MARCOS 14
14
Mukul la xchapik te ya stsakik te Jesuse
1Cheb xanix kꞌaal ya skꞌan xlijk a te kꞌin Pascua sok te ya sweꞌik te waj te maꞌyuk levadura yichꞌoje. Te statal-saserdoteetike sok te maestroetik yuꞌun te mantaliletike yipalik ta snopel tutꞌil ya stsakik te Jesuse yuꞌun ya smilik ta ora nax. 2Sok ay la yalik:
—Ma me ta yorailuk kꞌin ya jtsaktik, yuꞌun jich makꞌ xlijkik ta kꞌop te genteetike —xchiik.
Jtul ants la smalbe perfume ta sjol Jesus
3Ay ta Betania te Jesuse ta sna Simon te sbiilinej te yichꞌoj kꞌaꞌel-chamel. Nakal ta mexa a, kꞌot tul ants yichꞌoj tal limeta te pasbil ta alabastro te nojel ta perfume te nardo sbiile, te ben toyol stojol. La skꞌajbe stiꞌil te limetae sok la smalbe ta sjol Jesus te perfume. 4Ay chaꞌoxtul te machꞌatik te ayik ae ilinik yuꞌun. La yalbe sbaik:
—¿Tuꞌun te jich nax a chꞌay te perfumee? 5Jaꞌ lek te lajuk yichꞌ chonel bael ta tresientos denarios, yuꞌun jich ya yichꞌ koltayel meꞌbaetik a te jichuke —xchiik. Ben bayal la yaꞌbiyanik te antse.
6Pero la yal te Jesuse:
—Ijkitayaikix. ¿Tuꞌun ya awutike? Batsꞌi ben lek te tut la spasbone. 7Te meꞌbaetike sil tiempo ay ta awolilik. Ya xjuꞌ ta kꞌuxutayel awuꞌunik ta sil tiempo. Yan te joꞌone ma siluk tiempo te ya joyinexe. 8Jal ants to la spas tutꞌil a juꞌ yuꞌune. La yaꞌbe perfume te jtiꞌbalule skuenta xmujkone. 9Jamal ya kalbeyex, ta bayuk ta spꞌejel balmilal te ba ya yichꞌ alel te lek yachꞌil kꞌope, teꞌ me ya yichꞌ alel ekꞌa te tut la spasbon jal ants to skuenta yuꞌun jich me ya xnaꞌot yuꞌun spisil genteetike —xchi te Jesuse.
Judas la xchapbe skꞌoplal Jesus
10Te Judas Iscariote, te jtul ta slajchaytululik te jnopojeletik yuꞌun te Jesuse, ba skꞌopon te statal-saserdoteetike. Teꞌ la xchapik te ya yaꞌbe ta skꞌabik te Jesuse. 11Kꞌalal la yaꞌiyik, ben jun yoꞌtanik yuꞌun, sok la yalbeyik te ya yaꞌbeyik takꞌin te Judase. Jich lijk sle te Judase tut ya yut ya yakꞌ ta entregal te Jesuse.
Te xmexa Kajwaltik
12Jaꞌ te primero kꞌaal yuꞌun te kꞌine te ya sweꞌik te waj te maꞌyuk lebadura yichꞌoje, sok te tut ora ya yichꞌ milel te alal-karnera te skuenta kꞌin Pascua, te jnopojeletike la sjojkꞌobeyik te Jesuse:
—¿Ba ya skꞌan awoꞌtan te ya xba jchaptik te weꞌelil skuenta kꞌin Pascua te ya aweꞌe? —xchiik.
13Yo la stikon bael cheb te jnopojeletike. Jich a yalbe:
—Baanik, ochanik bael ta mukꞌul jtejklum. Teꞌ ya xkꞌo ataik jtul winik te skuchoj bael skꞌib. Tsꞌakliyaik bael tsꞌiin. 14Te na te ba ya xꞌoch baele, kꞌoponbeyaik te yajwal te nae. Jich me xꞌawalbe: “Te Maestro ya sjojkꞌoy: ‘¿Ba ay te kuarto te ya xweꞌon sok te kaj-nopojeletik yuꞌun te skꞌinul Pascuae?’ xchi me”, uta me. 15stukel ya me yaꞌbeyat awilik jun mukꞌul kuarto ta xchaꞌkajal na te ben chapalixe. Teꞌ me xꞌachapik a te jweꞌeltike —xchi te Jesuse.
16Jich bajtik te cheb jnopojeletik yuꞌune sok ochik bael te ba jtejklume. Jich a kꞌo staik te tutꞌil albil yuꞌun te Jesuse. Te kꞌo xchapik a te weꞌelil yuꞌun te kꞌin Pascuae.
17Te kꞌalal ochix a te ajkꞌubale, jul tal te Jesuse sok te jnopojeletik yuꞌune. 18Te tutꞌil yipalik ta weꞌel ta mexa, jich a yal te Jesuse:
—Jamal ya kalbeyex, te ay jtul te jaꞌexe te yipal ta weꞌel sok te joꞌone, ya yakꞌon ta kꞌabal —xchi.
19Ta spisilik ochik ta ajtal-oꞌtan. Lijk sjokꞌoyik ta jujutul:
—¿Me joꞌon wan? —xchiik.
20La yal te Jesuse:
—Ay jtul te ta alajchaytululik te pajal ya jmul sok jwaj liꞌ ba plato to. 21Te Nichꞌanile puersa me jich ya xkꞌot ta skuenta te tutꞌil tsꞌibabil jilel ta Sjun te Diose, pero te winik te ya yakꞌ ta kꞌabale oꞌol me sba. Jaꞌ lek te manchuk ayinuk ta balmilal —xchi te Jesuse.
22Te tut ora yipalikix ta weꞌel ae, te Jesuse la stsak te waje. La yalbe kolayal jTatik Dios yuꞌun. La xetꞌ sok la yaꞌbe te jnopojeletik yuꞌune. Jich a yal:
—Ichꞌaik, jaꞌ me te jtiꞌbalule —xchi.
23Sok la stsak te basoe. La yalbe xan kolayal jTatik Dios yuꞌun te yaꞌlel tsꞌusube y la skꞌaseslanbey te jnopojel etik yuꞌune, sok la yuchꞌik ta spisilik. 24Y la yaltalanbey:
—Jaꞌ te jchꞌichꞌel te ya sta yip a jun yachꞌil trato. Ya yichꞌ malel skuenta skolel bayal ta tul genteetik. 25Jamal ya kalbeyex, te makꞌ ya jkuchꞌix te yaꞌlel tsꞌusube ja to tut ora ya jkuchꞌ ta yachꞌil te ba ay ta mantal te mukꞌ ajwalil te Diose —xchi te Jesuse.
Jesus la yal te ya xmukot ta yoꞌtan yuꞌun te Pedroe
26Te kꞌalal laj yoꞌtanik ta skꞌayojinel te salmoetik, bajtik ta ba ay Wits Olivos. 27Jesus la yaltalanbey:
—Apisilik te jaꞌexe ya xchꞌay te xchꞌuunel awoꞌtanik ta jtojole. Jich tsꞌibabil jilel ta Sjun te Diose: “Ya jmil te kanankarnerae, jich me ya xpujkik bael ta anel spisil te karneraetike” te xchie. 28Pero patil te kꞌalal chaꞌkuxonix tal ae, ya me xnailajon bael awuꞌunik ta Galilea —xchi te Jesuse.
29Pedro la yal:
—Manchuk me spisilik ya sjilesat, yan te joꞌone makꞌ jilesat —xchi.
30Jesus la yalbe:
—Jamal ya kalbeyat, jaꞌ mismo ajkꞌubal to ya amukon ta awoꞌtan oxeb buelta te ma to xꞌokꞌ cheb buelta te kꞌoꞌe —xchi.
31Pero la yal xan te Pedroe:
—Kajwal, makꞌ jmukat ta koꞌtan jtukel. Ya xjuꞌ ya joinat ta lajel —xchi.
Jich a yalik ta spisilik euk te yanetike.
Jesus la skꞌopon Dios ta Getsemani
32Teꞌ nax a bajtik ta jun luwar Getsemani sbiil. Te Jesuse la yalbe jilel te jnopojeletik yuꞌune:
—Naklanik liꞌ to, jaꞌ to teme laj koꞌtan ta skꞌoponel te Diose —xchi.
33La yikꞌ xan bael te Pedroe, te Jacoboe, sok te Juane. Te Jesuse lijk ta ajtal-oꞌtan sok ben triste. 34Jich a yal:
—Bayal ayon ta ajtal-oꞌtan. Ya xlajonix yuꞌun ya kaꞌi. Jilanik liꞌ nax to te jaꞌexe, sok wikꞌa me asitik —xchi.
35Been xan bael chꞌinuk te Jesuse. La skejan sba ta lum ta skꞌoponel Dios. La skꞌanbe Dios te yakuk xjuꞌ te mak xkꞌax swokole. 36Jich a yal ta skꞌoponel Dios:
—Jtat, te spisil ya xjuꞌ awuꞌune, te yakuk akꞌejbon bael te wokol to. Pero ma me jaꞌuk ya xkꞌot ta pasel te tut skꞌan koꞌtane, jaꞌ akꞌa pasuk te tut skꞌan awoꞌtan atukele —xchi.
37Jich sujt tal te ba ay te jnopojeletik yuꞌune. Wayajtik a kꞌo statalan. La yalbe te Pedroe:
—Simon, ¿me wayalat? ¿Me ma juꞌ awuꞌun te laꞌuk awikꞌ asit junuk orae? 38Wikꞌa me asitik, kꞌoponaik Dios, yuꞌun jich me makꞌ stsalex a te loꞌlayele. Te jaꞌexe ben bayal sbujtsꞌ te awoꞌtanike. Jaꞌ nax te atiꞌbalulike te maꞌyuk spuersae —xchi.
39Bajt xan ta skꞌoponel Dios y jich mismo kꞌo yal xan ta skꞌoponel Dios te tutꞌil la yalixe. 40Sujt xan te ba ay te jnopojeletike, y jaꞌ nax jich wayajtik kꞌo sta, yuꞌun te sitike mutsꞌtalanbot yuꞌun te wayele. Jich ma snaꞌik sujtesel a te skꞌope.
41Te Jesuse kꞌot xan ta yoxebal buelta. Jich la yaltalanbe:
—¿Me wayalex to sok ya to wan akux awoꞌtanik? Teyix a te wayele, kꞌotix yorail te ya xꞌakꞌot ta kꞌabal yuꞌun te jmulawiletike te Nichꞌanile. 42Jajchanik, konikik. Tijilajix tal te machꞌa ya yakꞌon ta kꞌabale —xchi te Jesuse.
La stsakik bael te Jesuse
43Yipal to ta kꞌop a te Jesuse, tijilaj tal te Judase, te jaꞌ jtul te slajchaytulul te jnopojeletike. Sjoyinej tal bayal genteetik chapalik tal sok spuñalik y sok steꞌik. Jaꞌ tikonbilik tal yuꞌun te statal-saserdoteetik, sok te maestroetik yuꞌun te mantaliletik, sok euk te moletike. 44Te Judase, te akꞌawanej ta kꞌabale, la yalix tal ta be te tutꞌil seña ya yakꞌbe yilik a te Jesuse:
—Jaꞌ te machꞌa ya xkꞌo kujtsꞌiye, jaꞌ me abi. Tsakaik me ta ora, lek me xꞌachukik bael —xchi.
45Te kꞌalal kꞌot te Judase, la sta sba sok te Jesuse, sok la yalbe:
—Talon, Maestro —xchi.
Sok la yujtsꞌi. 46Ora la stsakik te Jesuse, la xchukik bael.
47Ay jtul te machꞌa tey ay ae te la slokꞌes te spuñale sok la sbojbey lokꞌel jun xchikin te yaj-aꞌtel te statal-saserdotee. 48Te Jesuse la sjokꞌobe te genteetike:
—¿Me yuꞌun elekꞌon te tal atsakonik sok apuñalik sok ateꞌik? 49Jujun kꞌaal la jnojpesex ta templo y ma la atsakonik teꞌa. Jaꞌ jich ya xkꞌot ta pasel te tutꞌil tsꞌibabil jilel ta Sjun te Diose —xchi te Jesuse.
50Te jnopojeletike stukel nax a sjiles te Jesuse. Spisil a lokꞌik bael ta anel.
Te soltero kerem te bajt ta anele
51Sok ay jtul soltero kerem la stsꞌakli bael te Jesuse. Sbetsꞌoj sba ta jlik chꞌin pakꞌ. La stsakꞌik euk, 52pero kol bael ta skꞌabik. Jaꞌ nax yichꞌojik jilel te pakꞌe. Tꞌaxal a lokꞌ bael ta anel te kereme.
Tejkꞌanot Jesus ta yolil te juriyoetik te yichꞌojik yaꞌtelike
53Te tsakawetike la yikꞌik bael te Jesuse ta stojol te statal-saserdotee. La stsob sbaik tal spisil te statal-saserdoteetik, sok te moletik y sok te maestroetik yuꞌun te mantaliletike. 54Te Pedro jakal stsꞌaktsun bael asta kꞌot kꞌalal ta yamakꞌul sna te statal-saserdotee. La sjoyin ta naklej ta kꞌatimal te kananetik yuꞌun te temploe.
55Te statal-saserdoteetik sok spisil te juriyoetik te yichꞌojik yaꞌtelike la slebeyik smul te Jesuse te tutꞌil ya smilik, pe ma stabeyik te smule. 56Aunke me ben bayalik la yalik ta lotil kꞌop te ay smule, pero ma pajaluk kꞌot te skꞌopike. 57Ay jtul cheb tal stejkꞌan sba ta yalel lotil testigo:
58—Te joꞌotike la kaꞌiytik sluwaril te jich a yal: “Joꞌon ya jim te templo te pasbil yuꞌun te genteetike. Ta oxeb nax kꞌaal ya jpas yan templo te ma pasbiluk yuꞌun te genteetike”, xchi ta yalel la kaꞌiytik —xchiik.
59Pero ni ma jaꞌuk pajal a te tut la yalike. 60Jich tsꞌiin te statal-saserdote la stejkꞌan sba ta yolil te genteetike, sok la sjojkꞌobe te Jesuse:
—¿Tuꞌun ma xꞌajakꞌ te kꞌope? Albotik kaꞌiytik te tutꞌil te ya yalbelat te akꞌoplale —xchi.
61Te Jesuse ni pꞌaluk a kꞌopoj, ni maꞌyuk tuti yal. Jich te statal-saserdote la sjokꞌobe xan:
—¿Jaꞌat wan Cristoat te Xnichꞌan Diose te kꞌaxem stsaꞌamule? —xchi.
62La yal te Jesuse:
—Joꞌon abi. Y te jaꞌexe ya me awilik te Nichꞌanil te nakal ta sbatsꞌil skꞌab te Dios te ay bayal spodere, y te ya xtal ta stokalul te chꞌulchan —xchi.
63Jich tsꞌiin te statal-saserdote la xchꞌiꞌ te xkamixe yuꞌun te tut la yal te Jesuse, sok la yal:
—¿Tut xan yes yan testigoetik a? 64Jaꞌex la awaꞌiyikix te tutꞌil la yale te la stoy sba ta stojol Dios. ¿Tut ya awalik yuꞌun? —xchi.
La snopik ta spisilik:
—Ya skꞌan ya xlaj yuꞌun te smule —xchiik.
65Ay lijkik ta stubutayel, sok la smakbeyik sit ta pakꞌ, sok lijkik ta smajel. Jich a yalbeyik:
—Ala kaꞌiytik te machꞌa la smajate —xchiik. Sok euk te jkanan-temploe la smajbeyik sit.
Pedro la yal te ma snaꞌbe sba te Jesuse
66Te Pedroe ay ta alan te ba ay yamakꞌul te nae. Tal jtul skriada te statal-saserdotee, 67la yil te Pedroe te yipalik ta kꞌatimal teꞌa. La skꞌelubey sit sok la yalbe:
—Te jaꞌate jaꞌ ajoy aba sok te Jesus Nazarete —xchi.
68Te Pedro maꞌ yal sba. Jich a yal:
—Juꞌu, ma jnaꞌbe sba ni ya jnaꞌ te tut ya awalbone —xchi.
Jich a lokꞌ bael te Pedroe. Ba stejkꞌan sba te ba ay te amakꞌe. Te nax abi okꞌ te tat kꞌoꞌe. 69Te Pedro ilot xan yuꞌun te kriada. Lijk yalbe xan te yanetike:
—Te winik to jaꞌ te yaj-nopojele —xchi.
70Te Pedro la smuk xan ta yoꞌtan. Chꞌin tsꞌin a, te machꞌatik teꞌ ayik a lijk yalbeyik te Pedroe:
—Batsꞌi jich te jaꞌat ajoy aba soke, batsꞌi Galilea-winikat —xchiik.
71Jich te Pedro kꞌajkꞌub ta kꞌop asta la yakꞌ ta testigo te Diose:
—Ma jnaꞌbe sba te winik meto te ya ajojkꞌobikone —la yut.
72Lajel to yoꞌtan ta kꞌop a te okꞌ ta xchaꞌmelal te kꞌoꞌe. La snaꞌ te Pedroe te tut albil yuꞌun te Jesuse: “Ya amukon ta awoꞌtan oxeb buelta te ma to xꞌokꞌ cheb buelta te kꞌoꞌe”, te xchie. Te kꞌalal la snaꞌ ta yoꞌtan, lijk ta okꞌel te Pedroe.
Цяпер абрана:
MARCOS 14: AMANNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Nuevo Testamento Tzeltal de Amatenango © Sociedad Bíblica de México, 2006.