UKUSOKA 3
3
Ukubilikiligwa kwa Mose
1Ilisiku limo bo Mose ikutima ing'osi sya nko gwake, Yetro, umputi gwa nkisu kya Midiani, alinkubuka nu ntimo gwake ukukisania ulungalangala alinkwakufika pabupipi na Horebu, ikyamba kya Kyala. 2#Imbo 7.30-34Popapo ugwandumi gwa Ntwa alinkunsetukila Mose ndulapi lwa Moto ulu lwafumaga ndusingi, Umwene bo ikuti ngete alinkwaga ukuti ulusingi lutikupya alinkupaguka, 3alinkuti, “Mbuke ngakete ikika ikihesya kila, nongwa ya fiki ulusingi lutikupya?” 4Lelo bo Untwa aketile ukuti ikubuka ukwakukiketesya ikika kila, alinkukolela alinkuti, “Gwe Mose, Mose!” Umwene alinkwamula alinkuti, “Al'une.” 5Popapo Untwa alinkuyoba alinkuti, “Komma ukusegelela kubupipi, fula ifilato fyako ku malundi, buno ubuyo ubu gwimilepo bwikemo.” 6Untwa alinkwendelela ukuyoba alinkuti, “Youne Kyala gwa ba guso, Kyala gwa Abrahamu, Kyala gwa Isaki, Kyala gwa Yakobu.” Popapo Mose alinkwikinga na maboko kumaso, namanga atilaga ukunketa Kyala.
7Popapo Untwa alinkuyoba alinkuti, “Mbubwene ubutolwe bwa bandu bangu nkisu kya Egiputi, mbilike inguto yabo iyi bikukuta papo abakulumba ba pa mbombo bikubakufya ni mbombo. 8Nsibwene ingubilo syabo, po lelo nsulwike Ukwisa kukubapoka ku baEgiputi, nukubasosyamo nkisu kila nukubatwala ku kisu ikinunu ikyelefu. Ikisu kya mboto, ikisu kya bandu bakikolo kya baKanani, ikya baHiti, ikya ba Amori, ikya baPerizi, ikya baHivi kangi nikya ba Yebusi. 9Inguto ya banya Israeli yifikile kumyangu, kangi mbubwene ubutolwe bwabo ubu abaEgiputi bikubapelela. 10Oko ngutume kwa Farao ukabasosyemo abandu bangu, abanya Israeli nkisu kya Egiputi.” 11Umwene Mose alinkuyoba kwa Kyala, alinkuti, “Ne ani une ukuti mbuke kwa Farao, ngabasosye abanya Israeli nkisu kya Egiputi?” 12Umwene Kyala alinkwamula, alinkuti, “Loli une nisakuyaga nanugwe; kangi iki kisakuyaga kimanyilo kumyako, ukuti yo une ngutumile ugwe: kyo kyakuti linga uyile kubasosya abandu nkisu kya Egiputi, po gwisakumputaga Kyala pa kyamba kikiki.”
13 #
Kuso 6.2-3
Popapo Mose alinkumwamula Kyala, alinkuti, “Linga njile kufika ku banya Israeli mbabulile ukuti, ‘Kyala gwa bisemwe yo andumile kumyinu,’ lelo linga abene bikundalusya bikuti, ‘Ywani ingamu yake?’ Ngimba ngwakubamulaga isya fiki?” 14#Buset 1.4,8Umwene Kyala alinkumbula Mose, alinkuti, “Ukababulege abanya Israeli ukuti, UNE YO UNE NDIKO!” Kyala alinkwendelela ukuyoba alinkuti, “Mo ukayobelege bunobuno ku banya israeli ukatigi, UNE NDIKO yo andumile kumyinu.” 15Kyala alinkwandisya kangi alinkumbula Mose, alinkuti, “Ukabalinganie bo bunobuno abanya Israeli ukuti, ‘Untwa Kyala gwa bisemwe, Kyala gwa Abrahamu, gwa Isaki nugwa Yakobu yo andumile kumyinu.’ Yiyiyi yo ngamu yangu bwila na bwila, yo ngamu iyi ingulilo syosa sisakumbilikilaga une. 16Bukaga ukababunganie palikimo bosa abakulumba mbanya Israeli ukababule ukatigi, ‘Untwa Kyala gwa bisemwe, Kyala gwa Abrahamu, gwa Isaki, kangi ugwa Yakobu alinsetukile une, yo alinkumbula, alinkuti, “Nsibwene isi bikubabombela umwe nkisu kya Egiputi, 17bunobuno ninogwine ukubasosyamo umwe mu ngubilo syinu nkisu kya Egiputi, nukubatwala umwe ku kisu kya ba Kanani, ikya ba Hiti, ikya ba Amori, ikya ba Perizi, ikya ba Hivi, nikya ba Yebusi, ikisu ikya lukama nu luki.” ’ 18Bikwakugapilikaga amasyu gako, ukabuke palikimo na bakulumba mbanya Israeli, mukambulege umalafyale gwa kisu kya Egiputi ukuti, ‘Untwa Kyala gwa ba Hiburi, yo agene nanuswe; lelo lilino, tukukusuma, ukuti utwitikisye tuye nubuhesya bwa njila ya masiku matatu ukubuka ndungalangala ko kuti tukikemesye amakemo ku Ntwa Kyala gwitu.’ 19Loli menye ukuti umalafyale gwa kisu kya Egiputi atisakubitikisya umwe pene apa linga afimbilisigwe na maka amakulumba. 20Nisakunangisya amaka gangu nukubafunda aba nkisu kya Egiputi ni fika fyangu ifi nsumwike pakubomba nkati mmyabo; panyuma loli po Farao isakubalekesya ukuti mubukege. 21#Kuso 12.35-36Nisakubapelelaga aba Egiputi ukubagana abandu bangu; bunobuno linga mukubuka, mutisakusumuka mwe basita kupegwa. 22Unkikulu gwesa unya Israeli isakubuka kubapalamani bake aba Egiputi na kuligwesa unkikulu unya Egiputi uyu ikwitugala nagwe nnyumba yimoyene ukuti ampepo imyenda kangi nutwakumogela utwa siliva nu twa golide. Fyo mukwakubafwikaga abaninu abalumyana na balindwana; bunobuno mwisakupupa ikyuma kya bandu ba nkisu kya Egiputi.”
Избрани в момента:
UKUSOKA 3: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.