मरकुस 13

मंदरे दे विनाशे दी भविष्यवाणी

(मत्ती 21:33-46; लूका 20:9-19)

1जाह़लू यीशु मंदरे ते निकल़ा दा था, तां तिसदे चेलेयां च इक्की तिसियो ग्लाया, “हे गुरू दिक्खा, कदेय-कदेय पत्थर कने कदेय छैल़ भवन हन।” 2यीशुयैं तिस चेले नैं ग्लाया, “क्या तू इन्हां बड्डे-बड्डे भवना जो दिक्खा दा ऐ? एह़ सारे पत्थरां दे बणायो भवन इक्क दिन पूरे तरीके नैं नास कित्ते जांगे।”

मुसीबत कने दुख

(मत्ती 24:3-14; लूका 21:7-19)

3ताह़लू यीशु जैतूने दे प्हाड़े पर मंदरे दे सामणै बैठेया था, तां पतरसैं कने याकूबे, यूहन्ने कने अन्द्रियासैं पड़दे नैं जाई नैं तिसते पुछया, 4“अहां जो दस्सा कि एह़ गल्लां काह़लू होणियां हन? कने जाह़लू एह़ सारियां गल्लां पूरियां होणे पर हुंगियां तां तिस बग्त दा क्या नसाण हुंगा?” 5यीशु तिन्हां नैं ग्लाणा लग्गा, “चौकन्ने रेह्आ। कि कोई तुहां जो भटकाई नीं दैं। 6इसतांई कि मेरे नांऐ ते मते झूठे लोक मसीह होणे दा दावा करी नैं मतेआं लोकां जो भटकाई दिंगे। 7जाह़लू तुहां लडाईयां, कने लड़ाईयां दी चर्चा सुणगे, तां घबरांदे मत; क्जोकि इन्हां दा होणा जरूरी ऐ, अपर तिस बग्त अन्त नीं हुंगा। 8क्जोकि जाति पर जाति, कने देस पर देस चढ़ाई करगा। कने जगाह-जगाह हिल्लण हुंगे, कने अकाल पोंगे। एह़ तां तकलीफां दी सुरुआत हुंगी।

9“जाह़लू इन्हां गल्लां दी सुरुआत हुंगी तां तुहां चौकन्ने रैहणा, क्जोकि माणु तुहां जो पंचायती दे हुआले करगे कने तुहां आराधनालयां च कुट्टे जांगे, कने मेरिया बज़ाह ते हाकमां कने राजेयां अल्ल पेस कित्ते जांगे, तांजे तिन्हां तांई गवाही होयैं। 10अपर जरूरी ऐ कि अन्त होणे ते पैहल्ले सुसमाचार संसारे दी सारियां जातिआं च प्रचार कित्ता जां। 11जाह़लू लोक तुहां जो पकड़ी करी पंचायती दे हुआले करगे, तां एह़ फिकर मत करदे, ‘कि अहां क्या ग्लांगे।’ अपर जेह्ड़ा कुच्छ तुहां जो तिसी बग्त दस्सेया जांगा सैई ग्लाणा; क्जोकि ग्लाणे आल़े तुहां नीं, अपर पवित्र आत्मा ऐ। 12कने भाऊ जो भाऊ, कने बुढ़ा अपणे बच्चे जो मरुवाणे तांई दिंगा, कने बच्चे माँऊ-बुढ़े दे खलाफ होई नैं तिन्हां जो मरवाई दिंगे। 13कने मेरे नांऐ दे खातर सारे माणु तुहां नैं बैर करगे अपर जेह्ड़ा आखरी तिकर सबर रखगा, तिसदा ई उद्धार हुंगा।”

बड़िया मुसीबता दा बग्त

(मत्ती 24:15-28; लूका 21:20-24)

14यीशुयैं भिरी ग्लाया, “पढ़णे आल़ा समझी लैं। जाह़लू तुहां तिसा उजाड़णे आल़ी घृणित चीज्जा जो, जिसादे बारे च दानिय्येल भविष्यवक्तैं दस्सेया था, औत्थू खड़ोतियो दिक्खन, जित्थु तिसा जो नीं होणा चाइदा, ताह़लू जेह्ड़े लोक यहूदिया प्रदेसे च होन सैह़ प्हाड़ां पर नठ्ठी जान। 15जेह्ड़े छत्ती पर हुंगे, सैह़ अपणे घरे ते कुच्छ भी लैणे तांई थल्लै नीं लौन, कने अंदर नीं जान। 16कने जेह्ड़े खेतां च हुंगे, सैह़ अपणा कपड़े लैणे तांई पचांह़ ना हटन। 17तिन्हां जणासां तांई खतरनाक बग्त हुंगा, जेह्ड़ियां गर्भवती कने बच्चेयां जो दुद पिलाणे आल़िआं हुंगी, तिस बग्त तिन्हां तांई नठणा बड़ा औखा होई जांगा। 18कने परमात्मे नैं प्रार्थना करा कि एह़ ठंडी दे दिनां च ना होयैं। 19क्जोकि इन्हां दिनां च बड़ियां तकलीफां हुंगियां जिंआं कि सृष्टिया दी सुरुआत ते, जेह्ड़ी परमात्मैं बणाईयो ऐ, अज्जे तिकर ना तां होईयां ना तां भिरी कदी हुंगियां। 20कने जे प्रभु तिन्हां दिनां जो नीं घटांदा, तां कोई भी माणु नीं बचणा; अपर तिन्हां चुणेयां दिया बज़ाह ते जिन्हां जो परमात्मे चुणेया ऐ; तिन्हां दिनां जो घटाया। 21तिस बग्त जे कोई तुहां नैं ग्लां, ‘दिक्खा, मसीह ऐत्थु ऐ,’ या ‘दिक्खा औत्थू ऐ,’ तां बिलकुल बसुआस मत करदे। 22क्जोकि झूठे मसीह कने झूठे भविष्यवक्ता उठी खड़ोंगे, कने चमत्कार, कने अनोखे कम्म दस्सगे, जे होई सकैं परमात्मे दे चुणेयां लोकां जो भी भटकाई दैन। 23अपर तुहां चौकन्ने रेह्आ। दिक्खा, इन्हां मुसीबतां ओणे ते पैहल्ले ई सारियां गल्लां मैं तुहां जो दस्सी दित्तियां हन।

माणुये दे पुत्तरे दा दुवारी औणां

(मत्ती 24:29-31; लूका 21:25-28)

24“अपर तिन्हां दिनां च, तकलीफां दे बाद सूरजे च नेहरा छाई जांगा, कने चन्द्रमा रोशनी नीं दिंगा, 25कने अम्बरे ते तारे टिरणा लग्गी पोंगे; कने अम्बरे दियां सक्तियां हिलाईयां जांगियां।

26“ताह़लू लोक मिन्जो माणु दे पुत्तरे जो बड़िया सामर्था कने महिमा सौगी बदल़ां पर ओंदेया दिक्खगे। 27तिस बग्त मैं अपणे सुअर्गदूतां जो घल्ली नैं, धरतिया दे इस बन्नें ते लेई नैं अम्बरे दे दूये बन्नें तिकर, चौंन्नी बक्खेयां ते अपणेयां चुणेयां लोकां जो कठ्ठेरगा।

धूड़े दे रूखे दा उदारण

(मत्ती 24:32-35; लूका 21:29-33)

28“धूड़े दे रूखे ते एह़ सिक्षा लेआ: जाह़लू तिसदियां डाल़िआं नरम होई जांदियां, कने पत्तर निकल़णा लगदे हन; तां तुहां जाणी लैंदे हन, कि गर्मिया दा मौसम ओणे आल़ा ऐ। 29इसी तरीके नैं जाह़लू तुहां इन्हां गल्लां जो हुंदेया दिक्खगे, तां जाणी लैनेयों कि मेरा औणां नेड़े ऐ, कने मैं दुवारी ते भिरी ओणे आल़ा ऐ। 30मैं तुहां नैं सच्च ग्लांदा ऐ, कि जाह़लू तिकर एह़ सारियां गल्लां पूरी नीं होई लैंन, ताह़लू तिकर इसा पीढ़िया दे लोकां दा अन्त नीं हुंगा। 31अम्बर कने धरती टल़ी सकदे हन, अपर मेरियां गल्लां कदी टल़ी नीं सकदियां।

जागदे रेह्आ

(मत्ती 24:36-44)

32“एह़ गल्लां काह़लू हुंगिया, तिस दिन दे कने तिस बग्त दे बारे च कोई नीं जाणदा, ना सुअर्गे दे सुअर्गदूत कने ना पुत्तर; अपर सिर्फ पिता परमात्मा जाणदा ऐ। 33दिक्खा, जागदे कने प्रार्थना करदे रेह्आ; क्जोकि तुहां नीं जाणदे कि सैह़ बग्त काह़लू ओंगा। 34एह़ बग्त तिस माणुये साइआं ऐ, जेह्ड़ा परदेस जांदे बग्त अपणा घरबार छड्डी जां, कने अपणे दासां जो हक्क दे, कने हर इक्क जो तिसदा कम्म दस्सी दैं, कने चौंकीदारे जो जागदे रैहणे दा हुक्म दैं।

35“यीशुयैं भिरी ग्लाया, इसतांई जागदे रेह्आ क्जोकि तुहां नीं जाणदे कि घरे दा मालक काह़लू ओंगा, संझा जो या अधिया राती, या कुक्ड़े दे बांग दैणे दे बग्त या तड़के जो। 36इआं नीं होयैं कि सैह़ चाणचक आई नैं तुहां जो सुतेयो दिक्खैं। 37कने जेह्ड़ा मैं तुहां नैं ग्लादा ऐ, सैई सारेयां जो ग्लादा ऐ: ‘जागदे रेह्आ।’”

Currently Selected:

मरकुस 13: XNR

Highlight

Copy