Maatiyos 25
25
Dhaggitinnixe tamana barhah aymassal
1“Carshi nigsinna, dhaggitinnexe tamana barhä marcawwih garawna sinni fawaanislih tewceyah higgida. 2Tenko koon duudit, koon lel kas-lem kuuk yinin. 3Koona duuda sinni fawaanislih zeet mibeyinnooni, 4amaa kas-lem laakin sinni fawaanislih zeet nuwattadde bishshiiten. 5Marcawwi akko caawiteyaako inkoh cunduguleenih dhiinen. 6Barti abrha tekke gedda: ‘Taykinna marcawwi yemeetek akah garaytoonak eweca’ tarhxe deeco tekke. 7Sarrah amaa dhaggitinnexe sayto inkoh uguteenih sinni fawaanis yisqirribin. 8Amaa duudit kas-le marak: ‘Ni fawaanis nok bado lek, sinni zeetko dagum noh uxuwa’ akko yerhxin. 9Amaa kas-le mari lel: ‘Notta kee sina mirhiicaaki, tamaa yaabixe mara fanah tedeynih sinnim dhaamita’ arhxuk alle yedebbin. 10Usun dhaamoona aduuk lel amaa marcawwi yemeeteyaako, amaa tinqirribeh tinem reedodde kaalih orobeenih lel amaa caraf alfiime. 11Sarrah aki dhaggitinnexe sayto: ‘Maddara, maddara, noh fak’ arhxuk yemeetin. 12Usuk laakin: ‘Rummah sinak arhxiyuk ane, sin maarhige’ akko yerhxe. 13Amaydo, yi mumut hi lellec hido saaca mitaarhigiinimhi sabbatah himma-abita.
Talanton aymassal
(Luukas 19:11-27)
14Carshi nigsinna, wuli kallaaxeyaako ishi khaddamteh deecimeh, ishi iraaro alle amaanatishe xiyawtoh higgida. 15Wuli tiyah koona talantoon#25:15 Maatiyos 18:24 yane caddos ubul., wuli tiyah lamma, wuli tiyah inketta, inkoh ten ten dhic balih akah yoxoye. Sarrah lel yedee. 16Amaa koona talantoon luuk yineti akkanih yedeeyaako yiybicshireh koona talantoon ziyaada yiksibe. 17Amaa lamma talantoon luuk yineti lel amayim balih lamma talantoon yiksibe. 18Amaa inki talantoon kabbaateti laakin yedeeyaako baarho faraaceh ishi maddarih fiddat solaadi amadde sucuse. 19Dherh geddaako sarrah lel taykinna amaa garuuzahi maddari yemeeteyaako xisaab tenlih abe. 20Amaa koona talantoon kabbaateh yineti lel ziyaadah koona talantoon baaheh: ‘Maddara, koona talantoon yolle xabteh tinito, anu lel kasbeh koona talantoon adde oseh aniyo’ arhxuk kab alle yerhxe. 21Kaa maddari: ‘Mecem abte, mece tiya kee umun kin garuzzo kito. Dagumulle umun tekkeh tanito, anu lel mangumhi tiya kok abo kiyo. Ishi maddarih xedenidde orob’ akko yerhxe. 22Amaa lamma talantoon luuk yineti lel: ‘Maddara, lamma talantoon yolle xabteh tinito, anu lel kasbeh lamma talantoon adde oseh aniyo’ arhxuk kab alle yerhxe. 23Kaa maddari: ‘Mecem abte, mece tiya kee umun kin garuzzo kito. Dagumulle umun tekkeh tanito, anu lel mangumhi tiya kok abo kiyo. Ishi maddarih xedenidde orob’ akko yerhxe. 24Amaa inki talantoon kabbaateh yineti lel: ‘Maddara, azriinnixitom orbishsha, faax-ishinnixito zara lel yaskatte dhacuma xiyawto kitom aarhige, 25amaymih mashshiiteyaako, edeeh ku talantoon baarhodde sucuseh aniyo. Kado lel kum taykinna’ arhxuk kab alle yerhxe. 26Kaa maddari laakin: Ko uma buhus kin garuzzo! Anu azriinnixiyom orbisham kee faax-ishinnixiyo zara askattem teerhege? 27Yi fiddat solaadi bankadde oobishsho kolle tine, amiite gedda lel innim dhalaalih bishshiite dhaarhe. 28Amaydo, amaa talantoon akko beyteenih tamana talantoon le tiyah uxuwa. 29Amayim lel le tiyah ziyaada akah ossimteyaako manginatah yaallo, hin tiyaako laakin amaa luuk yinem gantah akko tadawo kinamhi sabbatah kinni. 30Ta makko hin garuzzo lel irot ditelle cida. Amadde lel weeca kee ikokti xarqam yakko kinni.
Abayshimat firde
31 Xiyawti Barhi inkoh malaykutlih ishi nabnedde yamiite gedda, sarrah ishi nabne le nugus-kurselle defeyo kinni. 32Umbuka wathun kaalle yekettiinih lel tamaa loyni alaako ciido akah barhishaaka balih xiyaw sittaako barhisho kinni. 33Ciido ishi mizgaako, ala laakin ishi guraako hayo kinni. 34Sarrah amaa Nugus kaa mizgaako yane marak: ‘Ko yi Abbah dhaacolito, amowa, ta caalam dhishshimtemko taahe sinah tinqirribe nigsinna iwrisha. 35Amayim lel, anu safriiteh aniyuk yi bettishshen, bakhaareh aniyuk yi teefecin, gerhenta kiyuk yi kabbatten, 36carrazeh aniyuk yi sarishshen, laxuuteh aniyuk yi alcaafishshen, xabshedde aniyuk yi gufteenimhi sabbatah kinni’ akko yarhxo kinni. 37Sarrah xaqqi-wannun: ‘Maddara, safritteh ku nubleh ku bettishnem, hido bakharteh ku neefecem manda kinni? 38Gerhenta tekkeh ku kabbatnem, carrazzeh lel ku sarishnem manda kinni? 39Laxutteh, hido timxibbisheh ku nubleh ku gufnem manda kinni?’ arhxuk alle yadabboona kinon. 40Amaa Nugus lel: ‘Ta cindha yi saculko inkettak abteenim, yottak abteenim balih kinam rummah sinak arhxiyuk ane’ yerhxeh alle yadabbo kinni.
41Guri gabooko yane marak lel: ‘Ko abaarolito, tamaa ibliis kee kaa malaykutuh tinqirribeh tane umman geedit gira fanah yok aduwa. 42Amayim lel anu safriiteh anuk folo yoh maaxayinnitiini, bakhaareh lel yi maafacitiini. 43Gerhenta kiyuk yi mikabbaatitiini, carrazeh aniyuk yi misarishitiini, laxuute gedda kee xabshedde aniyuk yi migufitiini’ akko yarhxo kinamhi sabbatah kinni. 44Sarrah usun: ‘Maddara, manda kinni safritteh hido bakhaaritteh hido gerhenta tekkeh hido carrazzeh hido laxutteh hido lel xabshedde ku nubleyaako ku akhdume waynem?’ arhxuk alle yadabboona kinon. 45Usuk lel: ‘Ta cindhadhdhaa maraako inkettah abinnixitiinim, yottah abe wayteenim balih kinam rummah sinak arhxiyuk ane’ arhxuk alle yadabbo kinni. 46Amaydo, usun umman geedit cazaab fanah, xaqqi-wannun laakin umman geedit aniina fanah yadawna kinon.”
Цяпер абрана:
Maatiyos 25: SCC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©2024 Wycliffe Ethiopia