НеспакойУзор

Твой тэлефон разрываецца. Твой каляндар выходзіць з-пад кантролю. Твайму сьпісу рэчаў, што неабходна зрабіць, канцу няма. Твая галава поўніцца бясконцым патокам думак. Калі ты прачынаесься ранкам, ты адразу чуеш ціхае гудзеньне трывогі, якое суправаджае цябе ўвесь дзень.

Гучыць знаёма? Сёньня мы нашмат больш неспакойныя, чым раней. Я б нават сказаў, што існуюць тры галоўныя фактары, якія спрыяюць неспакою сучаснага хрысьціяніна. Па-першае, мы (як і рэшта сьвету) марнуем столькі часу, спажываючы фільмы, сацыяльныя сеткі, мабільныя дадаткі й гульні, што гэтыя добрыя рэчы, якія былі створаныя з намерам удасканаліць нашае жыцьцё, сталі адбіраць у нас жыцьцё. Па-другое, мы не вылучаем час на тое, каб "уваходзіць у браму Ягоную з праслаўленьнем", і ў выніку мы жывём у незадаволенасьці ды зь бясконцай прагай дасягнуць і набыць больш. Нарэшце – і гэта ёсьць асабліва вялікай цяжкасьцю для амбітных прафэсіяналаў – мы не вылучаем час на тое, каб рэгулярна нагадваць сабе аб эвангельлі ды аб тым, што нашая таясамасьць у Хрысьце вызваляе нас ад патрэбы безупынна рабіць больш.

Тое можа прагучаць занадта проста, але калі нашай праблемай ёсьць неспакой, дык вырашэньнем мусіць быць адпачынак ад крыніцаў гэнага неспакою. Дзеля таго, каб знайсьці сапраўдны адпачынак і супакой, мы павінны рэгулярна браць перапынак ад няспынных патрабаваньняў гэтага сьвету й нашае працы. Заміж таго, каб безупынна імкнуцца да нечага большага, мы павінны вылучаць час на тое, каб папросту быць удзячнымі за тое, што Бог ужо даў нам. І мы павінны часова абменьваць рэчы, якія вычэрпваюць нашыя сілы (эмэйл, мабільныя тэлефоны ды інш.) на рэчы, якія даюць нам жыцьцё (сябры, сям’я, Божае Слова ды інш.)

На шчасьце, Біблія прапануе ўзор гэткага адпачынку – Шабат. Шабат раней быў для мяне назоўнікам, а не дзеясловам. Шабат быў для мяне старажытным словам, якое азначала дзень тыдня, і ня быў нечым такім, што практыкуюць сучасныя хрысьціяне. Доўгі час Шабат падаваўся мне легалістычнай, нуднай работай, а ня шчодрым дарам, які мог вырашыць маю праблему зь неспакоем. Але праз уважлівае вывучэньне Ісусавых словаў я цалкам зьмяніў мае меркаваньні наконт шабатнага адпачынку. Зараз я зусім не магу ўявіць маё жыцьцё безь яго.

Заўтра мы пагутарым пра тое, чым Шабат не зьяўляецца для сучаснага хрысьціяніна, разбураючы шматлікія міты, у якія я (а магчыма, і вы таксама) верыў наконт гэтага старажытнага звычаю. А пасьлязаўтра мы пагутарым пра тое, што Біблія кажа пра Шабат, і як мы можам практыкаваць яго ў нашым жыцьці.