Maatiyos 26
26
Yeesus gidfohi xagara
(Markos 14:1-2; Luukas 22:1-2; Yohannis 11:45-53)
1Yeesus ta waani inkoh yerhxeh abayshe gedda, ishi katattaynitik: 2“Lamma lellecik sarrah Faasigi yakko kinam taarhigin, Xiyawti Barha lel masqalakke takarimo kaa yasxawna kinon” akko yerhxe.
3Sheekhat manabottit kee dikti naba mara, Kayaafas akko yarhxin naba shekhti kanshellolle yekettiinih, 4Yeesus siixoh kaa yibbirhiinih kaa yagdafoona inkidde zatteyen. 5“Xiyaw fanadde andhax kee dhaw yakkek, cidti geddadde yakko alle mitane” lel yerhxin.
Yeesus Beetcaniyalle yamsukkute
(Markos 14:3-9; Yohannis 12:1-8)
6Kado, Yeesus Beetcaniyalle sakna-le Simcoon caredde anuk, 7wuli numa qaali kin cithir-le zeet alabaastiros akko yarhxin dhayittooko siraaximte tharmuuzudde bahteh alle temeeteyaako, usuk thawlalle defeyeh beetak anuk amolle akko xadhdhe. 8Katattaynit tayim yublin gedda, kurraynih: “Ta abazzar aymih kinni? 9Amayim lel tayim mango solaadih yimibbixeh baaxentitih yamxawo dhiice dhaarhemhi sabbatah” yerhxin. 10Yeesus laakin tayim yeerhegeyaako: “Ta numa yottah mecem abtemhi sabbatah aymih tee tayribbishiini? 11Amayim lel, baaxentit umman gedda litin, yotta laakin umman gedda taalloona makitiinimhi sabbatah kinni. 12Ta cithir-le zeet yi nabselle xadhdhem, yi macagah terhxeh abtem kinni. 13Ta Meci Wari umbuka caalamko alle warroyinnanille, ta numa abteh tanem, tee mazakkartah xussuumo kinam, rummah sinak arhxiyuk ane” akko yerhxe.
Yahuuda Yeesus yasxaw abaysha
(Markos 14:10-11; Luukas 22:3-6)
14Sarrah amaa lamman kee tamanko wuliti, Iskariyoot Yahuuda akko yarhxinya, sheekhat manabottitille yedeeyaako: 15“Kayya sinalle osxoyemko ayim yoh taxawna kitiini?” akko yerhxe. Usun lel fiddat solaadiiko soddom akah yoxoyin. 16Amaa geddaako sarrah lel kayya akah yasxaye caashir wagiyak yine.
Faasiga katattaynitlih
(Markos 14:12-21; Luukas 22:7-14,21-23; Yohannis 13:21-30)
17Kado, Cadublat Xabazahi cidko erherh lellecidde katattaynit Yeesusulle yemeetiinih: “Faasigi dirar betto awla koh nasqirribem nok fadhdha?” akko yerhxin. 18Usuk: “Daafo fanah aduwantaaki wuli xiyawtok: ‘Yi waqhti gufeh yane. Faasiga inni katattaynitlih ku carelle abo kiyo yerhxe Mudarris’ akko erhexa” yerhxe. 19Amaa katattaynit lel Yeesus akah ten yeemereekah abeenih, Faasigi dirar yisqirribin.
20Baarho dhumte gedda, amaa lamman kee tamanlih thawlalle cikkishiteh beete. 21Usun beetak lel: “Sinko wuliti yi yasxaw kinam, rummah sinak arhxiyuk ane” yerhxe. 22Usun mangum yixziniinih laklakalle: “Yotta kinniho, Maddara?” yarhxoona erherhishen. 23Usuk: “Tamaa tsaxladde ishi gaba yottaalih tekerisheti yi yasxaw kinni. 24Xiyawti Barhi tamaa kaa sabbatah akah tunkuttubeekah yadiye, kaa sabbatah Xiyawti Barhi akko yandhibbirheti laakin kaa careyta! Ta xiyawti aabuke wayeh yakkeedo akah ashshe dhadhdhe” yerhxeh alle yedebbe. 25Yahuuda, tamaa kaa yasxaw leya: “Yotta kinniho, Mudarris?” yerhxeh alle yedebbe. Usuk: “Terhxeh tanito” akko yerhxe.
Maddari dirar
(Markos 14:22-26; Luukas 22:14-20)
26Kado, usun beetak, Yeesus kinnas yibbirheh, dhaaco alle abeyaako yigdileh katattaynitih yoxoyeh: “Hina, beta, tati yi nabse kinni” akko yerhxe. 27Usuk wuli kobbaayatto yibbirheh, cawwatoyshitek sarrah, tenah yoxoyeh: “Akko ucuba, inkoh, 28amayim lel tayim zambi xabbotuh mango marah arhxuk xarhite yi biilo cahdiya kinamhi sabbatah kinni. 29Taymik sarrah, aykee amaa lellec, yi Abbah nigsinnadde sinlih malammih aacubendah, ta cinab darohimko aacabo makiyom sinak arhxiyuk ane” akko yerhxe.
Bithroos xinnan Yeesus yaakumeh warisha
(Markos 14:27-31; Luukas 22:31-34; Yohannis 13:36-38)
30Wuli faylat mazmuur abeenimko sarrah lel, Oolac Koomalle yewcin. 31Sarrah Yeesus: “‘Anu loyna aatako kiyo, ciido lel faax-tarhxo kinni’#Zakariyya 13:7 yarhxiinim tunkuttubeh tanemhi sabbatah, kabar inkoh yi xinteenih yi xabtoona kitin. 32Rabaako ugutamko sarrah laakin, sinko basolle Galiila fanah adaw kiyo” akko yerhxe. 33Bithroos: “Usun walaa inkoh ku xineenih ku xaboona kibah, anu caduruh ku xineh ku xabo makiyo” akko yerhxe. 34Yeesus: “Kabaradde, dor-hotti andhaxamko basolle, adooxa gedda yi xinto kitom, rummah kok arhxiyuk ane” akko yerhxe. 35Bithroos: “Walaa kottaalih rabemih, ku xino makiyo” akko yerhxe. Katattaynit lel inkoh amayim balih yerhxin.
Yeesus Gat-shemaanelle yassilliye
(Markos 14:32-42; Luukas 22:39-46)
36Sarrah Yeesus wuli Gat-shemaane akko yarhxin cara fanah tenlih yedeeyaako: “Anu toohille edeeh assilliyendah, talle defeya” akko yerhxe. 37Bithroos kee Zibdit cindhamhi lamma isheelih beyeh, yaxzano kee yamraacado erherhishe. 38Sarrah: “Yi rooxi mangum xazzanoyeh yanek, walaa rabi fanah talle sugantaaki, yottaalih macalsita” akko yerhxe. 39Dagum tenko mirixtah yedeeyaako, kumeyaako yissilliyeh: “Abba, dhiicimtemko, ta kobbaaya yok tillaabish, yakko kibah, anu akah farhaakah makiiki, atu akah fadhdhaakah takkoo” yerhxe. 40Katattaynitille yemeete gedda lel dhiinak ten geye. Bithroosuk lel: “Inki saaca walaa yottaalih macalsitto mirhicta? 41Cakanadde orobtanki, himma-abitteenih issilliya. Ufayi rummah farhak yane, xazo laakin tante” akko yerhxe. 42Malammit gedda lel yedeyeh yissilliyeh: “Ta kobbaaya anu aacubekkah tillabto mirhiicimtah yekkemko, ku farhi takkoo” yerhxe. 43Malammih gaxe gedda, intit alle yiclishemhi sabbatah dhiinak ten geye. 44Amaymih, ten xabeh yedeeyaako, awwal waani gabbaaceh maddaxih yissilliye. 45Sarrah amaa katattaynitille yemeeteh: “Kaddih dhinteenih acrufuk taniini? Ubula, Xiyawti Barhi zambi wannunhi gabadde adde yamxaye saaca gufteh tane. 46Kata, uguta nadawok, ubula, amaa yi yasxaw leti lel kab-yerhxeh yane” akko yerhxe.
Yeesus yomxoyeh yumudhdhuwe
(Markos 14:43-50; Luukas 22:47-53; Yohannis 18:3-12)
47Usuk kaddih waanishak anuk, amaa lamman kee tamanko kin Yahuuda yemeete, kaalih mango xiyaw seefa kee gomaadi tibbirheya yinin. Usun lel sheekhat manabottit kee naba maraako farritime mara kuuk yinin. 48Amaa yasxayeti lel: “Ta anu fuguto liyoti amaa xiyawto kinni, ibbirha” yerhxeh tuumar akah yoxoyeh yine. 49Akkanih Yeesusulle yemeeteh lel: “Mudarris, nagaa!” yerhxeh kaa fugute. 50Yeesus: “Carke, akah temeetem ab” akko yerhxe. Usun lel yemeetiinih gabub alle hayenyaako kaa yibbirhin. 51Taykinna lel, Yeesuslih yine maraako wuliti, gaba yiyfiddigeyaako, sef hiriigeh, amaa naba shekhti garuzzok akko yootokeyaako cokka akko yigrice. 52Sarrah Yeesus: “Sef yatneefece mari amaa sefih yalawna kinoonimhi sabbatah, sef kaa caradde edebba. 53Anu inni abba dhaacimeyaako, usuk lel akkanih malaykutti maxaarhooko lamman kee taman#26:53 Maxaarhooko lamman kee taman 72,000 Roomaati caskarko yakkin.ko ziyaada yoh faro mirhiica takkale? 54Tayim takko alle tane yarhxe Kutuub aaginah yakmalo alle tane?” akko yerhxe. 55Amaa saacadde Yeesus amaa mango xiyawak: “Wuli shiftatto yabbarho le mara balih seefa kee gomaadiilih yotta tabbarhoona temeetiini? Maaxi yamaato maqhdas caredde defeyeyaako aydurusuk iniyo gedda, yi mabbarhitiini. 56Tayim inkoh tekkem lel, nobowat Kutuub yakmalo ciloh tekkem kinni” akko yerhxe. Sarrah, katattaynit inkoh kaa xabenyaako kuden.
Yeesus Kayaafas kee araballe kab-yarhxe
(Markos 14:53-65; Luukas 22:54-55,63-71; Yohannis 18:13-14,19-24)
57Amaa Yeesus yibbirheh yine mari lel amaa sercat dhiiceenit kee dikti naba mari alle yininille, naba shekh kin Kayaafas fanah kaa beyen. 58Bithroos lel mirixtaako naba shekhti kanshello fanah kaa katattayeh, akkuk tinemhi abayshima yablo, addadde orobeyaako amaa dhawrheenitlih defeye. 59Sheekhat manabottit kee umbuka araba lel kaa yagdafoona ciloh, Yeesusulle zirabti shaahid wagiyak yinin, 60mango zirabti shohoda kab-yerhxin hanuk, laakin inkim migeyinnooni. Abayshimalle wuli lamma yemeetiinih: 61“Ta xiyawti: ‘Yallih macbad dumuseyaako, malammih adooxa lellecille siraaxo dhiica’ yerhxe” yerhxin. 62Amaa naba shekh uguteyaako: “Taxaye radde malito? Ta xiyaw kolle ashhiduk yaniinim ayim kinni?” akko yerhxe. 63Yeesus laakin miwaanishinna. Naba shekh lel: “Atu Masiix, yane Yallih Barha tekkemko noh warishsho ku agizziziyuk ane” akko yerhxe. 64Yeesus: “Atu isheh terhxeh tanito. Taymik sarrah laakin, Xiyawti Barhi Xayla-le Yallahi mizgi gabooko defeyak#Zaabur 110:1 ubul. kee carsheeko darurudde amiituk#Daaniyeel 7:13 tabloona kitiinim, sinak arhxiyuk ane” akko yerhxe. 65Sarrah naba shekh ishi sara candhisheyaako: “Yallah waatimeh yane. Tayimko ferteh ayimti shohoda fandhe? Kaa waato toobbiinih tanin. 66Sin firdi aymotta kinni?” yerhxe. Usun lel: “Rabo akah eedda” yerhxiinih alle yedebbin. 67-68Sarrah nifille thuf akko yerhxiinih, akko yootokin. Gari lel: “Irhig iski ko Masiixo! Miyatti kok aatukuk yane?” arhxuk akko dhabboonishen.
Bithroos Yeesus xina
69Kado, Bithroos irot kanshellolle defeyak yine. Wuli garuzzö temeeteh lel: “Atu lel Galiilaati Yeesuslih tinito” akko terhxe. 70Usuk laakin: “Ayim arhxituk tanem maarhige” arhxuk umbuka tenhi nifille aluu-yerhxe. 71Irot carafalle yewce gedda, aki garuzzö kaa tubleh, amalle yine marak: “Ta xiyawti Naazret Yeesuslih yine” akko terhxe. 72Usuk lel malammih dhiiwiteyaako aluu-yerhxeh: “Ta xiyawto maarhige” yerhxe. 73Dago waqhtek sarrah, amalle yine mari Bithroosulle alle yemeetiinih: “Thummutuh atu gantah tenko tiya kito, ku lata ku ayfiddixuk tane” akko yerhxin. 74Sarrah ishe abaaro kee dhiiwito erherhisheh: “Ta xiyawto maarhige” yerhxe. Akkanih lel dor-hotti andhaxe. 75Bithroos lel tamaa Yeesus: “Dor-hotti andhaxekkah adooxa gedda yi xinto kito” akko yerhxe waani yizzikkire. Irolle yewceh lel dhacumaatih weece.
Цяпер абрана:
Maatiyos 26: SCC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©2024 Wycliffe Ethiopia