UKUSOKA 1
1
Ubutolwe bwa abanya Israeli nkisu kya Egiputi
1 #
Bwa 46.8-27
Isi syo ngamu sya bana aba balisile na Yakobu nkisu kya Egiputi, umundu gwesa na ba nnyumba yake: 2Rubeni, Simeoni, Levi, Yuda, 3Isakara, Zebuloni, Benjamini, 4Dani, Nafutali, Gadi nu Asheri. 5Bunobuno bosa aba bafumile nduyungu lwa Yakobu pamopene bali amalongo mahano na mabili (70); namanga Yosefu yo atalilemo nkisu kila kya Egiputi. 6Lelo bo pagonilepo Yosefu alinkwenda nukufwa na bamyabo bosa aba mungulilo ya kabalilo kosa kala. 7#Imbo 7.17Loli aba nduyungu lwa Israeli balinkoloka nukubala fiyo; balinkuya bingi kangi ba maka fiyo; bunobuno balinkwisula nkisu kila.
8 #
Imbo 7.18
Popapo alinkwimikigwa umalafyale uyungi nkisu kya Egiputi uyu akalimmenye Yosefu. 9Umwene umalafyale yula alinkuyoba ku bandu bake alinkuti, “Keta, abandu aba banya Israeli baya bingi fiyo, kangi ba maka ukutukinda uswe. 10#Imbo 7.19Oko, tubendele mbukomu ko kuti baleke ukubala ukuya bingi, lumo linga ubwite bukutwisila babagile ukutulana na balugu ukuti balwege nanuswe po lelo bende nukubopa ukufuma nkisu iki.” 11Bunobuno lelo balinkubabika abanya Israeli pa mbombo ingafu iya butumwa, balinkubabikapo abalindilili abagasi ukubakufya ni mbombo isito balinkunjengela umalafyale Farao inyumba syakubikamo ifyakulya nkaya ka Pitomu na ka Ramasesi. 12Loli bo bikubatamya fiyo po abene balinkwendelela ukoloka nukubala fiyo. AbaEgiputi balinkuya nu lutende fiyo panongwa ya banya Israeli. 13Bunobuno balinkubapelela abanya Israeli ukubomba imbombo namaka, 14kangi balinkubupelela ubumi bwabo ukubaba nimbombo ingafu fiyo iya kukanya amatope nukubumba amapamba, balinkubabika mmigunda ukubomba imbombo isya luko losa, kangi balinkubafimbilisya ukubomba namaka fiyo imbombo sya luko losa itolo.
15Popapo untemi gwa kisu kya Egiputi alinkumbula Shifura na Pua, abanyago aba babatulaga abakikulu abaHiburi bo bikupapa abana, alinkuti, 16“Linga mukubomba isya bunyago pakubatula abakikulu ba kiHiburi, mubenesyege fiyo abana apa linga bikusoka bo abakikulu bitugele apa bikupapila abana. Linga mwagile ndumyana mukagogege, loli linga mwagile kalindwana po mukalekege.” 17Abene abanyago bala bantilaga Kyala, balinkusita nukusibomba isi untemi gwa baEgiputi abalagilile, loli balinkutuleka utwana utulumyana ukuti tuyege tumi. 18Popapo untemi gwa kisu kya Egiputi alinkumbilikila abanyago bala alinkubalalusya alinkuti, “Nongwa ya fiki mukubomba sisisi, apa mukubaleka bumi abana abalumyana?”
19Abene abanyago balinkumwamula Farao balinkuti, “Papo abakikulu ba kiHiburi bakafwana na bakikulu abaEgiputi, namanga bakifu, bali namaka bikupona bo unnyago akali ukufika.” 20Bunobuno Kyala alinkubapakisya abanyago; abene abanya Israeli bo balinkwendelela ukubala balinkuya bamaka. 21Umwene Untwa alinkubolosya abanyago bala papo balimenye Kyala. 22#Imbo 7.19Popapo Farao alinkubalagila abandu bake bosa alinkuti, “Umwana gwesa undumyana uyu linga apapigwe mbaHiburi, yo munsopege ndusoko lwa Nayelo, loli mubalekege abalindwana.”
Избрани в момента:
UKUSOKA 1: NNBII
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
BAIBULO INONGWA INUNU © Bible Society of Malawi, 2017.