Ідзі Рабі Кажы Давай: Свабода ў скарэньні ІсусуУзор

Госпадзе Ісусе, я скараюся Табе.

Скарэньне — непрыемнае слова. “Скарыцца” гучыць як “прайграць”, і нікому не падабаецца адчуваць сябе пераможаным. Ня дзіва, што скарацца Богу даецца нам цяжка. Наш чалавечы інстынкт кажа нам, што калі мы скорымся Яму, дык мы нешта страцім. Можа Ён злуецца на нас? А можа мы папросту страцім кантроль над тым, што нам хочацца кантраляваць? Але Сьвятое Пісьмо кажа, што скарыцца Ісусу — гэта найкарысьнейшая для нас рэч.

Бог даў Ісусу найвышэйшую і поўную ўладу над усім стварэньнем. Схіленыя калені — гэта знак пакорлівасьці й вернасьці, і тое зьяўляецца належным адказам уладару сусьвету. Мы бачым тое ў дачыненьнях паміж каралямі або каралевамі ды іхнымі падданымі. Але мы ведаем, што наш уладар Ісус заўсёды будзе ласкавы да нас, і што Ягоныя пляны й мэты на нашае жыцьцё заўсёды будуць добрымі, нават калі часам яны падаюцца цяжкімі й балючымі.

Бог стварыў нас, а таксама вызваліў нас ад спагнаньня й рабства грэху. Ён паабяцаў нам жыцьцё, поўнае волі й плённасьці. У нас няма аніякіх прычынаў курчыцца ад страху, думаючы пра тое, што нам прынясе скарэньне. Ён ня мае жаданьня зрабіць нашае жыцьцё няшчасным. Ён хоча, каб мы зазналі валадарства любові.

Адданае хаджэньне за Ісусам патрабуе скарэньня Яму. Мы ня можам трымацца ўласнага раскладу й адначасова ісьці за Ім. Гэта толькі спрычыніць болей напружаньня ды стрэсу. Мы ня ведаем, куды Ён будзе весьці, але мы ведаем, што Ён добры й што Яму можна давяраць. Ён стварыў нас на добрыя справы, якія Ён загадзя падрыхтаваў дзеля нас.

Зараз самы час аддаць Яму лейцы, каб Ён накіраваў вашае жыцьцё ў найлепшае месца, лепей за тое, што вы можаце сабе ўявіць.

У наступныя шэсьць дзён вы больш дэталёва прачытаеце аб кожнай фразе са штодзённай малітвы аб скарэньні Ісусу, што здолее радыкальна зьмяніць вашыя зь Ім адносіны.

Госпадзе Ісусе, я скараюся Табе.

Сілай Твайго Духа я…

Пайду туды, куды Ты хочаш, каб я йшоў,

Зраблю тое, што Ты хочаш, каб я зрабіў,

Скажу тое, што Ты хочаш, каб я сказаў, і

Дам тое, што Ты хочаш, каб я даў.

Дзеля Твае славы й чэсьці. Амін.

Ці вы гатовыя схіліць калена, каб скарыцца Ісусу, гэтак уважаючы Яго за свайго Збаўцу й Госпада? Калі нешта перашкаджае вам, проста скажэце Яму пра тое ў малітве, альбо напішэце ліст, у якім патлумачце, чаму вам так цяжка скарыцца.