Popular Bible Verses from मरकुस 13

Share

कने मेरे नांऐ दे खातर सारे माणु तुहां नैं बैर करगे अपर जेह्ड़ा आखरी तिकर सबर रखगा, तिसदा ई उद्धार हुंगा।”

दिक्खा, जागदे कने प्रार्थना करदे रेह्आ; क्जोकि तुहां नीं जाणदे कि सैह़ बग्त काह़लू ओंगा।

जाह़लू लोक तुहां जो पकड़ी करी पंचायती दे हुआले करगे, तां एह़ फिकर मत करदे, ‘कि अहां क्या ग्लांगे।’ अपर जेह्ड़ा कुच्छ तुहां जो तिसी बग्त दस्सेया जांगा सैई ग्लाणा; क्जोकि ग्लाणे आल़े तुहां नीं, अपर पवित्र आत्मा ऐ।

अम्बर कने धरती टल़ी सकदे हन, अपर मेरियां गल्लां कदी टल़ी नीं सकदियां।

“एह़ गल्लां काह़लू हुंगिया, तिस दिन दे कने तिस बग्त दे बारे च कोई नीं जाणदा, ना सुअर्गे दे सुअर्गदूत कने ना पुत्तर; अपर सिर्फ पिता परमात्मा जाणदा ऐ।

जाह़लू तुहां लडाईयां, कने लड़ाईयां दी चर्चा सुणगे, तां घबरांदे मत; क्जोकि इन्हां दा होणा जरूरी ऐ, अपर तिस बग्त अन्त नीं हुंगा।

“यीशुयैं भिरी ग्लाया, इसतांई जागदे रेह्आ क्जोकि तुहां नीं जाणदे कि घरे दा मालक काह़लू ओंगा, संझा जो या अधिया राती, या कुक्ड़े दे बांग दैणे दे बग्त या तड़के जो। इआं नीं होयैं कि सैह़ चाणचक आई नैं तुहां जो सुतेयो दिक्खैं। कने जेह्ड़ा मैं तुहां नैं ग्लादा ऐ, सैई सारेयां जो ग्लादा ऐ: ‘जागदे रेह्आ।’”

क्जोकि जाति पर जाति, कने देस पर देस चढ़ाई करगा। कने जगाह-जगाह हिल्लण हुंगे, कने अकाल पोंगे। एह़ तां तकलीफां दी सुरुआत हुंगी।

अपर जरूरी ऐ कि अन्त होणे ते पैहल्ले सुसमाचार संसारे दी सारियां जातिआं च प्रचार कित्ता जां।

इसतांई कि मेरे नांऐ ते मते झूठे लोक मसीह होणे दा दावा करी नैं मतेआं लोकां जो भटकाई दिंगे।

“जाह़लू इन्हां गल्लां दी सुरुआत हुंगी तां तुहां चौकन्ने रैहणा, क्जोकि माणु तुहां जो पंचायती दे हुआले करगे कने तुहां आराधनालयां च कुट्टे जांगे, कने मेरिया बज़ाह ते हाकमां कने राजेयां अल्ल पेस कित्ते जांगे, तांजे तिन्हां तांई गवाही होयैं।

क्जोकि झूठे मसीह कने झूठे भविष्यवक्ता उठी खड़ोंगे, कने चमत्कार, कने अनोखे कम्म दस्सगे, जे होई सकैं परमात्मे दे चुणेयां लोकां जो भी भटकाई दैन।

“अपर तिन्हां दिनां च, तकलीफां दे बाद सूरजे च नेहरा छाई जांगा, कने चन्द्रमा रोशनी नीं दिंगा, कने अम्बरे ते तारे टिरणा लग्गी पोंगे; कने अम्बरे दियां सक्तियां हिलाईयां जांगियां।