Давер, мітусьня ды супакойУзор

Давер, мітусьня ды супакой

“Мітусьня”, напэўна, - наймаднейшае слова ў сучасным сьвеце бізнэсу. Інвэстары амэрыканскае праграмы “Shark Tank” настойваюць на тым, каб бізнэсоўцы “мітусіліся” болей дзеля таго, каб павысіць продажы. Здаецца, што кожны сёньня мае нейкую “падпрацоўку” ў дадатак да свае рэгулярнае працы ў офісе. Але што кажа Біблія наконт нашае энэргічнае дзейнасьці? З аднаго боку, Сьвятое Пісьмо бясспрэчна ўхваляе старанную працу. Каласянаў 3:23 загадвае: “І ўсё, што робіце, рабеце ад душы, як для Госпада, а не для людзей.” Але ў той час, як пасьлядоўнікі Хрыста сапраўды могуць удзельнічаць у сьвяткаваньні цяжкае працы, што прапануе гэты сьвет, мы таксама павінны мець на ўвазе біблійную ісьціну пра тое, што вынікі нашае працы залежаць ад Бога, а не ад нас (Другі Закон 8:17-18). Будучы пасьлядоўнікамі Хрыста, мы павінны дасягнуць раўнавагі паміж стараннаю працаю ды даверам Богу, каб знайсьці сапраўдны адпачынак.

Ісуса 6 зьмяшчае выдатны прыклад таго, як правільна дасягаць тае раўнавагі. Аднойчы калі Ісус, сын Нава, вёў ізраільскі народ у абяцаную зямлю, яны апынуліся ў безвыходным становішчы - места Ерыхон, якое падавалася непраходным. У Ісуса 6:2 напісана: “Тады сказаў Госпад Ісусу: вось, Я аддаю ў рукі твае Ерыхон”, - але замест таго, каб даць Ісусу ды ізраільскаму народу надзвычайную моц ды спрытнасьць узяць Ерыхон самастойна, Бог запатрабаваў ад іх максымальнага даверу. Бог загадаў Ісусу выправіцца ў сямідзённы марш вакол Ерыхона, і напрыканцы крыкнуць моцным голасам на ягоны мур.

Як і ў безьлічы іншых выпадкаў у гісторыі, Бог абраў выкарыстаць “дурноту сьвету, каб асароміць мудрых”. Заміж таго, каб дазволіць Ісусу ды ізраільскаму народу перамагчы самастойна, Бог стварыў плян, каб упэўніцца, што толькі Ён атрымае ўсю славу. Перад тым, як даць ізраільскаму народу перамогу, Бог папрасіў іх спадзявацца на Ягонае забесьпячэньне. Ісус зрабіў тое і вокам не міргнуўшы. Ізраільскі народ даверыўся Божаму пляну. Потым яны сталі энэргічна дзеяць: маршыраваць, трубіць у трубы й гукаць, пакуль мур Ерыхона не абваліўся.

Зразумела, што мур не абваліўся праз марш, гуканьне й мітусьню ізраільскага народу. Бог разбурыў яго. Думаю, што гэта дакладна тое, што Бог хацеў, каб ізраільскі народы і мы зразумелі. Нашая старанная праца - добрая рэч! Але думаць, што адно толькі нашая мітусьня дае вынікі, - гэта як думаць, што непрыступную крэпасьць разбурыла гуканьне ізраільскага народу.

Як паказвае прыклад Ісуса ды ізраільскага народу, мы не павінны намагацца пазбавіцца даверу або мітусьні; мы павінны прыняць іх абодвух. Гэтыя дзьве ідэі не супярэчаць адна адной, яны працуюць разам. Але як кажа Саламон у Выслоўях 16, існуе гэтакі спосаб аб’яднаньня даверу й энэргічнае дзейнасьці, які праслаўляе Госпада й прыносіць нам сапраўдны адпачынак. Мы яшчэ паразважаем над тым урыўкам са Сьвятога Пісьма ў наступныя тры дні.