ЯзэпУзор

Знаёмства з Язэпам: Як Жыць Марай, Калі Жыццё Становіцца Кашмарам

Жыццё — гэта не ліфт, а, хутчэй, амерыканскія горкі. Нават калі ты любіш рызыкаваць ці захапляешся экстрэмальнымі відамі спорту, большасці з нас хацелася б, каб жыццё было крыху больш падобнае на ліфт і крыху менш - на горкі. На працягу наступных дзён мы пагрузімся ў гісторыю жыцця аднаго з самых знакамітых персанажаў Старога Запавету — Язэпа. Гісторыя Язэпа паказвае нам вернасць Бога, які ажыццяўляе свае планы для нашага дабра і сваёй славы, нават калі ўсё, здаецца, пайшло наперакасяк.

Бог абяцаў Абрагаму дабраславенне, а таксама тое, што праз яго нашчадкаў усе сем'і на зямлі атрымаюць дабраславенне. Улічваючы гэтае надзвычайнае абяцанне для сям'і Абрагама, ты можаш здзівіцца, што сярод яго нашчадкаў было так шмат разладу (напрыклад, бацькоўская прадузятасць і суперніцтва паміж братамі). Магчыма, ты з уласнага вопыту ведаеш, наколькі згубнымі могуць быць падобныя грахі. На шчасце, гісторыя Язэпа нагадвае нам, што мы не самотныя ў пустым сусвеце. Ёсць добры і любячы Бог, які стварыў гэты свет. Нават калі твае бацькі не планавалі твайго з'яўлення, Бог мае план для твайго жыцця. Бог стварыў цябе, і Ён не робіць памылак.

Божае адкрыццё Язэпу — сон, які паказваў, што ён будзе кіраваць сваімі братамі — напэўна, было для яго незразумелым і малаверагодным, калі не цалкам немагчымым. Магчыма, Бог даў і табе мары, якія не супадаюць з тваімі рэальнымі абставінамі. Абставіны, у якiх ты знаходзiшся, могуць пасеяць сумневы наконт твайго прызначэння і Божых абяцанняў, і, магчыма, табе трэба папрасіць Бога аднавіць мары, бачанні і абяцанні, прамоўленыя для твайго жыцця праз Пісанне і голас Духа.

Язэпу сніцца, што ён будзе ўзвышаны над братамі, але адбываецца наадварот. Яго зайздросныя браты спачатку кідаюць яго ў пустую яму, а пасля прадаюць у рабства праходзячым гандлярам. Можа, цябе ніколі не кідалі ў яму, але часам здаецца, што твая мара ператварылася ў кашмар. Можа, гэты кашмар звязаны з дзеяннямі іншых ці падзеямі, якія ты не мог кантраляваць. Магчыма, частка віны ёсць і на табе. Але ў любым выпадку, гэта не канец, усё яшчэ можна выправіць. Як бы жорстка браты ні паступілі з Язэпам, Бог заставаўся верным яму. На самой справе, прадаўшы Язэпа ў рабства і адправіўшы ў Егіпет, браты падсвядома набліжалі яго да спаўнення яго мараў ад Бога — хоць ніхто з іх гэтага не разумеў, і найменш сам Язэп. Нашы мары, як правіла, спаўняюцца не так, як мы чакаем, — аднак Бог застаецца верным, і Яго планы для нас здзяйсняюцца.

Працягваючы паглыбляцца ў незвычайную гісторыю Язэпа — брата, якому давялося шмат вытрываць, марыцеля, лідара і даравальніка, — памятай, што незалежна ад твайго мінулага ці грахоў, заўсёды ёсць надзея. Мінулае не павінна вызначаць тваю будучыню, бо Ісус прапануе табе прабачэнне, ацаленне і перамены.