MATEO 6

Ang Pagtolon-an ni Jesus nahanungud sa Panglimos

1“Andam kamo nga indi maghimo sang inyo pagkamasinimbahon sa atubangan sang mga tawo agud nga makita nila;#Mat. 23:5. kay niyan wala kamo sing balus sa inyo Amay nga yara sa langit.

2“Busa, kon ikaw magpanglimos, dili ka magpatonog sing budyong sa imo atubangan, subong sang ginahimo sang mga salimpapaw sa mga sinagoga kag sa mga dalan, agud pagdayawon sila sang mga tawo. Sa pagkamatuud, ako nagasiling sa inyo, nabaton na nila ang ila balus. 3Apang kon ikaw magpanglimos, dili pagpahibaloa ang kamut mong wala sang ginahimo sang imo too, 4agud nga ang imo limos matago; kag ang imo Amay nga nagatan-aw sa tago magabalus sa imo.

Ang Pagtolon-an ni Jesus nahanungud sa Pangamuyo

5“Kag kon ikaw magpangamuyo, dili ka magsubong sa mga salimpapaw; kay maluyag sila magtindug kag magpangamuyo sa mga sinagoga kag sa mga nasikohan sang mga dalan, agud nga makita sila sang mga tawo.#Luc. 18:10-14. Sa pagkamatuud, ako nagasiling sa inyo, nabaton na nila ang ila balus. 6Apang kon magpangamuyo ka, sulud sa imo hulut kag sa natakup ang imo ganhaan#Isa. 26:20. magpangamuyo sa imo Amay nga yara sa tago; kag ang imo Amay nga nagatan-aw sa tago magabalus sa imo.

Ang Amay Namon

(Luc. 11:1-4)

7“Kag sa nagapangamuyo dili maggamit sing mga pagsulitsulit nga walay pulus subong sang mga Gentil; nga nagahunahuna nga pamatian sila tungud sang ila madamung paghambal. 8Dili kamo magpakig-angay sa ila, kay ang inyo Amay nakahibalo sang inyo kinahanglan sa wala pa kamo magpangayo sa iya. 9Busa pangamuyo kamo sing subong sini:

Amay namon nga yara sa langit,

Pakabalaanon ang imo ngalan.

10Magkari ang imo ginharian,

Paghimoon ang imo kabubut-on,

Sa duta subong sang sa langit.

11Hatagi kami karon nga adlaw sang amon kalan-on sa adlawadlaw;

12Kag patawara kami sang mga utang namon,

Subong nga ginpatawad man namon ang mga nakautang sa amon;

13Kag dili kami pagdalha sa panulay,

Kondi luwasa kami sa malaut.

[Kay imo ang ginharian kag ang kagamhan kag ang himaya,#1 Cron. 29:11. sa walay katubtuban. Kabay pa.]

14Kay kon patawaron ninyo ang mga tawo sang ila mga paglapas, ang inyo langitnon nga Amay magapatawad man sa inyo; 15apang kon indi ninyo pagpatawaron ang mga tawo sang ila mga paglapas, indi man ang inyo Amay magpatawad sang inyo mga paglapas.#Mar. 11:25-26.

Ang Pagtolon-an ni Jesus nahanungud sa Pagpuasa

16“Kag kon magpuasa kamo, dili kamo magpakita sing mga nawung nga masinulub-on, subong sang mga salimpapaw, kay nagabalhin sila sang ila mga nawung sa pagpakita sa mga tawo nga nagapuasa sila. Sa pagkamatuud, ako nagasiling sa inyo, nabaton na nila ang ila balus. 17Apang kon magpuasa ka, hisoi ang imo olo kag hilam-usi ang imo nawung, 18agud nga indi makita sang mga tawo nga ikaw nagapuasa kondi sang imo Amay nga yara sa tago; kag ang imo Amay nga nagatan-aw sa tago magabalus sa imo.

Mga Bahandi sa Langit

(Luc. 12:32-34)

19“Dili kamo magtipon sa inyo kaugalingon sing mga bahandi sa duta, diin ang sipit kag ang tuktuk nagapapas#Sant. 5:2-3. kag diin ang mga makawat nagaguhab kag nagapangawat, 20kondi magtipon kamo sa inyo kaugalingon sing mga bahandi sa langit, diin walay sipit kag tuktuk nga nagapapas kag diin ang mga makawat indi magguhab kag magpangawat. 21Kay kon diin ang inyo bahandi, didto man ang inyo tagiposoon.

Ang Suga sang Lawas

(Luc. 11:33-36)

22“Ang suga sang lawas amo ang mata. Busa, kon ang imo mata maayo, ang bug-os mong lawas mapuno sang kapawa; 23apang kon ang imo mata malain, ang bug-os mong lawas mapuno sang kadulum. Busa kon ang kapawa nga yara sa imo amo ang kadudulman, daw ano kadaku ang kadudulman!

Ang Dios kag ang Manggad

(Luc. 16:13)

24“Wala sing tawo nga makaalagad sa duha ka agalon; kay magadumut sia sa isa kag magahigugma sa isa, ukon magadampig sia sa isa kag magatamay sa isa. Indi kamo makaalagad sa Dios kag sa manggad.

Ang Paghimud-os

(Luc. 12:22-31)

25“Busa nagasiling ako sa inyo, dili kamo maghimud-os nahanungud sang inyo kabuhi, kon ano ang inyo kaonon ukon ano ang inyo imnon, bisan pa nahanungud sang inyo lawas, kon ano ang inyo ipanaput. Indi bala ang kabuhi labi sa kalan-on, kag ang lawas sa panapton? 26Tan-awa ang mga pispis sa langit: Wala sila nagasab-ug ukon nagaani ukon nagatipon sa mga tambobo, kag ginapakaon sila sang inyo Amay nga langitnon. Indi bala kamo mahal pa sa ila? 27Kag sin-o bala sa inyo nga tungud sa paghimud-os makadugang sing isa ka maniko sa iya kataason?#6:27 Ukon kalawigon sang kabuhi. 28Kag ngaa bala nagahimud-os kamo nahanungud sa panapton? Talupangda ninyo ang mga lirio sa latagon, daw ano ang pagtubo nila; wala sila nagapangabudlay ukon nagapamorong; 29apang nagasiling ako sa inyo, nga bisan pa si Salomon sa bug-os niyang himaya#1 Hari 10:4-7; 2 Cron. 9:3-6. wala mapanapti subong sang isa sini sa ila. 30Apang kon ang hilamon sa latagon, nga karon yara kag buwas idap-ung sa dapog, ginapapanaptan sang Dios sing subong, indi bala magpapanaput sia sing labi pa sa inyo, O mga diotay sing pagtoo? 31Busa dili kamo maghimud-os, nga nagasiling, ‘Ano bala ang aton kaonon?’ ukon ‘Ano ang aton imnon?’ ukon ‘Ano ang aton ipanaput?’ 32Kay ang mga Gentil nagapangita sini tanan nga butang; kag ang inyo Amay nga langitnon nakahibalo nga kamo may kinahanglan sini tanan. 33Apang pangitaa anay ninyo ang ginharian sang Dios kag ang iya pagkamatarung, kag tanan ini nga butang idugang sa inyo.

34“Busa dili kamo maghimud-os nahanungud sang buwas, kay ang buwas may iya kaugalingon nga paghimud-os. Tuman na sa adlaw ang iya kalainan.

Currently Selected:

MATEO 6: ABHIL82

Highlight

Copy