UBWANDILO 47
47
Yosefu ikumbula Farao ukuti ugwise isile
1Popapo Yosefu alinkwakwingila muno alimo Farao alinkumbula alinkuti, “Tata na bamyitu bisile ukufuma nkisu kya Kenani palikimo ni mitimo gyabo igya ng'ombe nigya ng'osi, kangi na fyosa itolo ifi bali nafyo, lilino bali ku kibafu kya Gosheni.” 2Popapo Yosefu alinkubegapo abamyabo bahano bo alinkwakubanangisya kwa Farao. 3Umwene Farao alinkubalalusya alinkuti, “Ngimba yo mbombo yiliku iyi mukubomba?” Abene balinkumwamula balinkuti, “Twe bandu bako tuli batimi ba mitimo bo mumo bayilile na ba batata.” Kangi balinkumbula balinkuti, 4“Twe bandu bako twisile ukuti tuyege baponi nkisu iki: namanga indeka ya mitimo gyitu yikayamo nkisu kya Kanani, kangi yope ni njala yigwile fiyo. Lilino lelo tukukusuma ukuti utwitikisye twe bandu bako, tukitugalege kulubafu lwa Gosheni.” 5Popapo untemi alinkumbula Yosefu alinkuti, “Lilino apa uguso isile palikimo nabamyinu 6bikuyaga benenakyo ikisu kya Egiputi. Ubabule bitugalege nkiyabo kya Gosheni iki kyo kiyabo ikikinde ubununu nkisu iki. Linga balimo bamo abamahala nkati mmyabo, bo ubimike bayege bakugiketelela imitimo gyangu.”
7Popapo Yosefu alinkuntwala ugwise Yakobu nkyeni mwa Farao, po lelo Yakobu alinkumponia Farao. 8Umwene Farao alinkundalusya Yakobu alinkuti, “Uli nifyinja filinga?” 9Yakobu alinkumwamula alinkuti, “Ifyinja fya bumi bwangu ifi ngonile bo nikwembela nkisu iki, fili mia yumo nifyinja amalongo matatu (130), fyinja finandi itolo, fikaya bo fi fyinja ifi abatata bagonile mbumi bwabo bo bikwembela nkisu kikiki.” 10Popapo Yakobu alinkundaga Farao, alinkusoka. 11Bunobuno Yosefu alinkusala ikiyabo ikikinde ubununu nkisu kya Egiputi, kyo alinkumbikamo ugwise na bamyabo, alinkubapa ukuya kyabo nkisu kya Ramasesi bo mumo alagilile Farao. 12Yosefu alinkumpa ugwise ifyakulya palikimo na bamyabo, kangi na bosa aba balimo nnyumba ya gwise ukwakufika na ku tukeke tosa.
Ubulongosi bwa Yosefu nkabalilo ka njala
13Fikalimo ifyakulya nkisu kyosa, papo injala yali ngulumba fiyo, bunobuno lelo abandu ba nkisu kya Egiputi na ba nkisu kya Kanani balinkuya mbutolwe fiyo panongwa ya njala. 14Umwene Yosefu yo alinkusibungania indalama syosa isi asyagaga pakulisya ifyakulya ku bandu ba nkisu kya Egiputi ni kya Kanani; indalama sisisi syo alinkusitwala ku nnyumba ya Farao. 15Bo abandu bamalile syosa indalama nkisu kya Egiputi, na nkisu kya Kanani, aba Egiputi bosa balinkwisa kwa Yosefu balinkuti, “Utupepo ifyakulya! Nongwa ya fiki iya kuti tufwege ni njala bo nanugwe kuketa? Namanga indalama syitu simalike.” 16Umwene Yosefu alinkubabula alinkuti, “Linga indalama syinu simalike mutwalege ing'ombe syinu, po nikubapaga ifyakulya pakulisania ni ng'ombe syinu.” 17Bunobuno abandu balinkutwala ing'ombe syabo kwa Yosefu. Popapo Yosefu alinkubapa ifyakulya pakulisania nifalasi, ning'osi, ning'ombe kangi nimbunda. Ikyinja kyosa kilakila alinkubapa ifyakulya pakulisania nilya mmitimo gyabo.
18Lelo bo ikyinja kila kimalike, abandu balinkwisa kangi nkyinja ikinine balinkuti, “Gwe malafyale gwitu, tukabagila ukufisa kumyako: indalama syitu syosa simalike; gyope nagi mitimo gyitu lilino gyako ugwe gwe malafyale gwitu. Bo mumo nanugwe usiketile, kakasyalako nakamo akandu akangi, loli gyene gi mibili gyitu ni migunda popapo. 19Ngimba nongwa yafiki tufwege, twesa itolo bo kuketa na maso gako? Po kununu ukuti utule uswe na gi migunda gyitu bubo, ko kuti tuyege nifyakulya; po lelo uswe palikimo nimigunda gyitu tukuyaga batumwa ba Farao. Utupege yi mbeyu yene ko kuti tuye nu bumi, tuleke ukufwa, kangi nukuti ikisu kileke ukwipela matengele.”
20Bunobuno Yosefu alinkumulila Farao imigunda gyosa nkisu kya Egiputi, namanga abaEgiputi bosa balyulisye imigunda gyabo, papo injala yali ngulumba. Ikisu kyosa kili nkuya kya Farao. 21Popapo lelo abandu bope balinkuya batumwa, ukwanda kulubafu lumo ulwa kisu kya Egiputi nukwakufika kulubafu ulunine. 22Kyene ki kisu kya baputi kyo alinkusita nukula; papo abaputi bali nafyo ifyakulya ifi abayabilaga Farao, fyo balinkulya fifyo; bunobuno balinkusita nukulisya ifisu fyabo. 23Popapo Yosefu alinkubabula abandu alinkuti, “Keta, umusyugu mbulile umwe na ki kisu kyinu ukuya kyuma kya Farao. 24Ele, imbeyu iyi, mubyalege mmigunda. Loli pa mfunjo po mwisakumpaga Farao ikiyabo kimo mfiyabo fihano (1/5); ifi fisyele fyo fikuyaga fyinu umwe; fikuyaga mbeyu yakubyala kangi fyakulya yuyumwe na bankikolo kyinu kangi na baninu.” 25Abene balinkwamula balinkuti, “Gwe malafyale, utupokile, ubombile fiyo, uswe tuyege batumwa ba Farao.” 26Bunobuno Yosefu alinkulupela ukuya lulagilo nkisu kya Egiputi ulu lukwendelela ukufika na ku lilino kuno ulwa kuti, Farao ikwambililaga ikiyabo kimo mfiyabe fihane (1/5); muli ifi abandu bafunjile mmigunda gyabo loli ki kisu kyene ikya baputi kyo kilinkusita nukuya mmaboko ga Farao.
Yakobu ikubalaga abanake
27Bunobuno abanya Israeli balinkwitugala nkisu kya Egiputi, nkiyabo kya Gosheni. Bali nifyuma fingi kangi balinkoloka fiyo. 28Yakobu alinkugona nkisu kya Egiputi ifyinja kalongo na fihano pamwanya ifyinja fibili (17). Bunobuno ifyinja fyake fyosa palikimo filinkuya mia yumo na malongo mana, nifyinja fihano na fibili pamwanya (147). 29Bo Yakobu amenye ukuti akabalilo kake kakufwila kasegelile, alinkumbilikila umwanake Yosefu. Alinkumbula alinkuti, “Linga naloli gwikyelile mmyangu, po umbepo ikiboko kyako, ufinge ukuti, utisakunsyila une nkisu iki kya Egiputi. 30Ngulonda ukuti linga mbakongile abatata, gwise upimbe umfimba gwangu ukufuma nkisu iki kya Egiputi nukwakunsyila palikimo na batata.” 31Yakobu alinkundalusya Yosefu alinkuti, “Oko, finga tukete,” popapo Yosefu alinkufinga ulufingo bunobuno Israeli alinkwegamila kangi kuntu gwa kitala kyake.
Избрани в момента:
UBWANDILO 47: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.