UBWANDILO 48
48
Yakobu ikunsaya Efraimu na Manasi
1Panyuma pali sisisi po balinkumbula Yosefu balinkuti, “Uguso mbine fiyo.” 2Bunobuno Yosefu alinkubuka na banake babili, Manasi na Efraimu. Balinkumbula Yakobu balinkuti, “Umwanako Yosefu isile.” Popapo Israeli alinkwikasya alinkusumuka nukwitugala pa kitala. 3#Bwa 28.13-14Yakobu alinkumbula Yosefu alinkuti, “Kyala Umwenemakagosa alinsetukile une nkaya ka Luzi nkisu kya Kanani, 4alinkwenda nukunsaya une alinkuti, ‘Keta, nisakukolosyaga fiyo, abanako bisakubalaga fiyo bisakuyaga kilundilo kya bandu, kangi ikisu iki kyo nisakubapaga aba nduyungu lwako aba bikwisaga panyuma, ukuti kiyege kilingo kyabo bwila na bwila.’
5“Lilino abanako bo babili aba upapile nkisu iki kya Egiputi bo ngali nukufika bope banangu. Efraimu na Manasi bope bikuyaga banangu, bo mumo ayilile Rubeni nu Simeoni. 6Loli aba gwisakupapaga panyuma, bo bako; abene bisakukyagilaga ikilingo mu ngamu sya bamyabo. 7#Bwa 35.16-19Namanga ubusulumanie bwangu bwali bwakuti, ulu mfumege nkisu kya Padani, Rakeli alinkufwila na njila nkisu kya Kanani bo ngali nukufika nkaya ka Efrati ndinkunsyila palapala pa njila iyi yikulabila nkaya ka Efrati (uyu yo Betelehemu).”
8Bo Israeli ababwene abana ba Yosefu, alinkundalusya alinkuti, “Bo bani aba?” 9Yosefu alinkumwamula alinkuti, “Bo banangu aba Kyala ambele nkisu iki.” Israeli alinkuyoba alinkuti, “Isaga nabo kuno ukuti mbasaye.” 10Umwene Israeli amaso gake gapupele, panongwa ya bukangale, bunobuno alinkusita nukuketa bununu. Popapo Yosefu alinkusegelela na banake kumyake, umwene Yakobu alinkubatambila nukubaponia ni ndumbula yosa. 11Israeli alinkumbula Yosefu alinkuti, “Ngasubilaga napanandi ukuti nisakukiketa ikyeni kyako; loli lilino Kyala anyitikisye ukuti mbakete na ba banako bubo.”
12Yosefu alinkubepusyapo alinkufugama nkipagato kya gwise, alinkufugama pasi alinkundambila ugwise. 13Alinkubakola abanake mmaboko; Efraimu alinkuya ku kiboko kya Yosefu ikililo, bunobuno alinkuningana ni kiboko ikimama kya Yakobu; Manasi yo alinkuya ku kiboko kya Yosefu ikimama, bunobuno alinkuningana ni kiboko ikililo kya Yakobu. Yosefu alinkusegelela nabo ku gwise. 14Popapo Israeli alinkugasutania amaboko, alinkubika ikiboko kyake ikililo pa ntu gwa Efraimu uyu ali nnandi, alinkubika ikiboko kyake ikimama pantu gwa Manasi uyu ali nkulumba. 15Popapo alinkunsaya Yosefu alinkuti,
“Kyala uyu bambombelaga abatata, Abrahamu na Isaka,
Kyala uyu andongosyaga une mbumi bwangu bosa ukwisa kufika na ku lilino kuno!
16Ugwandumi gwa Kyala uyu alimbokile une ku balugu,
yo ayege nabo abanike aba!
Ukuti mmyabo mo bayikumbukilengemo ingamu yangu,
ni ngamu sya batata, Abrahamu na Isaka.
Babale, baye bo ki kilundilo ikikulumba nkisu.”
17Bo Yosefu aketile ukuti ugwise abikile ikiboko kyake ikililo pantu gwa Efraimu, alinkusita nukwikyela. Popapo alinkwenda nukukisosyapo ikiboko kya gwise pantu gwa Efraimu alinkukibika pantu gwa Manasi. 18Alinkumbula ugwise alinkuti, “Gwe tata, bo singayaga bunobuno, unkulumba yo uyu; yo loli yo umbikengepo pantu ikiboko kyako ikililo.” 19Umwene ugwise alinkuti, “Ena nsimenye, bope nabana ba Manasi bisakuyaga kikolo kya bandu ikikulumba, unnuguna gwake yo isakunkindaga unkulu gwake ubukulumba, aba nduyungu lwake bisakwipelaga ukuya kilundilo kya fikolo fya bandu ba nkisu.” 20#Hib 11.21Bunobuno alinkwenda nukubasaya mwisiku lilyo alinkuti,
“Mmyinu umwe mo abanya Israeli bisakuyobelaga isya lusayo apa linga bikuti,
‘Kyala akupelege ugwe ukuya bo yu Efraimu na Manasi. Bunobuno Yakobu alinkwenda nukumbika Efraimu nkyeni mwa Manasi.’ ”
21Popapo Israeli alinkumbula Yosefu alinkuti, “Keta, lilino une ndi pipi ukufwa; loli Kyala isakuya nanumwe, kangi isakubagomokesya umwe ku kisu kya batata. 22Ikiyabo kya kisu ikinunu ukukinda ikya Shekemu, iki napokile nu lubo kangi nu bupinde bo nikulwa na bakikolo kya baAmori, kyo nikukupa ugwe, ndikubapa abamyinu, mma.”
Избрани в момента:
UBWANDILO 48: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.