UBWANDILO 49
49
Ubusololi bwa Yakobu ku banake
1Popapo Yakobu alinkubakolela abanake, alinkubabula alinkuti, “Amubungane pamopene mwesa, ko kuti mbabule isi sisakubagwilaga mmasiku aga gikwisaga. 2Amubungane mwesa, mupilikege mwe bana ba Yakobu, mumbilikisye une ne gwisemwe Israeli.
3Ugwe Rubeni, yo ugwe gwakipanda gwangu,
yo ugwe maka gangu, kangi yo ugwe seke syakwanda isya maka gangu.
Ugwe ukindilile ndwitufyo, na mmaka ku banangu bosa.
4Ukwenda na bu bukali bwene, uliti bo lu Lusoko ulu lutekile,
loli utisakuyaga ngindikigwa kangi ukubakinda abamyinu,
papo gwafyukile pa kitala kya ne guso;
ulinkufyuka pa kitala kila,
ulinkukinyasya ikitala kyangu iki nikutukisyapo.
5Simeoni na Levi banyamundu;
aba ifibombelo fyabo bafipelile ukuya nyubo sya bwite.
6Gwe ndumbula yangu, ungitupikaga ndukomano lyabo;
gwe moyo gwangu, ungasulwa ukwiyingisya nkilundilo kyabo;
namanga mbukalale bwabo bikugoga na bandu bubo,
kangi mbwalangani bwabo bikusifulasya na si ng'ombe bubo.
7Bugunigwe ubukali bwabo ubu bukupela ulutende!
Lyope nilyoyo lyabo ili likaya nulupakisyo nalumo ligunigwege itolo.
Nikuya pakubakaga ukuti babalanilege nkisu kyosa kya Yakobu,
nukubanyambanikisya kosakosa nkisu kya Israeli.
8Ugwe Yuda, abamyinu bisakukupalaga,
amaka gako gisakubalambika abalugu bako,
bope na ba bamyinu bisakukulambilaga ugwe.
9 #
Kuba 24.9; Buset 5.5 Yuda ali bo yu mwana gwa ngalamu
uyu ikugomokela ku bwibililo bwake bo afumile nkufwima.
Yuda afwene itolo ni ngalamu ingikulu
iyi yikwitendekesya ukunyela,
alipo ywani unkifu uyu abagile ukunsambukila?
10Ubulagili butisakusokamo siku nkikolo kya nyumba ya Yuda,
yope ningili iyi akolile undagili gwa kisu yo yitisakusokamo siku mmyake,
yisakwendelelaga bwila itolo abuye ise uyu yo mwenenayo.
11Mu mpiki gwake ugwa mafilu mo ayipinyile imwana ya mbunda,
mu mpiki gwa mafilu ugu go nkinde ubununu;
mbwalwa bwa mafilu mo ikusuka imyenda gyake,
ikusuka ifyakufwala fyake mbwalwa bwa mafilu ubu bufwene ilopa.
12Amaso gake gakeselile nu bwalwa bwa mafilu ubu ikunwa;
kangi amino gake gali swee itolo panongwa ya lukama ulu ikunwa.
13Zebuloni yo isakwitugalaga pa mbali pa nyanja;
mfiloboko fyake mo sisakwimaga ingalaba
ikyene ikisu kyake kikwakufikaga na ku kiloboko kya Sidoni.
14Isakara yo gwa maka, aliti bo yi mbunda,
iyi yilambalele mmatembe ga ng'ombe.
15Bo aketile ukuti kununu ukwitugala mmigunda kangi kyope ni kisu kikuboneka ubununu pakukiketa,
alinkwipela ukuya gwakupimba imitwalo
kangi alinkwipela ukuya ntumwa gwakubomba imbombo ingafu.
16Dani yo isakuyaga gwakubalagila abandu bake,
bo mumo bikubombela abangi mfikolo fya Israeli.
17Dani yo isakuyaga bo yi njoka iyi yili pa njila,
bo yu kitumbi ungasi uyu ali pa mbali pa njila,
uyu ikusiluma ifalasi amalundi,
bunobuno uyu itogile pa falasi ikwenda nukugwila kunyuma.
18Gwe Ntwa nikubugulila ubupoki bwako.
19Umwene Gadi yo gisakumwisilaga iminyambuta,
loli isakugikaga nukupupa fyosa ifi gili nafyo.
20Ifyakulya ifinyafu fyo fisakufumaga nkisu kya Sheri,
yo yuyo isakubapaga abanyafyale ifyakulya fya luma ulununu.
21Nafutali yo swigi ingikulu iyi bayabwile,
iyi yikubika utwana utumogi nututenenefu.
22Yosefu yo ali bo gu mpiki ugu gukoloka fiyo,
ugu gubyaligwe pa nyibuko ya misi,
syope ni samba syake sikufyuka sikwakufika na pamwanya pa malinga.
23Abalugu bake balinkusyungutila nimitipulo, balinkundasa nukuntamya fiyo,
24loli Umwenemaka gosa alinkukonyolania ubupindo bwa mundu gwesa,
alinkulasa amaboko gabo nukuganyafulania,
na maka gake yu Mwenemaka gosa gwa Yakobu;
yilinkubanyafulania yi ngamu ya Lwalabwe, uyu yo ntimi gwa Israeli.
25Kyala gwa guso alinkubanyafulania ukuti akutule ugwe;
Kyala Umwenemaka gosa alinkubanyafulania
ukuti akusaye ugwe nulusayo ulufuma kumwanya,
ulusayo ulu lwibilile pasi mbusolofu,
ulusayo ulu lukufuma mmabele aga gongaga ugwe
na nkifuba iki kyakupapile ugwe.
26Ulusayo ulu lukufuma ku guso lo lwa maka
ukukinda ulusayo ulu lukufuma mfyamba ifi fikuyako bwila,
ulu lulukindile nulusayo ulu lukufuma ntwamba,
ulusayo ulu lukulefuka itolo,
lo lwisakuyaga pantu gwa Yosefu,
lwisakuyaga pa kyeni kya uyu yo malafyale nkati mbamyabo.
27Benjamini yo ali bo ki kinyamana ikikali;
nulubunju po kikulya ifikigogile,
namayolo po kikuyabania ifi kikolile.
28Bosa bababa fyo fikolo kalongo na fibili (12) ifya banya Israeli,
kangi gagaga go masyu aga ugwisabo ababulile bo ikubasaya;
alinkumpa umundu gwesa ulusayo ulu lumbagile.”
Ukufwa kwa Yakobu nukusyiligwa kwake
29Popapo Yakobu alinkubalagila alinkuti, “Une ndi pakubakonga abinangu; 30#Bwa 23.3-20mwise mukansyilege palikimo nabatata mu mbako iyi yili mu ngunda gwa Efroni ugwakikolo kya baHiti, mu ngunda ugu guli pa Makipela, kubusokelo ilisuba kwa Mamure, nkisu kya Kanani, yo mbako iyi Abrahamu alyulile kwa Efroni ugwa kikolo kya baHiti ukuya buyo bwabo bwakusyiligwapo. 31#Bwa 25.9-10; 35.29Ko kuno yope Abrahamu asyiligwe kangi na yu Sara unkasi gwake: Isaka na Rebeka unkasi gwake; kangi ko kuno nalinsyilile na Leya. 32Ungunda na yi mbako iyi yilimo mumo fyalyuligwe ku ba kikolo kya baHiti.” 33#Imbo 7.15Bo Yakobu amalile ukubalagila abanake, alinkufyuka kangi pa kitala kyake, popapo alinkusililika, alinkubakonga aba kikolo kyake.
Избрани в момента:
UBWANDILO 49: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.