Давер, мітусьня ды супакойУзор

Давер

Усё Сьвятое Пісьмо вучыць нас, што вынікі нашае працы залежаць ад Бога, а не ад нас. У 1 Летапісаў 29:12 напісана: “І багацьце і слава ад аблічча Твайго, і Ты валадарыш над усім”. Другі Закон 8:17-18 кажа: “…і каб ты не сказаў у сэрцы тваім: “мая сіла і моц рукі маёй прыдбалі мне багацьце гэтае”, але каб памятаў Госпада, Бога твайго, бо Ён дае табе сілу набываць багацьце”.

У наш час, калі кожны можа заснаваць пасьпяховы бізнэс, напісаць кнігу-бэстсэлер або зрабіць папулярны падкаст, ёсьць спакуса думаць, што вынікі нашых намаганьняў дасягаюцца менавіта праз нашую энэргічную дзейнасьць. Але як мы ўбачым заўтра, Бог загадвае нам энэргічна дзеяць і выкарыстоўвае нашую сумленную працу на тое, каб праз нас зьявіўся плод. Пачынаючы выконваць усякае новае заданьне, мы павінны перш-наперш прызнаць бясспрэчны факт, што вынікі нашае працы залежаць менавіта ад Госпада.

У 16-м разьдзеле Выслоўяў, Саламон апісвае пасьлядоўнасьць “давер-энэргічная дзейнасьць-адпачынак”, што павінна быць часткаю ўсякага намаганьня, якое мы, вернікі, робім. У трэцім вершы гэтага разьдзелу наймудрэйшы ў сьвеце чалавек раіць: “Ускладзі на Госпада ўсе справы свае, і ўсе намеры твае зьдзейсьняцца”. Дык перад тым, як пачаць мітусіцца, мы павінны ўскласьці ўсе нашыя справы на Госпада. Як тое выглядае на практыцы?

Па-першае, трэба добра ведаць вершы накшталт таго, што мы прачыталі сёньня, каб заўсёды памятаць, што вынікі нашае працы залежаць ад Бога, а не ад нас. Па-другое, мы павінны ўскладаць нашую працу на Госпада ў малітве й выказваць словамі наш давер Яму. Нарэшце, у дадатак да выказваньня нашага даверу Богу словамі як Богу, так і самім сабе, мы павінны расказваць пра гэты давер іншым. Сучаснае грамадзтва вітае здатнасьць дасягаць усяго самастойна, але мы як пасьлядоўнікі Хрыста павінны адасобіцца ад сьвету, публічна вызнаючы, што вынікі нашае працы залежаць менавіта ад Бога, а не ад нас.

Але як мы ўбачым заўтра, давер зьяўляецца толькі адною часткаю круцігалоўкі. Дзеля таго, каб быць эфэктыўнымі прыладамі ў руках Таго, Хто паклікаў нас, мы павінны сумленна працаваць у абранай сфэры.