Popular Bible Verses from MATEO 6

Share

Apang pangitaa anay ninyo ang ginharian sang Dios kag ang iya pagkamatarung, kag tanan ini nga butang idugang sa inyo.

“Busa dili kamo maghimud-os nahanungud sang buwas, kay ang buwas may iya kaugalingon nga paghimud-os. Tuman na sa adlaw ang iya kalainan.

“Busa nagasiling ako sa inyo, dili kamo maghimud-os nahanungud sang inyo kabuhi, kon ano ang inyo kaonon ukon ano ang inyo imnon, bisan pa nahanungud sang inyo lawas, kon ano ang inyo ipanaput. Indi bala ang kabuhi labi sa kalan-on, kag ang lawas sa panapton?

Apang kon magpangamuyo ka, sulud sa imo hulut kag sa natakup ang imo ganhaan magpangamuyo sa imo Amay nga yara sa tago; kag ang imo Amay nga nagatan-aw sa tago magabalus sa imo.

Busa pangamuyo kamo sing subong sini: Amay namon nga yara sa langit, Pakabalaanon ang imo ngalan. Magkari ang imo ginharian, Paghimoon ang imo kabubut-on, Sa duta subong sang sa langit.

Hatagi kami karon nga adlaw sang amon kalan-on sa adlawadlaw

Kag patawara kami sang mga utang namon, Subong nga ginpatawad man namon ang mga nakautang sa amon

Kag dili kami pagdalha sa panulay, Kondi luwasa kami sa malaut. [Kay imo ang ginharian kag ang kagamhan kag ang himaya, sa walay katubtuban. Kabay pa.]

Kay kon patawaron ninyo ang mga tawo sang ila mga paglapas, ang inyo langitnon nga Amay magapatawad man sa inyo

Tan-awa ang mga pispis sa langit: Wala sila nagasab-ug ukon nagaani ukon nagatipon sa mga tambobo, kag ginapakaon sila sang inyo Amay nga langitnon. Indi bala kamo mahal pa sa ila?

“Dili kamo magtipon sa inyo kaugalingon sing mga bahandi sa duta, diin ang sipit kag ang tuktuk nagapapas kag diin ang mga makawat nagaguhab kag nagapangawat, kondi magtipon kamo sa inyo kaugalingon sing mga bahandi sa langit, diin walay sipit kag tuktuk nga nagapapas kag diin ang mga makawat indi magguhab kag magpangawat. Kay kon diin ang inyo bahandi, didto man ang inyo tagiposoon.

“Wala sing tawo nga makaalagad sa duha ka agalon; kay magadumut sia sa isa kag magahigugma sa isa, ukon magadampig sia sa isa kag magatamay sa isa. Indi kamo makaalagad sa Dios kag sa manggad.

Apang kon ang hilamon sa latagon, nga karon yara kag buwas idap-ung sa dapog, ginapapanaptan sang Dios sing subong, indi bala magpapanaput sia sing labi pa sa inyo, O mga diotay sing pagtoo?

Apang kon ikaw magpanglimos, dili pagpahibaloa ang kamut mong wala sang ginahimo sang imo too, agud nga ang imo limos matago; kag ang imo Amay nga nagatan-aw sa tago magabalus sa imo.

“Andam kamo nga indi maghimo sang inyo pagkamasinimbahon sa atubangan sang mga tawo agud nga makita nila; kay niyan wala kamo sing balus sa inyo Amay nga yara sa langit.

“Kag kon magpuasa kamo, dili kamo magpakita sing mga nawung nga masinulub-on, subong sang mga salimpapaw, kay nagabalhin sila sang ila mga nawung sa pagpakita sa mga tawo nga nagapuasa sila. Sa pagkamatuud, ako nagasiling sa inyo, nabaton na nila ang ila balus. Apang kon magpuasa ka, hisoi ang imo olo kag hilam-usi ang imo nawung, agud nga indi makita sang mga tawo nga ikaw nagapuasa kondi sang imo Amay nga yara sa tago; kag ang imo Amay nga nagatan-aw sa tago magabalus sa imo.