Ператварэньне блуднага сына з Кайлам АйдлманамУзор

“АБУДЖЭНЬНЕ — Апрытомнець”

Мы часта прапускаем сыгналы трывогі ў нашым жыцьці, бо мы не зьяўляемся чульлівымі да іх. Далікатныя гукі арфы не пабудзяць нас так, як тое зробяць голасныя гукі трубы. Таму, замест таго, каб адразу ж адрэагаваць на званок будзільніка, мы націскаем кнопку “Драмаць” зноў ды ізноў. Будзільнік зьвініць усё грамчэй і грамчэй, пакуль, нарэшце, гэны гук не становіцца настолькі непрыемным, што мы ня можам ігнараваць яго далей. Тады мы прачынаемся, праціраем вочы, бачым, што нас абкружаюць сьвіньні блуднага сына, і пачынаем дзівіцца, як мы дайшлі да гэтага.

Маё пытаньне да вас такое: ці ёсьць у вашым жыцьці сыгналы трывогі, што зьвіняць цяпер?

Біблія мае шмат прыкладаў таго, як Бог узьнімае трывогу. Той сыгнал трывогі часта зьвініць рана, каб пабудзіць нас да таго, як усё пачне развальвацца. Часам людзі думаюць, што ім трэба апынуцца на самым дне, каб нарэшце апрытомнець. Але, магчыма, Бог намагаецца пабудзіць вас менавіта цяпер, каб выратаваць вас ад вялікага болю, што чакае вас у “далёкім краю” пазьней?

2 Летапісаў 36:15 паказвае, як Бог пасылае сыгнал трывогі, каб перасьцярэгчы Свой народ. Выраз “рана ўстаючы” не азначае, што Бог устае з ложку рана. Ён азначае, што Бог пачынае дзейнічаць рана. У дадзеным кантэксьце, гэта азначае, што Бог паслаў сыгнал трывогі, як толькі Ён заўважыў праблему.


Чытаючы далей, мы даведваемся, чаму Ён перасьцерагаў: “…бо Ён шкадаваў народ Свой…”. Калі Бог пасылае гэтыя сыгналы трывогі, то Ён мае на мэце нашае дабро, бо Ён любіць нас.

Ці ёсьць у вашым жыцьці сыгналы трывогі, якія вы ігнаруеце, націскаючы “Драмаць”, замест таго, каб прачнуцца? Ці можаце вы прыгадаць тыя раньнія сыгналы трывогі, якія Бог пасылаў вам, каб выратаваць вас ад пазьнейшага гора ці граха?