UKUSOKA 4
4
Kyala ikupela ifiswigo nkisu kya Egiputi
1Popapo Mose alinkwamula alinkuti, “Bule linga batikunyitika une kangi linga batikugapilika amasyu gangu? Namanga bikwakutigi, ‘Untwa akakusetukile ugwe napanandi.’ ” 2Umwene Untwa alinkundalusya Mose alinkuti, “Ukolile fiki nkiboko kyako?” Umwene Mose alinkwamula alinkuti, “Ngili.” 3Popapo Kyala alinkumbula alinkuti, “Taga pasi ingili iyo;” bunobuno Mose alinkuyitaga pasi yilinkusanuka yilinkwipela ukuya njoka; Umwene Mose alinkubopa ku njoka yila.
4Popapo Untwa alinkumbula Mose alinkuti, “Lilino uyikole kunswigala.” Bunobuno Mose alinkuyikola popapo yilinkwipela ukuya ngili kangi bo ayikolile. 5Untwa alinkumbula Mose alinkuti, “Ukabombe bo bunobuno, po bikwakumanyaga ukuti yo yu Ntwa Kyala gwa bisabo, Kyala gwa Abrahamu, gwa Isaki nugwa Yakobu uyu akusetukile ugwe naloli.” 6Popapo Untwa alinkwandisya kangi alinkumbula Mose alinkuti, “Ingisya ikiboko mu nyambi yako ya pa kipambaga.” Popapo Mose alinkwingisya ikiboko kyake mmwenda gwa pa kipambaga; lelo bo ikukisosya alinkwaga ukuti kili nubukoma, kilinkuya swee itolo ukuti masapa. 7Umwene Untwa alinkumbula Mose, alinkuti, “Ukigomokesye kangi mu nyambi yako ya pa kipambaga,” alinkubomba bo mumo alimbulile. Popapo kilinkuya kinunu itolo kili nkufwana nu mbili gwake unnine. 8Untwa alinkumbula Mose alinkuti, “Linga batikwakupilika ugwe pamo ikika ikya kwanda, po babagile ukusubila ikika kya panyuma. 9Linga batikwakufitika ifika fyo fibili ifi, pamo linga batikwakugitika amasyu gako, po ukegege amisi ukufuma ndusoko lwa Nayelo, ukonege pa kisu ikyumu; po lelo amisi gago unegile ukufuma ndusoko lula gisakwipelaga ukuya ilopa pa kisu ikyumu.”
10Loli Mose alinkulamba ku Ntwa alinkuti, “Gwe Ntwa gwangu, ngamanya siku ukuyoba ukwanda liyolo ukwisakufika numusyugu, nalinga umbule, pope ngabagila nukwakuyoba, namanga ne mbombi gwako ndi mundu gwa kitabo.” 11Bunobuno Untwa alinkumwamula Mose alinkuti, “Ngimba ywani uyu agupelile undomo gwa mundu? Ywani uyu ikumpelela umundu ukusita kuyoba, pamo ukuya gwa mapuli? Ywani uyu ikumpa umundu ukuti aketege, uyu ikumpelela umundu ukuya mfwamaso? Ngimba ngaya yo yuyune ne Ntwa? 12Ugwe bukaga itolo ngwakuyaga nanuswe, ngwakuyobelaga mu ndomo gwako, kangi ngwakukumanyisyaga isi kwakuyobaga.” 13Umwene Mose alinkuti, “Gwe Ntwa gwagnu unhobokele, natigi untume umundu uyungi.” 14Popapo Untwa alinkunkalalila fiyo Mose, alinkumbula alinkuti, “Ngimba akayapo Aroni, ugwamyinu, ugwa kikolo kya Levi? Nsimenye ukuti yo abagile ukwakuyoba bununu; keta, lilino ikwisa pakwaganila nanugwe, lelo linga mwaganile po isakwikyela fiyo. 15Yo ukayobesaniege nagwe ukambulege isi uli nasyo ukuti yo akababulege abandu; ngwakubatulaga mwesa mwe babili ukuyoba, kangi ngwakubamanyisyaga isya kubomba. 16Umwene Aroni yo ikwakukuyobelaga ugwe ku bandu yo ikwakuyaga ndomo gwako, loli ugwe kwakuyaga bo yu Kyala kumyake. 17Ugwe ukakolele ingili yo ukabombelege ifika.”
Mose ikugomokela nkisu kya Egiputi
18Popapo Mose alinkugomoka ukubuka kwa Yetro, unko gwake, alinkwankumbula alinkuti, “Natigi ngomoke mbuke kuno nafumile ku bakamu bangu nkisu kya Egiputi ukuti ngabakete linga bakali bumi.” Umwene Yetro alinkumwamula Mose, alinkuti, “Bukaga ndutenganio.” 19Popapo Untwa alinkumbula Mose bo ali nkisu kya Midiani alinkuti, “Lilino gomokaga ubukege nkisu kya Egiputi namanga bafwile aba babufwimaga ubumi bwako.” 20Bunobuno Mose alinkumwega unkasi gwake na banake alinkubafyusya pa mbunda alinkugomoka ukubuka nkisu kya Egiputi.
21Popapo Untwa Kyala alinkumbula Mose, alinkuti, “Bo kugomoka ukubuka ku kisu kya Egiputi ukabombege nkyeni mwa Farao ifika fyosa ifi ngupele amaka gakufibombela, loli ngwakuyipela ngafu indumbula yake, ukuti aleke ukubitikisya abandu ukubuka. 22Po lelo ukambulege Farao ukuti, ‘Untwa ikuti, Israeli yo mwanangu ugwakipanda. 23#Kuso 12.29Nikukubula ugwe nikuti, Undekesye umwanangu abukege akiputege kumyangu. Linga utikumwitikisya ukubuka, nikuya pakugoga umwanako undumyana ugwakipanda.’ ” 24Umwene Mose bo ali mu njila ikubuka, alinkwakufika pa buyo bumo alinkugona papo. Untwa alinkumwisila, alinkulonda ukungoga Mose. 25Popapo Zipora, unkasi, alinkwega ilibwe ili lyali lyugi lyo alinkubutilako umwanake undumyana ku kyeni, alinkugapalamasya amalundi ga Mose nu mbili ugu abutileko ku kyeni ku mwanike. Alinkuyoba alinkuti, “Naloli ugwe uli ndume gwangu gwa mwilopa!” 26Bunobuno Untwa alinkundeka Mose alinkuya mumi. Papo unkikulu ayobile atile, Ugwe uli ndume gwangu gwa mwilopa panongwa ya kubutigwako kula. Bunobuno Untwa alinkundeka Mose.
27Popapo Untwa Kyala alinkumbula Aroni, alinkuti, “Sumuka, ubukege ndungalangala ukaganile na Mose.” Bunobuno Aroni alinkusumuka alinkwakwaganila na Mose pa kyamba kya Kyala, balinkutambilana nukuponania. 28Popapo Mose alinkumpangila Aroni amasyu gosa aga Kyala ayobile bo ikuntuma, kangi nisya fika ifi Untwa alintumile ukwakubomba. 29Umwene Mose palikimo na Aroni balinkubuka balinkwakwaganila na bakulumba mbanya Israeli. 30Popapo Aroni alinkubapangila amasyu gosa aga Untwa alimbulile Mose alinkwenda nukufibomba ifika fyosa bo bikuketa abandu. 31Popapo abakulumba bala balinkusitika inongwa sisisi balinkusekela. Lelo bo bapilike ukuti Untwa abasangalwisye abanya Israeli, nukuti abubwene ubutolwe bwabo, balinkugundama pasi balinkufugama Untwa.
Избрани в момента:
UKUSOKA 4: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.