AKAM 18
18
Korinth Arongsopi Along Pol Birta Keme Kepachethang
1Labangso aphi Pol Athens arongsopi otekangsi Korinth arongsopi damlo. 2Hadak alangli Akuila pu inut Jihudi amonit pen chetong-lo. Alangli ke Pontas adetsi amahang thek-lo. Alangli amethang apiso, Prisilla pen pen Itali adet pen vangmirak-lang. Pima Jihudi atum an Rom arongsopi pen dam nangji pusi Klodias Recho hukum pilo. Pol halatum pen kechetongjisi damlo, 3lapen alangli halatum pen dorap rap lapen klem rap rap-lo. Pima alanglita halatum asonthak thak ok-reng akamsi klemlo. 4Alangli Sabbath Arnitinta sinagog#Sabbath Arni lapen Sinagog alamjir kepachini alam ke Mar 1.21 alongle longnon arlo lam thansi Jihudi lapen Grik atum aphan kepakroiji bor-ilo.
5Bonta Silas lapen Timothi Masedonia adet pen hadak nangkele ahut Pol Birta Keme kepachethang-loksi apor padamlo. Jisu helo Khristolo pusi alangli Jihudi atum aphan haki pilo. 6Bonta Jihudi atum Pol aphan khamkhelo lapen pinremlo. Lasi Pol amethang ape chehejirsi halatum aphan pulo, “Nanglitum avi nanglitum methang aphuthak padonang! Lake neli dai ave! Non pen apara neli Jihudi kalidet atum alongsi dampo.”
7Lasi alangli halatum aphan otekangsi Taitas Jemtas pu inut Jihudi kalidet ahem do damlo. Labangso amonit ke Arnam aphan kangduk abang-lo, lapen alangli hem ke sinagog adungsi dolo. 8Bonta sinagog ahemphu, Krispas lapen alangli hem amonit atum an Hemphu aphan kroilo; lapen Korinth asor ake-ongpi atum alangli kethan alam arjudunsi kroilo lapen baptisom enlo.
9Ningve isi Pol ning arjan thek-long-lo. Ning arjan along Hemphu alangliphan pulo, “Phereri, nang lam thanvernon lapen orinon, 10pima ne nanglong do. Badu amonitta nangphan pasung un-edetji, pima labangso arongsopi angbong nemethang amonit do-o.” 11Lasi Pol hadak ningkan isi ra ebeng an dosi monit atum aphan Arnam alam thanbomlo.
12Gallio aphan Akaia adet a-Govornor batdet aphi, Jihudi atum aning isipetpen Pol aphan vangpak-lo, lapen alangliphan nepsi Kangsai anghoi angno ponlo. 13Halatum pulo, “Aronre abidi pen Arnam aphan kepangdukjisi labangso amonit ke, monit atum aphan kepakroiji bor-ibomlo!”
14Pol ningjeji dok dok ahut Gallio Jihudi atum aphan pulo, “Kopine kehingnodak, kalite kechokche akam apotsi neli ingsai nangji pu asonte neli nanglitum alam karjuji athe doji apot-lo, Jihudi atum! 15Bonta nonke lam hei hei, amen hei hei lapen nanglitum methang aron alam chot apotsi, lake nanglitum methangle chingsaidamnon. Neli lason alam ke ingsaise.” 16Ansi alangli halatum aphan kangsai anghoi angno pen padamjuilo. 17Hala kadokave atum Sosthenes pu sinagog ahemphu aphan nepsi kangsai anghoi angno chok-lo. Bonta Gallio-ke labangso alam aphan thangta mathathedet-lo.
Pol Antiok Arongsopi Kechevoi
18Pol hadak kekroitang atum along penang arni dolo. Ansi alangli hala-tum pen chepadisi telongpi pen Siria adet kedamji aphan barlo. Prisilla lapen Akuillata alangli long dunlo. Alangli Senkiria arongsopi pen barbe ako hadak achu chingtip-lo, pima alangli aphrang pen aseme dolo.#Aseme dolo: Aseme ateng akam klem patangdet lote, Jihudi atum achu kechingtip aron-atang do. Lake aseme ateng keklem kepatang angthek-lo. Kela 6.18 19Ansi alanglitum Ephesas arongsopi nanglelo. Pol hadak Prisilla lapen Akuilla aphan otekangbup-lo. Hadak alangli sinagog arlo dunsi Jihudi atum pen lam chethanlo. 20Lapen penangbak arni hadak kedoji aphan monit atum alangliphan choningrilo, bonta alangli kroikredet-lo. 21Alangli halatum pen chepadisi pulo, “Jongsi Arnam aning hang tangte, neli nanglitum along vangthujilang.” Ansi alangli telongpi chethapsi Ephesas arongsopi pen damlo.
22Alangli Sijeria arongsopi nanglesi Jerusalem Arongsopi damlo, lapen hadak mondoli atum pen kardom chepisi Antiok arongsopi damlo. 23Hadak penang arni dodet aphi alangli hadak pen damlo lapen Galasia adet lapen Phrigia adet arong arong damsi kekroitang atum akekroi pathirlo.
Ephesas Lapen Korinth Arongsopi Along Apollos Lam Kethan
24Halabangso ahut Apollos pu inut Alekjendria arongsopisi amahang kethek a-Jihudi Ephesas arongsopi vang-lo. Alangli inut lam ningje thekser lapen hastro alam kechinipame abang-lo. 25Alangli Hemphu atovar charlitang-lo, lapen athikpetsi Jisu alamjir monit atum aphan thanbomlo. Bonta alangli Jon abaptisomsi chinichot-lang. 26Alangli phereredetsi sinagog arlo lam kethanji pangcheng-lo. Bonta Prisilla lapen Akuilla alangli kethan alam arjudun longsi alangliphan amethang ahem cheponlo, lapen alangliphan athikpetsi Arnam atovar than pamelo. 27Ansi Apollo Grik adet kedamji aning hang-lo. Lasi Ephesas arongsopi kedo kekroitang atum alangliphan rapdunlo. Alanglitum Grik adet kedo kekroitang atum aphan loh toksi alangliphan chak asonte mepar pusi choningrilo. Apollos hadak lesi, Arnam akangjinso pen ajok kekroi atum alangli pen akerap long-olo. 28Pima alangli rat angno Jihudi atum pen jasemet lam chedansi, lapen Jisu helo Khristolo pu hastro pen aporman paklangsi halatum aphan paremlo.
Цяпер абрана:
AKAM 18: KARBIBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Karbi Holy Bible © Bible Society of India, 2010.
Used by permission. All rights reserved worldwide.