Maatiyos 24
24
Yeesus maqhdas carih dumnan yaakumeh warisha
(Markos 13:1-2; Luukas 21:5-6)
1Yeesus amaa maqhdas careeko yewceh aduuk, kaa katattaynit maqhdas carih makun kaa yuybulluyin. 2Usuk laakin: “Tayim inkoh abluk tanin makiho? Taymidde inki dhayi cidditekkah raaco leya adde miyanem rummah sinak arhxiyuk ane” akko yerhxe.
Zaban abayshimah tuumar
(Markos 13:3-13; Luukas 21:5-6)
3Usuk Oolac koomalle defeyak, katattaynit sinni ulah: “Iski noh warish, tayim takko lem manda kinni? Ku mumut kee ta zabanhi abayshimah tuumar ayim yakko kinni?” arhxuk alle yemeetin. 4Yeesus lel: “Akkinnanti sin doolabak selita. 5Amayim lel: ‘Anu Masiix kiyo’ arhxuk yi migacalle mango mari yemeetiinih, mango mara doolaboona kinoonimhi sabbatah kinni. 6Dhiba kee dhibat ware lel taabboona kitin. Tayim takko alle tanemhi sabbatah, selita, mibirriigina, abayshima laakin amaa gedda maki. 7Wathan wathanti diddeh, nigsinna nigsinnat diddeh uguto kinni. Mango baarholle lel kirdidimom kee culul yakko kinni. 8Tayim lel inkoh amaa waaxelti ubkahi erherh kinon.
9Amaa geddadde, cazaabah tillaabisheenih sin yasxawna kee sin yagdafoona, amayim balih Yi migac hi sabbatah umman wathunuh tamnaccaboona kitin. 10Mango mari lel gaba yaxawna kinon, sittiya yosxoynih lel sittiya yancaboona kinon. 11Mango zirabti nobowa ugutoona kee mango mara doolaboona kinon. 12Sercat-maliini yammango kinamhi sabbatah lel mango marih kaxani daggowo kinni. 13Abayshima fanah curinnanti lel gargeerimo kinni. 14Umbuka xiyawah shaahid yakko ciloh ta nigsinnat Mece Wari umman caalamalle warreyo kinni, amaymik sarrah abayshima tamaato kinni.
Naba cazaab waqhte
(Markos 13:14-23; Luukas 21:20-24)
15 Nabii Daaniyeel yerhxeh yine ‘batakna kin cayne#24:15 Batakna kin cayne Daaniyeel kitaab 9:27 toomarta marhxo tekkeh, Suuriyaati nugus Antiyokhos Ebifanees angasti waqhtelle (167 Masiix ubkat basolle) yekkeh yine Maqhdas carih cayne kinni. Yeesus waani laakin Masiix-diddehi zacabah bisa tekkeh, zaban abayshimahi naba cazaab waqhte fanah inkoh takko maki (Markos 13:14, 19, 24; Waxye 3:10 ubul). ’ quddus kin makaanolle tablin gedda (tamaa yaqhriyeti macalsiito)#Daaniyeel 9:27; 11:31; 12:11, 16sarrah, amaa Yahuudiyalle yane mari koomamalle kudoona. 17Cari amok sugeti kaa caredde tanem bahito oobe wayo, 18dhagelle sugeti lel ishi sareena bahito caazalle gaxe wayo. 19Amaa maxadde soono kee dhoyishsha sayyo lel ten careyta! 20Sin kudi dhamxin waqhtedde, hido lel Sambatah yakkemko dhaaco abita. 21Amayim lel caalam erhedhdhemko kado fanah akkinnixem, tayek sarrah gantah caduruh akke wayo le cazaab waqhte yakko kinamhi sabbatah kinni. 22Amaa max adhdhurhe wayaado, walaa inki xiyawti raaceh anniye mirhaarho. Amaa doorimeh yane marah arhxuk laakin amaa max yadhdharho kinni. 23Amaydo, akkinnanti, ‘Ubula, Masiix talle yane!’ hido ‘Toohille yane!’ sinak yerhxemko maamanina. 24Amayim lel zirabti masiixiin kee zirabti nobowa uguteenih, dhiicimemko, amaa Yalli doore mara gantah doolaboona ciloh naba ishaarar kee bexsishsham aboona kinon. 25Taykinna, ookomeh sinah warisheh aniyo. 26Amaydo: ‘Ubula, barakalle yane’ sinak yerhxiinimko, mawcina. ‘Addat caredde yane’ sinak yerhxiinimko, lel maamanina. 27Amayim lel ayrommaaxaako yamiite xankarhi ayrodhdhuma fanah akah ifishaaka balih kinni Xiyawti Barhih mumut yakko lem. 28Batki alle yanelle guuma takatte.
Xiyawti Barhih mumut
(Markos 13:24-27; Luukas 21:25-28)
29Amaa maaxit cazaabko sarrah ayrotta akkanih dattoyto kinni, alsi lel ishi ifo yaxaw maki, xutuk caranko rado kinni, carshitti xaylit lel qinqin-yarhxo kinni. 30Sarrah, Xiyawti barhih tuumar carshelle yamballawo kinni, umbuka baarhot kishosh yaxzanoona kinon, Xiyawti Barhi lel caranti darurudde xayla kee naba nabneelih amiituk yabloona kinon. 31Usuk ishi malaykut naba thurumbat dhaw faro kinni, doorimte kaa mara lel carshi wuli wasanko wuli wasan fanah affara jahaako yaskattoona kinon.
Indacartooko nadrusem
(Markos 13:28-31; Luukas 21:29-33)
32Misaal indacartooko udrusa: tee xakuk silayaako ishi dharhaa yayyaace gedda, karma kab-terhxeh tanem taarhigin. 33Amayim balih lel, atin inkoh tayim tablin gedda, usuk kab-yerhxeh yanem kee caraf af gufeh yanem taarhigin. 34Tayim inkoh takkendah, ta ijo tillabto makinam rummah sinak arhxiyuk ane. 35Caran kee baarho inkoh tillaaboona kinon, yi waani laakin tillabto maki.
Max kee saaca yaarhigeti miyane
(Markos 13:32-37; Luukas 17:26-30,34-36)
36Amaa lellec kee saaca laakin Abbaako bextih, walaa Barha, walaa carshi malaykut gantah, yaarhigeti miyane. 37Xiyawti Barhih mumut, Nuux waqhtedde akah tekkeekah yakko kinni. 38Cilish weecaako basolle aykee Nuux naba doonikidde orobandah, beetak kee aacubuk yinin, amayim balih marcishitak kee marcishimak yiniinimko, 39cilish weeci yemeeteh inkoh ten beyandah akah aarhige wayeniikah, Xiyawti Barhih mumut lel amaa gina yakko kinni. 40Sarrah wuli dhagelle yane lamma xiyawtooko wuli tiya akko beyan gedda, wuliti amalle raaco kinni. 41Wuli lamma numa marhxanalle yarhxininyaako, wulitiyä akko beyan gedda, wulitiyä amalle racto kinni. 42Amaydo, sin Maddari adde amiituk yane lellec mitaarhigiinimhi sabbatah, himma-abita. 43Laakin tayim irhiga, cari-manabotti barti gazalle garceeni awlih saacadde yamaato lem yeerhegeh yineh yakkeedo, himmaalih suge dhaarhe, kaa caredde yigdiliinih oroboona lel xabe mirhaarho. 44Amaydo, Xiyawti Barhi atin adde ilaalinnixitin saacadde amiituk yanemhi sabbatah, tinqirribiinih suganta.
45Waqhte waqhteh folo akah yaxaw ciloh, kaa manabotti ishi xawazhi baclaysheena akko abe, umun kee kas-le garuzzi miyatto kinni? 46Kaa manabotti yamiite gedda, tayim abak akah suge garuzzi baraka-letiya kinni. 47Usuk lel umbuka ishi iraaroh baclaysheena akko abo kinam rummah sinak arhxiyuk ane. 48Amaa uma garuzzi: ‘Yi manabotti caawito kinni’ yarhxeyaako, 49kaa zooba kin garuuza yaatako erherhishah, sakraaniinlih lel beetah yaacube. 50Amaa garuzzohi manabotti usuk adde kaa ilaalinnixe lellec kee usuk aarhiginnixe saacadde yemeeteh, 51dhacumaatih kaa yiqhtsiceyaako munaafiqhiinlih kaa hayo kinni. Amaa caralle lel weeca kee ikokti xarqam yannaw kinni” akko yerhxe.
Цяпер абрана:
Maatiyos 24: SCC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©2024 Wycliffe Ethiopia