AKAM 19
19
Ephesas Arongsopi Along Pol Lam Kethan
1Apollos Korinth arongsopi kedo un ahut Pol heloving adet vurdamsi Ephesas arongsopi vang-lo. Hadak alangli sangho penang atum pen chetong-lo, 2lapen alangli halatum aphan arjulo, “Nanglitum kekroi ahut Karjong Kangthir long-loma?”
Halatum thakdunsi pulo, “Longlelang, Karjong Kangthir do puke nelitum arjuta arjulonglelang!”
3Pol halatum aphan arjulo, “Tangte nanglitum kopi abaptisomsi enlo?”
Halatum thakdunsi pulo, “Jon abaptisom.”
4Pol Pulo, “Jon ke pap pen ning kecherui abaptisomsi pilo; lapen alangli phi kevangji abang aphansi kroi masi pusi Jon Baptist Israel amonit atum aphan thanlo. Halabangso abang ke Jisu helo.”#Mat 3.11; Mar 1.4,7-8; Luk 3.4,16; Jon 1.26-27
5Labangso alam arjulongsi halatum aphan Hemphu Jisu amen pen baptisom pilo. 6Pol halatum aphuthak ari batsi halatum aphuthak Karjong Kangthir hirlo. Ansi halatum adet kaprek kaprek alam pen keningjeji pangcheng-lo, lapen Arnam alam pachethang-lo. 7Halatum kadokave pinso amonit bang krehini anbak dolo.
8Pol sinagog along dunsi chiklo jonthom anta phereredet pen lam thanlo, lapen monit atum pen lam chedansi halatum aphan Arnam a-Rat alamjir kepakroiji bor-ilo. 9Bonta halatum angbong manene atum aning chepangtangsi kroikredet-lo; lapen rat angnosi Hemphu a-Tovar aphan pinremlo. Lasi Pol halatum aphan otekangsi kekroitang atum cheponlo, lapen Tirannas pu lam kethan ahem along arnivangta lam thanlo.#Ajehak a-Baibel hastro barim along ke adap baji 11 pen arni kangsam baji 4 an pu alamta do 10Lasonsi alangli ningkan hini anta klemverlo. Labangso pen ajok Asia adet kedo atum an, Jihudi lapen Jihudi kalidet atumta Hemphu alam arjulong-lo.
Seba Pu Inut Kurusar Kethenei Asopo Atum Alam
11Arnam Pol pen ajok akemang-humemepik akam hei hei klembomlo. 12Lasi Pol ke-en apoho lapen apevenso hei hei anchot setta keso atum along ponsi halatum akeso melo, lapen karjong langno atum halatum pen barlo. 13Bithe bitha adim damsi karjong langno kephlungbom a-Jihudi penang atumta Hemphu Jisu amen pen karjong langno atum aphan kephlungji bor-ilo. Halatum karjong langno atum aphan pulo, “Pol kethanbom a-Jisu amen pen ne nangtum aphan hukum pilo.” 14Seba pu Jihudi atum akurusar Kethenei asopo bangthroksi atumsi lason klembomlo.
15Bonta hala karjong langno halatum aphan pulo, “Ne Jisu aphan chini, lapen ne Pol aphanta chini; bonta nangtum ke komat-lo?” 16Ansi hala karjong langno kepho abang halatum athak chonkrap-lo, lapen halatum kadokave aphan haidet-lo. Lasi halatum areng solo lapen areng angsesi halabangso ahem pen kat-lo. 17Ephesas arongsopi kedo a-Jihudi atum lapen Jihudi kalidet atum anta labangso alam arju longsi pherehurlo, lapen Hemphu Jisu anong pathemuchot-lo. 18Ansi kekroi-tang penang atum rat angno vangsi amethang methang keklemtang, akehingno akam an chethanlo. 19Maya Kanghoithek ake-ongpi atumta aloh athui an pangrumpetsi kadokave amonit angno me phrinlo. Halatum aloh an anam lakhapetsi rup atangka#Rup atangka isi ke rong aso atum arni isi akangdat anamlo suri phokep an pleng-lo. 20Lasonsi Hemphu alam chethang ponbomlo, lapen ajakongta theponbomlo.
Ephesas Arongsopi Angbong Kehurisei Alam
21Lahei hei plangdet aphi Pol Masedonia lapen Grik adet angbong vurponsi Jerusalem arongsopi kedamji mathalo. Alangli pulo, “Hadak damdet aphi ne Rom arongsopita langdamvek nangji.” 22Lasi alangli amethang ari asangho atum angbong pen Timothi lapen Erastas aphan Masedonia adet toilo, lapen alangli methang ke Asia adetsi penang arni dobomlo.
23Labangso ahutsi Hemphu a-Tovar alam pen apot Ephesas arongsopi angbong huripik-lo. 24Pima Demetrias pu inut Abeni rup pensi Artemis pu arnampi akardom ahemthepi a-arjan selamlo, lapen labangso pen ajok beni atum aphan ale palong-olo. 25Lasi alangli halatum lapen lason keklem atum aphan pangrumpetsi pulo, “Komarli atum! Labangso akam pen ilitum ale long-olo, lake nanglitum chinihurlo. 26Nonke nanglitum la Pol keklembom akam thek-longhurlo, lapen arjulonghurlo. Monit atum keselamchot a-arnam hei hei ke arnam kali binong pusi alangli pulo. Lapusonsi alangli Ephesas asor atum aphanchot kali, bonta Asia adet ongdung amonit atum aphanta pakroisi ilitum angbong pen terek ponlo. 27Lake kepherememe alamlo, atheke, monit atum ilitum akam hingno pusi pupo. La anchotta kali, la thepik arnampi, Artemis akardom ahemthepita thangta kalidet cheplangpo, lapen la Asia adet lapen pirthe adang amonit an kangdukhur arnampi anong ketheta avedetpo.”
28Armu atum labangso alam arjulongsi jasemet aning thi-lo, lapen hangjo josi pulo, “Ephesas a-Artemis ke thepik binong!” 29Rongsopi adang an huripik-lo. Ansi monit atum Gaias lapen Aristarkhas pu Masedonia adet amonit banghini aphan nepsi mei ahem along ponserak rak-lo. La Gaias lapen Aristarkhas ke Pol bithe bitha kedam ahut kejalang dun atumlo. 30Pol amethangsi rat angno kedamji aning hang-lo; bonta kekroitang atum alangliphan khang-lo. 31Halabangso alongri keja atum angbong penang atum ke Pol ajirpolo. Halatum Pol along monit toisi mei ahem along cheklangdunri pusi choningrilo.
32Ansi mei along kechingrum amonit atum alam chetontedetsi huriseilo. Manene atum ke eson alam pulo lapen akaprek atum ke ason kaprek alam pusi hangjolo, pima halatum angbong ake-ongpi atum ke, hadak kopi apotsi chingrumloma, lata chininelo. 33Jihudi atum Alekjendar aphan rat angno paparjap-lo apotsi manene atum ke Alekjendar aphansi adai kedo abang tinkok-lo. Ansi Alekjendar monit atum aphan kepadoklipjisi ari pen asin paklang-lo, lapen kechethakdunji pangcheng-lo. 34Bonta alangli ke Jihudi amonit-lo pu chinisi monit atum aphrang asonthak thaksi porphai hini anbak hangjo josi pulo, “Ephesas a-Artemis ke thepik binong!”
35Aphisi rongsopi amei aloh ketok abang halatum aphan padoklipsi pulo, “Ephesas kedo akortemarli atum! Ephesas arongsopi helo Artemis thepi akardom ahemthepi lapen sining pen nangkeklo a-arlong kangthir aphan kerai abang-lo, lake kechinine abang matsi dolangma? 36Lahei hei alam ahok-he puke baduta pu-un-e. Lasi nanglitum doklip nangji lapen kematha pameme penke klem nangnelo. 37Labangso amonit atum kardomhemthepi amar thangta inghuhe lapen ilitum a-arnampi aphanta thangta pinremre setta nanglitum alanglitum aphan ladak vantang-lo. 38Demetrias lapen alangliphan keklempi atum jongsi komane abang aphan adai ketinji alam do tangte, lake kangsai atum do lapen det ahemphu atumta do. Alanglitum hadak-le pachingsainang. 39Bonta nanglitum jongsi la aparta kopine kechoningriji alam do tangte, lake kai ateng, rat atum ameisi parai unji. 40Pima pini kehurisei apot ilitum aphan adai ketinmeme alam do: Labangso akehurisei athe thangta avedet apotsi ilitum chethak dun atovar avedetji.” 41La pudetsi alangli mei pachekak-lo.
Цяпер абрана:
AKAM 19: KARBIBSI
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Karbi Holy Bible © Bible Society of India, 2010.
Used by permission. All rights reserved worldwide.