AKAM 17
17
Thessalonika Arongsopi Along Pol Lapen Silas Birta Keme Kepachethang
1Pol lapen Silas Amphipolis lapen Apolonia arongsopi ke-dongponput atovar damsi Thessalonika lelo. Hadak Jihudi atum asinagog dolo. 2Pol kai asonthotsi sinagog along dunlo, lapen Sabbath Arni panithom alangli monit atum pen hastro alam chedanlo. 3Alangli halatum aphan hastro paklang-lo, lapen hastro alam athe than pajirmisi Khristo ke kesung chechak nangkok-lo lapen kethi pen thur nangkok-lo pu thanlo. Pol pulo, “Labangso a-Jisu alamjirsi neli nanglitum aphan thanlo. Alangli helo Khristolo.” 4Ansi halatum angbong penang atum Arnam aphan kangduk a-Grik amonit ake-ongpi atum, lapen arloso atum angbong kejabom atum labangso alam kroisi Pol lapen Silas abe dunlo.
5Bonta Jihudi atum alanglitum aphan lang un-elo, lasi amethang atum along penangbak kehingnodak khangjang lapen monit jong jong pinso amonit atum aphan pangrumsi Pol lapen Silas aphan pathurpaksi rongsopi pahuriseilo. Halatum Pol lapen Silas aphan rat angno kevanji aphan ridamsi Jemon ahem vangpak-lo. 6Bonta hadak Pol lapen Silas aphan longledetsi halatum Jeson lapen kekroitang penangbak atum aphan nangchethursi rongsopi kechepahemphu atum angno vanlo, lapen hangjosi pulo, “Labangso amonit atum helo pirthe kepharleppharlo atumlo. Lapen nonke latum ladakta vangtang-lo. 7Lapen Jeson halatum aphan amethang ahem chak-lo. Latum recho Kethe#Ajehak a-Baibel hastro along ke Sijar pusi ketok do ahukum hei hei kroikrelo, atheke Jisu pu inut akaprek arecho do pusi latum than pachethang-lo.” 8Labangso alam arjulongsi armu atum lapen rongsopi kechepahemphu atum aning jangjesi huriseilo. 9Ansi halatum Jeson lapen hala akaprek atum aphan adai patusi lophlot-lo.
Berea Arongsopi Along Pol Lapen Silas Birta Keme Kepachethang
10Keningve pen mamat kekroitang atum Pol lapen Silas aphan Berea arongsopi toijuilo. Alanglitum hadak lesi Sinagog arlo dunlo. 11Thessa-lonika arongsopi asor mute la Berea arongsopi amonit atum aning memulo, lapen kechiniji aning kehang pensi halatum kethan alam arjudunlo, lapen Pol kethan alam ahokma, mate ahok kalima, la kechinijisi alanglitum arnivangta hastro langsi pangbarverlo. 12Halatum angbong keja atum ake-ongpi atum kroilo; lapen Grik arloso atum angbong lapen Grik apinso atum angbongta kekroi atum do-olo. 13Bonta Pol Berea arongsopi alongta Arnam alam pachethangbomlo pu alam arjulongsi Thessalonia arong-sopi kedo a-Jihudi atum hadak vangsi Berea arongsopi asor atum aphan chorung chojarlo, lapen aning pajangjesi pathurpak-lo. 14Ansi hala mamat kekroitang atum Pol aphan talo akung toijuilo; bonta Silas lapen Timothi ke Berea arongsopisi dokok-lo. 15Pol aphan kethondun atum Athens arongsopi anta dunlo; lapen Pol halatum aphan pulo. “Silas lapen Timothi nelong pavang serakrak-non.” Ansi halatum kethondun atum Berea arongsopi nangchevoilo.
Athens Arongsopi Along Pol Arnam Alam Kepachethang
16Pol Athens arongsopi along Silas lapen Timothi aphan kanghong un ahut, halabangso arongsopi angbong kumlin hei hei do-o thek-longsi aning aduk dolo. 17Lasi alangli sinagog along Jihudi atum pen lapen Arnam aphan kangduk, Jihudi kalidet atum pen lam chethanlo; lapen arnivangta hithi adim, hadak kevang amonit atum penta lam chethanlo. 18Epikurian pu isi asong lapen Stoik pu athek-kere atumta alangli pen lam chedanlo. Halatum angbong manene atum arjulo, “La kesoibok abang kopisi kepumati?” Akaprek atum thakdunlo, “Alangli kopine akaprek arnam atum alamsi kepubon.” Jisu lapen alangli kethi pen kethur alamjirsi Pol thanlo apotsi halatum lapuson pulo. 19Lasi halatum Pol aphan Areopagas pu rongsopi amei along ponsi pulo, “La Nangli kethanmi alam kopima, la nelitum kechinijisi ning hang-lo. 20Nelitum karjulongle pinlang alamsi nangli nelitum aphan thanlo. Lasi lahei hei alam athe kopima, la kechinipamejisi nelitum ninghang-lo.” 21Pima Athens arongsopi asor lapen hadak kedo akaprek adet amonit atum anta akemi kemi alamsi kethanji lapen akemi kemi alam karjudunloksi apor kepadamji aning hang-lo.
22Pol Areopagas amei angbong arjapthersi pulo, “Athens kedo akorte marli atum! Neli thek-long-lo, nanglitum kadokave alam anat setta dhoromipik-lo. 23Pima neli nanglitum arongsopi angbong kedam kevang ahut nanglitum kangduk amar hei hei aphan langcharsi isi adovan thek-long-lo. Halabangso adovan athak ‘KECHININEDET ARNAM APHAN’ pu alam ketok dolo. Tangte nanglitum chininedet setta la aphan ingduk ardomlo, labangso alamsi non neli nanglitum aphan thanpo. 24Pirthe lapen labangso athak kedo amar an kepinchong a-Arnam helo sining lapen pirthe a-Hemphulo. Alangli ke monit atum kekim akardom ahem thepi kangthir-heihei arlo dode. 25Lapen alangli kopine amar nangjilang apotsi monit atum alangliphan ruthailo, lapu kali. Pima alangli methangsi kadokave amonit aphan apran lapen achethe lapen kadokave amar piverlo.#1 Rec 8.27; Isa 42.5; Akam 7.48 26Inut amonit pensi alangli monit akhei an paplang-lo, lapen alangli halatum aphan pirthe adang padothip-lo. Alangli halatum aphan aphrang pen athikpet apor hei hei thikpilo, lapen halatum kedoji adim ahoi hei heita thik-lo. 27Monit atum Arnam aphan nangji lapen aning kethe dosi alangliphan ri pen longji pu mathajimene pu aphansi alangli la klemlo. Bonta alangli ke ilitum abangphutin pen heloving-lo, lapu kali. 28Atheke komane abang kepu asonthotsi,
‘Alangli pen ajoksi ili reng-lo,
chetevarlo lapen dobomlo.’
Lake nanglitum angbong manene lunjir ketok atum kepu asonthot-lo,
‘Ilitumta alangli somar atumlo.’
29Ilitumke Arnam asomar atumlo apotsi, Arnam ke monit atum amethang abidi pen lapen agian pen keselam aser, kalite arup, kalite a-arlong akumlin asonthak thak-lo pu matha nangnelo. 30Hako ahut ke monit atum Arnam aphan akechinine alam Arnam mathathedet-lo setta nonke kadokave adim kedo amonit atum an kehingno akam hei hei pen aning kecheruijisi alangli hukum pilo. 31Pima alangli kangvaitang amonit inut pen ajok alangli pirthe adang aphan athikpet pen kangsaiji aphan isi arni pathiktang-lo. Alangli halabangso amonit aphan kethi pen pathursi kadokave amonit aphan labangso alam aporman pitang-lo.”
32Kethi pen kethur alam Pol keningje arjulongsi manene atum alangliphan ingnekchoilo. Bonta anut kaprek atum pulo, “Nelitum labangso alam nangli pen arjuthu ingtungduk lang.” 33Ansi Pol halatum angbong pen damjuilo. 34Bonta manene amonit atum alangli long chelangdunsi kroilo. Halatum angbong Dionisias pu inut Areopagas amei amonit, Damaris pu inut arloso lapen akaprek penang amonit atumta chelangdunsi kroilo.
Цяпер абрана:
AKAM 17: KARBIBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Karbi Holy Bible © Bible Society of India, 2010.
Used by permission. All rights reserved worldwide.