuman ro ginsueat sa Sagrado nga Kasueatan nga anda perming ginabasehan nga, ‘Ginkaugtan nanda ako bisan owa man it dahilan.’#15:25 Salmo 35:19; 69:4.

26“Pag-abot ku Manogbulig nga akon nga ipadaea iya kinyo halin sa akon nga Ama, pamatud-an 't-a nana ro mensahi parti kakon. Imaw hay ro Espirito Santo nga manogpahayag it kamatuuran halin sa Dyos. 27Ag kamo man hay magasugid ku inyong hasaksihan kakon ay kaibahan ko eon kamo halin pa ku primero.”

Currently Selected:

Juan 15: akl

Highlight

Copy