Ісус: наш штандар перамогіУзор

Перамога над спакусай

Ніхто ня мусіць нагадваць нам, што спакуса сапраўды існуе - ніколі раней цэлы сьвет не знаходзіўся ўсяго за адзін шчоўк мышкі ад нас. Але ці мы затрымліваемся хоць на хвілінку, каб паразважаць над канкрэтнымі спосабамі, якія шатан выкарыстоўвае, каб спакусіць нас? Дзеля таго, каб лепей бараніцца ад спакусы, мы павінны разумець, як яна працуе.

У Быцьці, шатан спакусіў Еву, паставіўшы пад сумнеў Божае Слова ды Ягоныя матывы, і ейны адказ прынёс сьвету грэх і сьмерць. У 2 кнізе Валадарстваў, Давід валадар вырашыў застацца дома, калі “валадары выходзяць у паходы”, паслаўшы іншых ваяваць заміж сябе. Калі б Давід быў там, дзе Бог хацеў, каб ён быў, дык ён ніколі ня быў бы на даху адзін і ня ўбачыў бы Вірсавію. У выніку, мы бачым як блудадзейства й забойства ўвайшло ў Давідава жыцьцё. Калі Сьвяты Дух павёў Ісуса ў пустыню ў Мацьвея 4, то шатан намагаўся спакусіць самога Божага Сына, цытуючы Сьвятое Пісьмо.

Вораг безупынна працуе над тым, каб прымусіць нас сумнявацца ў Божым Слове, у Ягоным пляне і ў Ягонай любові да нас. Калі шатану ўдасца прывабіць нас да гэткіх разважаньняў, то гэта прывядзе да хаосу й болю ў нашым жыцьці. Але Ісус ведае, што значыць мець спакусу ставіць Бога пад сумнеў - насамрэч, Ён прайшоў праз усякую спакусу, празь якую праходзім мы - і Ён даў нам спосаб адракацца ад яе ды жыць у волі. Калі Ісус заплаціў доўг за наш грэх на крыжы, то Ён паразіў сілу панаваньня грэху над чалавецтвам. Празь Ягоную ахвяру, мы больш не падпарадкоўваемся ўладзе шатана!

Варта заўважыць, што жыцьцё ў Ісусавай перамозе над спакусаю патрабуе ад нас сьвядомасьці. Мы павінны штодня разумець, што вораг будзе намагацца адваяваць назад сваю былую тэрыторыю ў нашым жыцьці, таму ў адказ мы павінны быць пільнымі, будаваць ахову вакол нашага вольнага жыцьця ў Ісусе, прасіць Бога дапамагчы нам, калі перад намі стаіць спакуса, і абкружаць сябе сябрамі-вернікамі, якія дапамогуць нам быць адказнымі. Апостал Павал сказаў у Эфэсцаў 6, што мы павінны актыўна апранацца ў Божую зброю, каб магчы ўстаяць супраць хітрыкаў д’ябла.

Падчас гэтага велікоднага тыдню, нагадвай сабе, што Ісус пазбавіў ворага ўлады над тваім жыцьцём. Молячыся, абапірайся на Эфэсцаў 6:10-18 і апранай Ягоную зброю штодзень. Падзякуй Богу за тое, што Ён дае табе сілу жыць у свабодзе ад спакусы, і спытай Яго, ці ёсьць у тваім жыцьці нейкія сфэры, дзе ты мусіш быць больш пільным. Ён дапаможа табе вызначыць, дзе ты слабы, і дасьць табе сілу супрацьстаяць ворагу. З Ісусавай перамогай ты ніколі ня будзеш пераможаным!

Спампуй сёньняшнюю выяву тут.